Legally Blonde 2 (2003)

Aftur brillerar Reese Witherspoon í leik sínum sem ljóskan Elle Woods. Var búin að bíða eftir framhaldinu og varð sko ekki fyrir vonbrigðum, né aðrir í salnum.

Elle fer til Washington til að berjast gegn tilraunum á dýrum. En sú barátta reynist henni erfiðari en hún gerði sér grein fyrir í upphafi. Yndislega fyndin og skemmtileg. Hjá mér er hún alveg fjögurra stjarna virði.

Legally Blonde 2 er einhver sú allra versta mynd sem ég hef séð um æfina og hef ég séð minn skammt af kvikmyndum. Myndin er langdregin og svo ótrúlega barnaleg að The Postman gæti jafnvel fengið tilnefningu til óskarsverðlauna. Ef þú ert ekki 5 ára stelpa sem kannt Clueless utanaf, haltu þig frá þessari.

Ég bjóst nú ekki við miklu af þessari mynd og varð því ekki fyrir neinum vonbrigðum. En ég brá mér nú samt í Regnbogann núna áðan að sjá myndina aðallega út af Reese Witherspoon sem mér finnst svo einstaklega hugguleg. Þrátt fyrir það að hún sé góð leikkona þá held ég að ég hafi barasta ekki séð neina nógu góða mynd með henni. Synd og skömm. Hvað ég vildi sjá hana í mynd sem ætti skilið þrjár fjórar stjörnur, ojæja það hlýtur að koma að því. Ég verð bara að vera þolinmóður. Legally blonde 2 er því ekkert skárri en hinn slappi forveri sinn en Reese Witherspoon með nærveru sinni hindrar að þetta sé algjör tímasóun. Eitt vefst þó fyrir mér, hvernig í veröldinni tókst einkaspæjaranum að hafa uppi á móður hundsins.......?

Legally blonde er leiðinlegasta mynd sem ég hef séð. Ég féll næstum því í grát við að horfa á þessi þvílíku leiðindi og ég hef aldrei verið jafn þundlyndur og á þessari mynd. Mér fannst eins og mér væri refsað fyrir eitthvað þegar ég sat undir þessari skelfingu. Sjálfsálit mitt hefur lækkað um helming þegar ég hugsa um að ég borgaði mig sjálfviljugur inn á þessa mynd. Reese Witherspoon er ekki nógu sæt til að halda manni við efnið og ég mun aldrei aftur horfa á mynd með henni. Þessum einum og hálfa klukkutíma (sem mér fannst eins og eilífðin) næ ég ekki aftur en ég bið ykkur sem eruð að lesa þetta að forða ykkur á hlaupum og gera ekki sömu hræðilegu mistök og ég gerði. Klippingin sökkaði líka.

Legally Blonde 2 er því miður nokkuð slappari en fyrsta myndin og er helst því um að kenna að söguþráðurinn er nokkuð langsóttur (jafnvel fyrir þessa mynd) og aðalpersónan, Elle (Reese Witherspoon), er dálítið flatari karakter hér. Myndin er engan vegin handónýt, en því er samt ekki að leyna að hér um að ræða mynd sem nánast eingöngu stelpum getur þótt skemmtileg og saklausum mökum þeirra af gagnstæða kyninu sem kunna að vera dregnir með mun ekki finnast meira en þolanleg. Ég gæti ef til vill verið neikvæðari út í þessa mynd, en undirtónninn í báðum myndunum er að efla trú ungra kvenna á sjálfum sér þannig að fólkið sem gerði myndina er a.m.k. með hjartað á réttum stað. Ekki er ólíklegt að þriðja myndin muni líta dagsins ljós fyrr eða síðar og er hér einn nokkuð áhugaverður möguleiki gefin í skyn í tengslum við hvað sú mynd gæti fjallað um. Ég vona að sú mynd verði betri en þessi.

Ef það er einhver sem tekst að prýða upp skjáinn með sínum endalausa sjarma, þá er það Reese Witherspoon. Hún hefur óneitanlega útgeislun og svo einnig bros sem gerir það erfitt fyrir mann að gagnrýna mynd sem hún er í neikvæðislega - þangað til núna þ.e.a.s.Í fyrstu myndinni tókst henni að skapa óborganlegan karakter, í raun var það svo skemmtileg persóna að maður gat ekki annað en brosað út alla myndina, þannig að maður hætti eiginlega að spá í allri klisjunni í henni. En eins og ég gaf í skyn, það var áður... Nú er komið að framhaldinu, og ég verð bara því miður að segja að það sé bara hryllilega slappt. Þetta er það sem má kalla tilvalið dæmi um lélega endurvinnslu. Söguþráðurinn er ekkert annað en afrit á fyrstu myndinni, og sömuleiðis formúlan, sem mér þótti vera nákvæmlega sú sama. Húmorinn er líka farinn að þreytast ansi mikið, og ferskleikinn sem var í honum áður er algjörlega fokinn út af kortinu. Svo er það auðvitað sjálf klisjan, og hún er svo sannarlega á sínum stað nema nú er enn líklegra að maður taki betur eftir henni. Auk þess tekur myndin sig á köflum fullalvarlega - og vinnur meira í því að koma sú hugmynd á framfæri að ein manneskja geti breytt heiminum með viljanum einum - í stað þess að leggja áhersluna á gamanið. En Reese sér nú til þess að myndin fari ekki alveg á ruslahauginn. Hún er alveg jafn skemmtileg og áður, en nær samt einhvern veginn ekki alveg að bjarga sér út alla myndina meðan allir þessir ofarnefndu gallar eru staðsettir. Svo finnst mér hálf furðulegt að persóna hennar skuli ganga í gegnum nákvæmlega sömu breytingar og áður. Í fyrri myndinni var hún ofvaxin barbídúkka sem breyttist í þroskaðan lögfræðing. Í byrjun þessarar myndar er hún í nákvæmlega sömu sporum og gegnur þar af leiðandi í gegnum sömu þróun. Fáránlegt. Þau sem dýrkuðu fyrri myndina og vilja sjá enn meira af því sama - og sjá það ekki sem slæman hlut - ættu umsvifalaust að skella sér á þessa, meðan hinum væri ráðlagt að bíða eftir myndbandinu, sem væri vafalaust töluvert skynsamara. Annars myndi ég almennt ráðleggja fólki að segja pass á þessa.4/10

Legally Blonde 2 er skemmtileg mynd um ljósku. Hún vinnur á lögfræðingastofu svo kemur það fyrir að hún verður rekinn.

Þá ákveður hún að giftast kærasta sínum og þá byrjar myndinn. Hún ákveður að bjóða mömmu hundsins síns í brúðkaupsveislunna og lætur leita hana upp. Þá kemst Elli af því að mamma hans er tilrauna dýr fyrir snyrtivörur. Þá ákveður hún að fara til Wasington að reyna frelsa öll tilraunadýrinn og gengur það ekki mjög vel en á endanum tekst henni að sigra.

Legally Blonde er miklu betri en Legally Blonde 2 en eru þetta báðar myndir sem allir verða að sjá.


Þess vegna fyrir góðan leik og söguþráð gef ég Legally Blonde 2 Fjórara stjörnur