Samkvæmt grein Davids Deal í Forbes er heimildarmyndin You Can See Everything næst tekjuhæsta heimildarmynd á frumsýningarhelgi sem ekki fjallar um tónlist, þótt myndin hafi aðeins verið sýnd á 855 sýningartjöldum fyrstu helgina í Bandaríkjunum.
Myndin sem var frumsýnd í landinu föstudaginn 16. október síðastliðinn, fór síðar í sýningar í 3.243 sölum þegar mest lét og er enn sýnd í næstum því tvö þúsund sölum í Bandaríkjunum. Tekjurnar eru komnar upp í 89 milljónir Bandaríkjadala sem er jafnvirði rúmra 11 milljarða íslenskra króna.
Kvikmyndin, sem margir bíða spenntir eftir að sjá hér á Íslandi, verður frumsýnd núna á fimmtudaginn 19. nóvember.

Lance Oppenheim og Nathan Fielder leikstýra myndinni sem fjallar um Elizabeth Holmes, stofnanda nýsköpunarfyrirtækisins Theranos, sem var dæmd í fangelsi fyrir að svíkja fjárfesta. Frásögnin beinist jafnframt að sambandi hennar við Billy Evans.
Fielder verður sjálfur hluti sögunnar, og gistir inni á heimili þeirra Holmes og Evans.

You Can See Everything 2026
Þrjátíu og fjórum dögum áður en hún er send í fangelsi býður hin alræmda Elizabeth Holmes, frumkvöðull úr Kísildalnum, kvikmyndatökuliði að fylgjast með hverju fótmáli sínu. Það sem byrjar sem náið portrett af…
Deal rekur velgengnina meðal annars til aðdáendahóps Fielders og markaðssetningar A24. Óvænt sýning á Telluride-kvikmyndahátíðinni vakti sterk viðbrögð og stikla, með yfirbragði sálfræðitryllis, ýtti undir umræður á samfélagsmiðlum.
Áhorfendahópurinn var ungur: 70 prósent voru undir 35 ára aldri. Karlar voru 56 prósent og konur 44 prósent; 44 prósent sáu myndina með maka.
Áhugi á blekkingum
Forbes segir óvenjulega frásagnaraðferð og áhuga á blekkingum og sjálfsblekkingu styrkja aðdráttaraflið. Myndin er með 97 prósenta jákvæða dóma bæði gagnrýnenda og áhorfenda á Rotten Tomatoes kvikmyndavefnum bandaríska.
Deal telur árangurinn sýna möguleika persónulegra frásagna úr Kísildal. Tæknigeirinn einn tryggi þó ekki aðsókn, eins og tekjubrestur The Social Reckoning sýni en hún fjallar um samfélagsmiðilinn Facebook.






