Vinsælast í bíó - 15. til 17. apr. 2019

Söguþráður Billy Batson er 14 ára munaðarlaus strákur sem í byrjun sögunnar er að flytja inn á sitt sjöunda fósturheimili eftir að hafa verið úthýst af því sjötta vegna slæmrar hegðunar, rétt eins og í hin fimm skiptin. Kvöld eitt þegar hann er á flótta undan strákum sem ætla að berja hann lendir hann í nokkurs konar hliðarveröld þar sem verulega dularfullur galdrakarl gefur honum krafta til að breyta sér í fullorðnu ofurhetjuna Shazam! Til að byrja með hefur Billy/Shazam! ekki nokkra hugmynd um hvaða ofurkröftum hann býr yfir og því síður hvernig hann á að stjórna þeim. Sú þekking kemur auðvitað með reynslunni og ekki seinna vænna því framundan er barátta við hinn hræðilega dr. Thaddeus Sivana ...

Söguþráður Dögg er ung og ákaflega hugmyndarík stúlka sem með aðstoð móður sinnar skapar ekki bara söguna um Undragarðinn, stórkostlegan skemmtigarð sem stjórnað er af dýrum, heldur byggir upp hluta hans heima hjá þeim mæðgum. Þegar Dögg finnur síðan fyrir tilviljun gamlan og gleymdan skemmtigarð í niðurníðslu reynist ímyndunarafl hennar svo sterkt að garðurinn hreinlega lifnar við ásamt dýrunum sem Dögg skapaði. Fyrir utan Dögg, sem óhætt er að segja að sé gædd miklum sköpunarkrafti, kynnumst við hér kostulegum dýrahópi, þ. á m. bláa birninum Þrym, villigeltinum Grétu, bjórunum og bræðrunum Kobba og Bunka, broddgeltinum Stebba (sem er ástfanginn af Grétu) og apanum Smára, en þessi dýr eiga eftir að hjálpa Dögg að láta Undragarðinn standa undir nafni!

Söguþráður Þegar Louis Creed fær stöðu stjórnanda við sjúkrahús í Maineríki flytur hann ásamt fjölskyldu sinni í hús sem stendur við útjaðar bæjarins Ludlow. Framtíðin virðist björt eða allt þar til voveiflegur atburður verður til þess að Louis grípur til úrræðis sem á eftir að gera illt verra - í orðsins fyllstu merkingu!

Söguþráður Þegar lítill fíll fæðist í fjölleikahúsi telur eigandi þess samstundis að hann sé vanskapaður því hann hefur svo stór eyru. Það á hins vegar eftir að koma í ljós að þessi risastóru eyru gera Dúmbó litla kleift að verða fyrsti fíll í heimi sem getur flogið. Þessir einstöku flughæfileikar hans eiga fljótlega eftir að verða mikil lyftistöng fyrir fjölleikahúsið og laða að fleiri áhorfendur en nokkru sinni fyrr. Um leið vekur hann auðvitað athygli gráðugra manna sem einsetja sér að eignast hann með öllum þeim ráðum sem til duga ...

Söguþráður Upprunasaga ofurhetjunnar ms. Marvel sem síðar var nefnd Captain Marvel og er að margra mati svalasta og kraftmesta ofurhetja Avengers-gengisins. Myndin gerist á tíunda áratug síðustu aldar þegar Carol, sem er orrustuflugmaður í Bandaríkjaher, lendir ásamt félögum sínum og öðrum Jarðarbúum mitt á milli í stríði tveggja ógnvekjandi geimverutegunda sem berjast hatrammlega um alheimsyfirráð. Sú styrjöld hefði sennilega gert út af við lífið á Jörðinni ef Carol hefði ekki borið gæfu til að öðlast þá ofurkrafta sem gerðu henni kleift að breyta sér í Captain Marvel og um leið í bjargvætt mannkynsins ...

Söguþráður Í þetta sinn snúast vandamál Verneuilhjónanna um að dætur hjónanna og menn þeirra eru að spá í að flytja frá Frakklandi og til upprunalands eiginmannanna, þ.e. Alsírs, Kína, Ísraels og Fílabeinsstrandarinnar. Á þær hugmyndir geta þau Claude og Marie ekki fallist og ákveða að fara í róttækar aðgerðir til að sanna að Frakkland sé besta land í heimi til að búa í. Inn í málin blandast svo foreldrar eins tengdasonarins sem komnir eru til Frakklands til að vera viðstaddir brúðkaup systur hans og komast þá að því sér til mikillar skelfingar að hún er að fara að giftast konu ...

Söguþráður Wilson-hjónin Gabe og Adelaide eru í fríi og á leið í afslöppun á ströndina ásamt börnum sínum tveimur, Zoru og Jason, þar sem þau ætla að hitta vini og taka því rólega í nokkra daga. Sú áætlun fer þó fyrir lítið þegar vægast sagt dularfullir tvífarar þeirra fara að gera þeim lífið leitt og breyta áætlun þeirra úr því að hafa það náðugt í æsispennandi baráttu fyrir lífinu. Enginn veit hvaðan þessi illa útgáfa af Wilson-fjölskyldunni kemur og því síður hvað henni gengur til, en það má bóka að eftir að þau Gabe, Adelaide, Jason og Zora átta sig á alvöru málsins munu þau snúast til varnar ...

Söguþráður Í þessari þriðju og síðustu mynd um ævintýri víkingastráksins Hiksta og drekans hans, Tannlausa, lenda þeir í sínu mesta ævintýri til þessa þegar þeir þurfa að takast á við hinn illa drekabana Grimmel sem hefur einsett sér að ná Tannlausa á sitt vald. Sú barátta snýst síðan upp í kapphlaup um að finna á ný „Hið horfna land“ þar sem drekar eru óhultir fyrir mönnum. Sagan gerist um ári eftir atburðina í mynd númer tvö og Hiksti hefur ásamt sínu fólki unnið hörðum höndum við að skapa hinn fullkomna stað á Jörðu, borgríkið Berk, þar sem menn og drekar lifa saman í sátt og samlyndi. Hann gerði hins vegar ekki ráð fyrir komu hins öfluga Grimmels sem hótar honum og hans fólki öllu illu láti hann Tannlausa ekki af hendi. Það kemur að sjálfsögðu ekki til greina ...

Söguþráður Eftir að Sjóðríkur dettur niður úr tré og fótbrotnar þar sem hann var að ná í mistiltein með hinni gullnu sigð tilkynnir hann bæjarbúum að það sé tími til kominn fyrir hann að draga sig í hlé og að finna þurfi yngri seiðkarl til að elda töfradrykkinn sem komið hefur í veg fyrir að Rómverjar hertaki Gaulverjabæ. Að sjálfsögðu þurfa þeir Ástríkur og Steinríkur að fara í málið.

Söguþráður Þegar lögreglumennirnir Brett Ridgeman og Anthony Lurasetti eru sendir í sex mánaða launalaust „leyfi“ fyrir að hafa gengið fullharkalega fram við síðustu handtöku ákveða þeir að gerast sjálfir ræningjar, enda hafa þeir bæði kunnáttuna og þekkinguna sem til þarf! Hvorugur gerir sér grein fyrir afleiðingunum ...

Söguþráður

Söguþráður Breska hljómsveitin Queen var stofnuð árið 1970 og átti eftir að afla sér heimsfrægðar á næstu fimmtán árum með lögum sem eru fyrir löngu orðin sígild og allir þekkja. Í Bohemian Rhapsody er farið yfir feril sveitarinnar allt frá byrjun, með sérstakri áherslu á hlut píanóleikarans, laga- og textahöfundarins og eins besta söngvara allra tíma, Freddies Mercury, sem lést langt um aldur fram árið 1991, aðeins 45 ára að aldri. Hápunktur myndarinnar er síðan Live Aid-tónleikarnir í júlí 1985 en frammistaða Queen á þeim hefur síðan margoft verið valin og nefnd besta tónleikaframmistaða rokksveitar fyrr og síðar ...

Söguþráður Ótrúleg saga um risastóra peru segir frá vinunum Sebastian sem er fíll og kisustelpunni Mithco sem dag einn veiða flöskuskeyti í höfninni frá týndum bæjarstjóra bæjarins sem þau búa í, en flaskan sem skeytið var í inniheldur einnig stórt fræ sem vinirnir planta að sjálfsögðu í mold og uppskera fyrir vikið risastóra peru. Fyrir gráglettni örlaga og tilviljana fer svo að þau leggja svo ásamt prófessor Glúkos upp í langferð yfir úthafið í perunni eftir að hafa útbúið hana sem bát. Á leiðinni lenda þau í vondum veðrum, hitta sjóræningja, drauga, drekaskip og margt fleira áður en þau finna loksins eyjuna þar sem bæjarstjórinn er.

Söguþráður Það eru liðin fimm ár síðan viðkunnanlegi verkakubburinn Hemmi bjargaði heimaborg sinni frá tortímingu með aðstoð vina sinna sem sumir hverjir voru gæddir ofurkröftum. Nú þarf Hemmi að taka á honum stóra sínum á ný þegar bestu vinkonu hans, Lísu, er rænt af stórskrítnum geimverum ... sem þýðir auðvitað að Hemmi verður að fljúga út í geim og bjarga henni.

Söguþráður Snemma á 18. öldinni á England í stríði við Frakka. Hin veikbyggða drottning Anne er við völd, en náin vinkona hennar Sarah, stjórnar landinu í hennar stað, ásamt því að sinna Anna. Þegar ný þjónustustúlka, Abigail, kemur, þá tekur Sarah Abigail undir sinn verndarvæng. En eftir því sem tími Sarah fer meira og meira í að sinna málum vegna stríðsins, fer Abigail meira í hennar hlutverk, sem fylgdarkona drottningar.

Söguþráður Britt-Marie er 63 ára kona sem þolir hvorki óhreinindi á heimili sínu né óreglu í hirslum þess og myndu margir segja að hún væri með tiltektar- og þrifnaðaræði. Þegar hún kemst að því að maðurinn hennar til 40 ára hefur verið henni ótrúr ákveður hún að fara frá honum og finna sér sína fyrstu vinnu á ævinni. Britt-Marie tekur fyrsta starfinu sem henni býðst en það felst í að taka að sér tilfallandi verk í svokallaðri félagsmiðstöð bæjarins, þ. á m. þrif. Það fer þó svo að hún leiðist út í það ólíklega hlutverk að þjálfa nokkra unga fótboltastráka sem geta reyndar lítið í fótbolta en bæta það upp með ótakmörkuðum áhuga og elju sem Britt-Marie kann að meta ...

Söguþráður Þegar tæknifræðingurinn Ido finnur höfuð og búk vélmennis á ruslahaug ákveður hann að taka það með sér heim og reyna að kveikja á því á ný. Það tekst og eftir að hafa smíðað nýja útlimi á vélmennið nefnir Ido það Alitu. Í ljós kemur að Alita man ekki neitt úr fortíðinni eða hvaða hlutverki hún gegndi en uppgötvar í staðinn að hún býr yfir gríðarlega öflugri bardagatækni sem hún fær fljótlega ástæðu til að láta á reyna.

Söguþráður Ungan bónda, dreymir um að verða leikari og leika í bíómynd. En enginn vill leika við hann. Fastur í eigin heimi leikur hann senur úr gömlum bíómyndum við sjálfan sig, allan liðslangann daginn. Dag einn ákveður hann að láta draum sinn rætast og rænir 5 listamönnum úr borginni. Leikkonu, rithöfundi, tónlistarmanni, leikstjóra og myndlistarmanni og neyðir þau til að gera bíómynd með sér með gömlu VHS vélinni sinni úti í hlöðu.

Söguþráður Fimm ára drengur kærir foreldra sína fyrir vanrækslu á meðan hann tekur út 5 ára fangelsisdóm fyrir ofbeldisfullan glæp.

Söguþráður Fylgst er með Alex Honnold þegar hann klífur fyrstur manna án hjálpar- eða öryggistækja, hinn 900 metra háa El Capitan hamravegg í Yosemita þjóðgarðinum.