The Odyssey sló í gegn um helgina í kvikmyndahúsum á Íslandi þegar rúmlega 8.100 manns mættu í bíó. Þetta er stærsta frumsýningarhelgi ársins að því er kemur fram í fréttatilkynningu frá dreifingaraðila kvikmyndarinnar, Myndformi.
Í tilkynningunni segir einnig að á heimsvísu hafi myndin slegið öll fyrri met leikstjórans Christopher Nolan með 257,8 milljón dala frumsýningarhelgi, sem er hans stærsta til þessa.
Í Bandaríkjunum tók myndin inn um 124,5 milljónir dala, þar sem IMAX-sýningar áttu stóran þátt í aðsókninni.
Tekin upp á Íslandi
Myndin var að hluta til tekin upp á Íslandi þar sem stórbrotið landslagið hjálpar til við að skapa hinn goðsagnakennda heim Ódysseifs eins og segir í tilkynningunni.
The Odyssey (2026)
8.3 
8/10 Myndin segir frá Ódysseifi, konungi Íþöku, sem hefur barist hetjulega í Trójustríðinu en á erfitt með að komast heim til eiginkonu sinnar og sonar eftir að stríðinu lýkur. Á tíu ára langri heimferð sinni mætir hann guðum, skrímslum, töfrakonum og öðrum hindrunum sem tefja fyrir honum, á meðan Penelope, eiginkona hans, ver heimili þeirra fyrir ásælnum biðlum með aðstoð sonar þeirra, Telemachus.
Höfundur myndarinnar er eins og fyrr sagði Christopher Nolan, sem byggir handritið á 2.700 ára gömlu kvæði Hómers.
Nolan leikstýrði einnig Oppenheimer sem sló eftirminnilega í gegn árið 2023 og hlaut meðal annars Óskarsverðlaun fyrir bestu leikstjórn og bestu kvikmynd. The Odyssey er jafnframt fyrsta kvikmyndin sem er tekin upp að öllu leyti á IMAX-myndavélar.
Með helstu hlutverk fara Matt Damon (Ódysseifur), Tom Holland (Telemakkos), Anne Hathaway (Penelópa), Robert Pattinson (Antinóos), Lupita Nyong’o (Helena/Klýtæmnestra), Samantha Morton (Kirke), Zendaya (Aþena) og Charlize Theron (Kalypsó). Í öðrum hlutverkum eru meðal annars Jon Bernthal, Himesh Patel, Bill Irwin, Elliot Page, Benny Safdie, Corey Hawkins, Mia Goth og John Leguizamo.
