Það er engu líkt að sækja kvikmyndahús og njóta þar magnaðra bíómynda. Upplifunin snýst þó ekki aðeins um stærð tjaldsins heldur einnig um almenn gæði og þægindi salarins auk ýmissa smáatriða.
En skoðum hvernig salirnir á höfuðborgarsvæðinu raðast upp, frá þeim versta til hins besta.
Það er Heimir Bjarnason kvikmyndagerðarmaður sem skrifar samantektina. Hann fær orðið.
Kvikmyndahús á Íslandi eru með þeim betri í heiminum. Undanfarin ár hafa miklar breytingar átt sér stað. Það virðist sem samkeppnin milli kvikmyndahúsanna sé ekki lengur um úrval kvikmynda í sýningu heldur aðstöðuna sjálfa. Hver býður upp á bestu upplifunina?
*Ath. þetta er uppfærður listi frá 12. október 2026. Sjá fyrri færslu .
Byrjum á botninum…
19. Sambíóin Kringlunni – Salur 2
Versti parturinn við að uppfæra þennan blessaða lista er að velja sísta salinn. Nota bene, “sísti” salurinn er ávallt betri en besta heimabíóið. Ég hef verið skíthræddur á hrollvekjum í þessum sal og ég hef notið hágæða mynda á borð við “La La Land” hér. Þetta er flottur salur sem ég tengi nú til dags við góð kvikmyndagæði þar sem Óskarsverðlaunamyndir fá oft að spilast hér. En einhver þarf að vera neðstur. Því miður!
18. Sambíóin Egilshöll – Salur 4
Eini salurinn í Egilshöll þar sem tjaldið trónir ekki yfir manni en sándið er gott.
17. Laugarásbíó – Salur B
Lítill og kósý. Hér er möguleiki að sitja framarlega og láta tjaldið fylla út í allt sjónsviðið án þess að rústa hálsinum.
16. Bíó Paradís – Salur 2
Solid miðjusalur en ég er óneitanlega spenntari fyrir hinum sölum Paradísarinnar.
15. Smárabíó – Salur 7
Nýr salur! Það sem salurinn tapar í smæð gerir hann upp með pottþéttu hljóðkerfi og góðum sætum.
14. Sambíóin Kringlunni – Salur 3
Pottþéttur miðjusalur sem breiðir vel úr sér.
13. Smárabíó – Salur 4 & 5
Fínir salir með skemmtilegu sci-fi lúkki. Nú með Lúxus-sætum aftast!
12. Bíó Paradís – Salur 3
Uppáhalds litli salurinn minn eftir að við kvöddum okkar allra besta, sal 3 í Álfabakka. RIP.
11. Sambíóin Kringlunni – Salur 1
Nerd alert: Góður salur fyrir myndir í 4:3 og 16:9 hlutföllum. Nældu þér í sæti framarlega!
10. Smárabíó – Salur 2
Mitt á milli “litlu” salanna og MAX.
9. Laugarásbíó – Salur A
Pottþéttur miðlungs salur. Þægilegustu sætin á landinu.
8. Sambíóin Egilshöll – Salur 2 & 3
Góðir salir þegar að kvikmynd er búin að vera í bíó í smá tíma og er því kominn í “minni” salina en maður vill samt sjá þær á stóru tjaldi.
7. Smárabíó – LÚXUS
Lúxus salur Smárabíós hoppar upp um mörg sæti þökk sé frábærum breytingum á síðasta ári. Nýju sætin eru einstaklega góð og það er þægilegra að liggja í þeim heldur en sætunum í Ásberg (sem er gott þar sem tjaldið er hærra). Það er lúmskt erfitt að gera upp milli lúxus salanna og það eru klárlega hliðar þar sem Smárabíó tekur vinninginn. Mathöllin í Smáralind er að mínu mati meira næs en í Kringlunni. Svo býður Smárabíó uppá huggulega forstofu fyrir gesti lúxussalsins þar sem er t.d. hægt að fá bjór á krana eða vínglas áður en myndin hefst (og í hlé). Fínasta uppskrift að góðu stefnumóti.
6. Sambíó Kringlunni – Ásberg
En Ásberg nær að hoppa einu sæti ofar þökk sé nokkrum tæknilegum hliðum. Dolby Atmos hljóðið er Kraftmikið með stóru K-i og tjaldið nýtir sér allt veggpláss sem er í boði. Hléleysið er gordjöss. Framúrskarandi salur fyrir þá sem vilja lúxusinn (en eins
og sést á nr. 1 valinu mínu sækist ég ekki mikið í breiðu lúxussætin). Ekki beint tengt Ásberg en mig langar að hrósa Kringlubíói fyrir meiri áherslu á viðburðabíó (búbblubíó, sing-along sýningar, David Lynch þema o.s.frv).
5. Flauel, Smárabíó
Fyrir fjórum árum voru 29 kvikmyndasalir á höfuðborgarsvæðinu. Í dag eru þeir 20. Það er smá downer að vera sífellt beðinn um að uppfæra listann því sölunum fækkar og því er það mikið gleðiefni að fá nýjan sal… og ekki bara nýjan heldur frábæran!
Besta staðsetning og fjarlægð tjalds í Smárabíói. Lúkkið er nostalgískt og manni langar helst að klæða sig í fínu fötin þegar maður á miða í Flauel.
4. Salur 1, Egilshöll
Besti parturinn við að fara í Egilshöllina er að labba niður ganginn inní sal og sjá RISASTÓRA 200 fermetra tjaldið taka við manni. Ég vel Egilshöllina þegar mig langar gjörsamlega að hverfa inní bíómynd og það var mikill hápunktur að fá að sjá
2001: A Space Odyssey þar í fyrra. Einnig langar mig að hrósa Egilshöllinni í hástert fyrir að vera eina bíóið sem minnir
fólk á að slökkva á símunum áður en myndin hefst. Sumir vilja meina að svona lagað hafi engin áhrif en ég sé alltaf einhverja slökkva á símunum þegar að tilkynningin er spiluð.
3. MAX Smárabíó
Ég er nokkuð viss um að MAX sé besti salur landsins hvað varðar tæknina. Myndgæðin eru kristaltær og hljóðið afskaplega skýrt. Hvert einasta litla smáatriði fær að njóta sín í botn. Uppfærðu sætin eru þægileg og það er hægt að halla þeim á þann hátt að framarlegu sætin eru miðaverðisins virði.
2. AXL Laugarásbíó
Smárabíó er mögulega með “besta” hljóðið en AXL er með MESTA hljóðið. Dúndrandi flottur salur sem er alltaf gaman að heimsækja. Dolby Atmos intróið er tryllt í hvert einasta sinn.
1. Bíó Paradís – Salur 1
Þetta var erfitt val. AXL, MAX og Egilshöll 1 eru framúrskarandi salir þar sem risatjöldin gleypa mann heilan. Já, mig langar að sjá Dune og Interstellar og svoleiðis verk í þessum sölum. En bíó er meira en epíkin. Bíó Paradís er hvorki með stór leðursæti né 200 fermetra risatjald. Hér finnur maður vel fyrir nágranna sínum á uppseldum sýningum. Nú er ég mögulega að eldast og
verða skrýtinn en þannig vil ég hafa það! Bíó er að sitja með ókunnugum í myrku rými og upplifa kvikmyndatöfrana saman.
Samkvæmt þeirri skilgreiningu þá verður þessi salur að vera efstur því hér eru töfrarnir mestir.
