The Devil's Advocate (1997)

Er allt hið illa í heiminum komið frá djöflinum í undirheimum... Eða erum við bara okkar eigin gæfu smiðir? Þetta er mynd sem hristi svo í mér fyrst að ég ákvað að horfa helst ekki á hana aftur... mundi heldur ekki nenna því af því hún var svo dramatísk... Var meira að segja haldin einhverjum ranghugmyndum um að hún væri leiðinleg! En svo er hreint ekki og ég hef ekki getað haldið mig frá henni ef hún birtist á sjónvarpsskjánum. Búin að sjá hana mjög oft og finnst hún bara betri og betri í hvert sinn. Það er ekki síður þess vegna sem ég gef henni svo góða einkunn. Mér finnst leikstjórinn hafa gert góða hluti og margir góðir leikarar komu enda við sögu og settu sinn svip á myndina. Handritið þykir mér síður en svo ruglingslegt eða myndin langdregin, mér finnst allt í toppstandi. Þvílíkar setningar sem spretta af vörum Pacino sem fer hreinlega á kostum í myndinni. Og endirinn er vel skrifaður og vandaður og síðast en ekki síst óvæntur. Keanu Reeves er býsna góður eins og maður er að verða vanur hjá honum. Góð tækni, hörkuspenna og heimspekilegar vangaveltur gera myndina að hörkumynd sem enginn spennu- og hrollvekja aðdáandi ætti að láta fram hjá sér fara.

Furðulega góð mynd með mjög skemmtilegum söguþræði.

Al Pacino er mjög skemmtilegur sem Satan sjálfur enda hefur hann líka þann skondna hæfileika að geta hérumbil breytt sér íþær persónur sem hann leikur.

Endirinn er reyndar ekki alveg nógu góður en það sem Al Pacino segir í lokin er algjöt Brill Greed is my favourite sin.

Keanu Reeves er alveg ágætur en hefði mátt standa sig betur.

Topp mynd sem maður sér ekki fjúkandi út um gluggann hjá sér á hverjum degi

Hálfþunn og götótt, en þó allt í lagi að kíkja á hana hafi maður ekkert skárra við tímann að gera. Missir sig þó reyndar í algjöra dellu í lokin. Al Pacino góður að vanda, en Keanu Reeves er bara hann sjálfur - fullkomlega flatur. Bið þó fólk að taka eftir bifreið Reeves í myndinni, hún er í lagi.

Stórkostleg og meistaralega leikin kvikmynd af sannkölluðum hörkuleikurum. Hér segir af Kevin Lomax (Keanu Reeves) sem er ungur lögfræðingur í Flórída og hefur hann áunnið sér mikla virðingu starfsbræðra sinna fyrir glöggskyggni, lögþekkingu og það afrek að hafa aldrei tapað máli. Hann er einnig afar lukkulegur í einkalífinu og er kvæntur góðri konu, Mary-Ann (Charlize Theron), sem styður við bak hans og hefur búið honum fallegt og gott heimili. Það eina sem henni finnst vanta eru börn, en á því er hún staðráðin að ráða bót innan tíðar. Lífið leikur sem sagt við hin ungu hjón og hlutirnir gætu ekki verið betri. Eða hvað? Dag einn berst Kevin erindi frá stóru og virtu lögfræðifyrirtæki í New York sem býður honum geysilega vel launað starf ásamt ótrúlegum fríðindum. Kevin og Mary-Ann þurfa ekki að hugsa sig lengi um. Þau taka boðinu og það eina sem skyggir á gleðina er bölsýni móður Kevins sem lýst vægast sagt ekkert á þetta allt saman og lætur ógleði sína óspart í ljós. Þegar til New York er komið kemur í ljós að tilboðið var síst af öllu orðum aukið hvað varðar fríðindi og laun og þau hjónin flytja inn í lúxusíbúð á besta stað á Manhattan. Eftir að þau hafa komið sér fyrir tekur Kevin síðan til starfa undir stjórn forstjóra fyrirtækisins, hins óbrigðula og að því er virðist alvitra John Milton (Al Pacino). Hann á eftir að heilla Kevin gersamlega með visku sinni og þekkingu í snúnum málum, enda virðist hann alltaf vita hvernig meðhöndla á hin flóknustu mál og leysir úr öllum vandamálum af ótrúlegri kunnáttu. En brátt tekur ýmislegt skrýtið að gerast og smám saman sannfærist Mary-Ann um að ekki sé allt með felldu í fari Johns. Í fyrsta lagi virðist hann ætla að gleypa eiginmann hennar með húð og hári og hleður hann með vinnu svo hann getur aldrei verið heima. Í öðru lagi verður hún dag einn vitni að atburði sem færir henni heim sanninn um það að hér eru hvorki meira né minna en djöfulleg öfl á ferðinni. En kannski er það orðið of seint að snúa við ... Góð kvikmynd sem skartar hörkuleikurum eins og fyrr sagði og standa þar fremst óskarsverðlaunaleikarinn óviðjafnanlegi Al Pacino og þau Keanu Reeves og Charlize Theron. Góð kvikmynd sem ég mæli eindregið með