Kanadíski leikarinn Adam DiMarco, sem vakti mikla athygli í annarri þáttaröð HBO-þáttanna The White Lotus, hefur bæst í leikarahóp íslensku kvikmyndarinnar Hafið er svart (Dark Ocean). Þar mun hann fara með aðalhlutverkið ásamt Baltasar Kormáki og Ólafi Darra Ólafssyni.
Frá þessu greindi bandaríska kvikmyndatímaritið The Hollywood Reporter í október.

DiMarco fer með hlutverk Hákonar, 28 ára Íslendings sem er fæddur og uppalinn í Kanada en hefur búið á Íslandi síðustu þrjú árin. Þegar Hákon og kærasta hans eiga von á sínu fyrsta barni ákveður hann að ráða sig á togara í Norður-Atlantshafi til að sjá fyrir fjölskyldunni.
Fljótlega kemur þó í ljós að lífið um borð er mun erfiðara en hann hafði ímyndað sér. Hákon þarf ekki aðeins að takast á við miskunnarlaust hafið heldur einnig harðneskjulegan heim áhafnarinnar, þar sem óskráðar reglur, þögn og eitraðar hugmyndir um karlmennsku móta samskiptin.
Baltasar í hlutverki skipstjórans
Baltasar Kormákur mun fara með hlutverk Andra skipstjóra en Ólafur Darri leikur mann að nafni Höddi. Fleiri leikarar eru meðal annars Þorsteinn Bachman og Þorvaldur Davíð Kristjánsson.

Leikstjóri myndarinnar er Baldvin Z, sem meðal annars hefur gert Vonarstræti og Lof mér að falla. Handritið skrifar Matthías Tryggvi Haraldsson, einn af stofnendum Hatara.
Baldvin segist hafa leitað lengi að rétta leikaranum í hlutverk Hákonar. Að hans sögn hafi DiMarco þá viðkvæmni, hlýju og innri styrk sem persónan krefst.
„Í grunninn fjallar Dark Ocean um að tilheyra og þau kerfi sem móta unga menn að þeim einstaklingum sem þeir verða,“ segir Baldvin í samtali við The Hollywood Reporter.
Tökur hefjast á næsta ári
Eins og Kvikmyndir.is greindi frá í maí hefur alþjóðlega sölufyrirtækið Rocket Science tekið að sér sölu myndarinnar, en verkefnið var kynnt á kvikmyndamarkaðnum í Cannes.
Myndin er framleidd af íslenska framleiðslufyrirtækinu Glassriver í samstarfi við kanadíska fyrirtækið Terminal City Pictures.

Áætlað er að tökur hefjist í mars 2027 og fari fram bæði á Íslandi og í St. John’s á Nýfundnalandi í Kanada.
Heimildir
The Hollywood Reporter – ‘White Lotus’ Breakout Adam DiMarco Attached to Star in Glassriver’s First Feature ‘Dark Ocean’ (Exclusive)






