Legally Blonde (2001)

Hæ hæ.

Mér finnst skrítið að sumum bara finnst þessi mynd alveg hrein hörmung því mér finnst hún æðisleg. Þótt það sé dáldið langt síðan ég sá hana hefur mig alltaf langað að sjá hana aftur en hún er þá aldrei inn á videoleigum og svoleiðis. Hún fjallar um stelpu sem er ný búið að segja upp og er hún því í ástarsorg því hún var alveg yfir sig ástfangin af honum en hann segir að þau geti ekki verið saman því hann vantar einhverja sem er svona æ nú man ég ekki hvernig á að orða þetta en svo er hann líka að fara í Harvard. En eftir að hún er búin að loka sig inni og vinkonur hennar vilja lífga upp á hana og segja henni að koma í naglasnyrtingu. En þar áhveður hún að hún verði að komast í Harvard. En mönnunum líst bara nokkuð vel á myndbandið sem hún sendir inn og þess vegna kemst hún inn í Harvard. En fyrsta daginn hittir hún fyrverandi kærastan sinn en hann er þá byrjaður aftur með sinni fyrrverandi sem var skólaástinn hans. En þá hittir hún einn mann ég man ekki alveg hvað hann hét en hann var nokkuð eldri en hún. En allt gengur svona bla bla bla bla. Ég meina ekkert svona leiðinlegt heldur það gerist svo margt að maður nennir ekki alveg að skrifa það allt en hvað með það mér finnst þessi mynd bara ÆÐISLEG!!!!!!!!!! En þetta er frábær mynd og ef að einhver er ekki búin að sjá hana ætti hann að fara á næstu leigu og taka hana ef hún er inni því auðvitað er ástæða fyir að hún er í 2 sæti í vinsælustu spólurnar. Hún er frábær og aftur frábær og ekki missa af henni.

Hallfríður eða Halla

(INNIHELDUR SPOILERA)Þetta er nú meiri dellan. Þetta er sú fyrirsjáanlegasta mynd sem ég hef séð. Söguþráðurinn er: Vinsæla, heimska ljóskan missir ''ástina í lífi sínu'' og ákveður að fara í laganám til að ná henni aftur. Þegar hún kemur í skólann er hann trúlofaður annarri stelpu. Ljóskan og kærasta stráksins verða óvinkonur og bla bla bla síðan hittir ljóskan annann strák og þau verða ástfangin bla bla bla þær verða vinkonur bla bla bla og verða á móti stráknum sem hún fór í skólann til að hitta bla bla bla og ljóskan verður besti nemandi skólans. Afskaplega klisjukennd mynd. Þessar stjörnur fá leikararnir sem eru fínir.

Legally Blonde er mjög góð afþreying fyrir þá sem eru ekki að leita eftir einhverri darma grenjumynd heldur fyrir þá sem langar að brosa þegar myndin er búin=) Þessar svokölluðu unglingamyndir eru allar sama sultan en eins og einhver sagði hér á undan finnst mér þessi skara örlítið fram úr. Hún er alveg ótrúlega vel leikin og mjög skemmtileg ef maður hefur húmor fyrir svona hlutum. Þess vegna ráðlegg ég öllum sem ekki hafa séð hana að leigja hana:)

Legally Blonde er ein af þeim myndum sem minnir mann á það að maður á ekki að dæma myndina áður en maður sér hana. Hér er á ferðinni alveg fínasta Formúlu - Hollywood mynd. Myndin fjallar í stuttu máli um stelpu sem er mjög snobbuð og upptekin af tísku og útliti. Kærastinn hennar segir henni upp og til að ganga í augun á honum fer hún í lagadeildina í Harward. Auðvitað er myndin heimskuleg á köflum en engu að síður er hér um að ræða mynd sem að kemur manni í glettilega gott skap. Það sem er hvað best við myndina er leikurinn og aukapersónurnar sem eru hverri annarri skrautlegri. Fín mynd sem vert er að skoða.

Þessi mynd kom alveg verulega á óvart og er hin besta skemmtun, algjör gelgjumynd sem hefur sjálfa yfirgelgunna Reese Witherspoon í aðalhlutverki.

Myndin er náttúrulega fyrirsjáanleg og allt það eins og aðrar svona myndir en hún er einnig nokkuð brosleg og eiginlega bara alveg findin á köflum.

Á skalanum bíó, videó eða sjónvarp nær hún alveg videóinu.

Að mínu mati er Legally Blonde allgjör snilld en ég er náttúrulega allveg ofur gelgja og dýrka svona myndir þannig ég varð ekki fyrir vonbrigðum þegar ég sá þessa mynd. Ég er allveg sammála Helga (sem áður skrifaði um þessa mynd) að Reese Witherspoon passar allveg nákvæmlega í þetta hlutverk og að aukaleikararnir séu mjög flottir. Ég var ekkert að fíla Reese Witherspoon og fleiri leikara í þessari mynd áður en ég sá hana en ég bókstaflega dýrka ég þá flesta núna. Ok Þetta er kannski ekki allveg í fyrsta skipti sem maður sér svona kvikmyndir um einhverjar unglingsstelpur sem eru að reyna að ná aftur gamla kærastanum sínum en af einhverjum ástæðum finnst mér þessi mynd bara skara framúr hinum vælu-ástarsögunum. Og ég get bara ekki beðið eftir því að hún komi út á myndbandi. ;)

Legally blond er ekki eins stelpuleg eins og ég hélt heldur fyndnari. Þessi mynd er um stelpu sem fer í skóla og verður valin til að ransaka morð en sá sem er haldið að hafa framið morðið gerði það ekki. Þessi mynd er ekki sem verst og ég segi bara við aðra sem hafa ekki séð Legally blond að kíkja á hana, sérstaklega stelpur.

Því verður ekki neitað að Legally Blonde sé klisja alveg frá upphafi til enda og hún inniheldur margt sem við höfum séð þúsund sinnum áður í slíkum myndum. En hún er samt einhver óvæntasta klisja sem ég hef orðið vitni af í mjög langan tíma. Ég hafði ekki áður ætlað mér að sjá hana í bíó (hún leit nú meira út fyrir að vera vídeó-mynd af því sem ég hafði séð í sýnishornum) en svo var mér boðið frítt þannig að ég gat bara ekki neitað, og ekki sé ég eftir að hafa farið á hana. Hún var tímans virði (það sem ég átti von á var bara önnur tilgangslaus stelpumynd í anda Clueless). Ég hló meira að þessari en ég hélt í fyrstu, en það sem kitlaði hláturtaugarnar í mér mest voru aðallega ljóskustælarnir í Reese Witherspoon. Hún sýnir skemmtilega frammistöðu sem aðalljóskan, sem var stórskemmtileg persóna. Luke Wilson er nú frekar dauður í sínu hlutverki (hefur hann ekki verið það yfirleitt?), og sama má segja um þennan sem leikur fyrrverandi kærasta aðalpersónunnar. Dömurnar stóðu sig samt heldur betur en flestir í karlhlutverkunum. Selma Blair var nokkuð góð sem bráðfallega tæfan, Jennifer Coolidge (sem fór á kostum í American Pie myndunum) sýnir marga góða og takta þrátt fyrir að hlutverk hennar kom plottinu lítið við. Svo er það Ali Larter (Final Destination, Jay and Silent Bob Strike Back) var heldur ekki sem verst. Myndin er stútfull af góðum og vandræðalegum atriðum. Samt fór eitt atriði í taugarnar á mér, og það var þegar Witherspoon kom klædd sem kanína í eitt partíið sem hún hélt fyrst að væri grímuball, en mér fannst eins og að það væri beint tekið úr Bridget Jones's Diary, þar sem má finna nákvæmlega eins atriði (nema bara aðeins fyndnari). Einnig var mjög fyrirsjáanlegt með hvaða manni ljóskan ætti eftir að enda með í lokin. Legally Blonde er mjög gölluð en samt ágæt skemmtun sem hentar fleiri en bara ljóskum.

Legally Blonde kom mér dálítið á óvart þar sem mér fannst grunnhugmyndin af söguþræðinum frekar tæp ásamt því sem það sem ég hafði séð úr myndinni benti ekki til þess að hér væri neitt frábært á ferðinni. Það kemur í ljós að þetta er bara ansi góð gamanmynd sem á marga fyndna spretti. Söguhetjan er ljóskan Elle sem ákveður að hætta í tískunámi og fara í lögfræðinám til þess að vinna hjarta gamla kærasta síns aftur. Hún er klár stelpa en þar sem hún hefur áður ekki spáð í mikið flóknari hlutum heldur en fötum og hárgreiðslum er þetta nokkuð stórt stökk fyrir hana. Reese Witherspoon smellpassar í þetta hlutverk og aðrir aukaleikarar koma einnig vel út, en þar má nefna Luke Wilson og Selmu Blair. Legally Blonde er kannski ekkert sérstaklega frumleg kvikmynd en henni tekst samt betur upp en langsamlega flestum svokölluðu grínmyndunum sem við höfum verið að sjá undanfarið. Húmorinn virkar, handritið er nógu gott til þess að manni sé ekki alveg sama um persónurnar og síðast en ekki síst er hún einfaldlega skemmtileg.

Fór á þessa mynd á óvissusýningu. Ég hefði alveg eins getað hent 800-kallinum! Pirrandi aðalsögupersóna, óhugnalega gelgjulegar bestu-vinkonur sem gerðu ekkert annað en að pirra bíógesti og fyrirsjáanlegur söguþráður gera þessa mynd að einni leiðinlegustu mynd sem ég hef séð! Þessi mynd ætti í raun ekki að fá eina einustu stjörnu, en þar sem eitt og eitt atriði var í lagi fær hún hálfa. En alls ekki meira!

Ég er enn í sjokki eftir þessa mynd, því ég bjóst engan veginn við því að hún væri jafn ótrúlega fyndin og hún er. Kannski er best að fara í bíó með litlar væntingar því þá er mestur möguleiki á einhverju óvæntu. Legally Blonde lítur út á pappírnum eins og enn ein ódýr heimsk unglingamynd, en hún er í raun mjög vel skrifuð og beitt gamanmynd sem gerir létt grín að ljóskum jafnt sem gáfnaljósum. Þetta er mynd með móral - ekki dæma einhvern af útlitinu - en það skemmir ekki fyrir því grínið flæðir óhindrað út í gegn og sér fyrir stöðugum hlátrasköllum frá áhorfendum. Reese Witherspoon skilar fyrsta flokks leik, eins og hennar var von og vísa, í hlutverki ofurljóskunnar Elle Woods. Elle er klappstýra, fegurðardrottning, formaður systrafélagsins síns, og hún stundar nám í tískusölumennsku. Fyrir flest venjulegt fólk er hún sem sagt algjörlega óþolandi. Þegar kærastinn segir henni óvænt upp (hún er ekki nógu frambærileg sem eiginkona verðandi stjórnmálamanns) verða þáttaskil í lífi Elle. Hún ákveður að elta kærastann til Harvard og krækja í hann aftur, en þegar á líður skiptir hana meira máli að sanna sig í náminu. Witherspoon er frábær í sínu hlutverki. Hún sannaði það í Election að hún er alvöru leikkona, og hún stelur myndinni hreinlega. Selma Blair (mótleikkona Witherspoon í Cruel Intentions) er temmilega tæfuleg í hlutverki helsta keppinautsins, Jennifer Coolidge er bráðfyndin sem hálfdrusluleg snyrtidama, en Luke Wilson er eins og fiskur á þurru landi í þessari mynd. Hann er á svipinn eins og hann sé alltaf að hugsa hvað hann sé eiginlega að gera þarna. Legally Blonde er full af bráðfyndnum senum og litlum smáatriðum (takið eftir símanum hennar Elle) og er bæði meinlaus og óvænt skemmtun. Enn eitt dæmi um mynd sem er mun betri en hún á í raun rétt á að vera.