Ævintýramyndin Indiana Jones and the Dial of Destiny kom sá og sigraði á íslenska bíóaðsóknarlistanum um síðustu helgi, en margir höfðu beðið spenntir eftir að upplifa ný ævintýri hetjunnar á hvíta tjaldinu.
Kvikmyndir.is sá myndina einmitt um helgina og mælir eindregið með henni.
Myndin byrjar með æsilegum eltingarleik í fortíðinni þegar Jones er enn ungur og í fullu fjöri. Leikar færast svo fram í tímann þegar hetjan er orðin roskin en þó ekki dauð úr öllum æðum.
Þegar líður á myndina eykst spennan og fjörið með sannarlega óvæntum vinkli í lokin. Helgigripurinn sem Indiana Jones vill koma höndum yfir, og býr yfir óvæntum og stórkostlegum eiginleikum, var búinn til af sjálfum Arkímedes frá Sýrakúsu (287 f.Kr. — 212 f.Kr.) grískum stærðfræðingi, stjarnfræðingi, heimspeking, eðlisfræðingi og vélfræðingi. Hann er oft talinn með mestu stærðfræðingum allra tíma.
Vondi kallinn er fyrrum nasisti sem hyggur á heimsyfirráð.
Elemental niður um eitt
Í öðru sæti listans er toppmynd síðustu viku, teiknimyndin Elemental og í því þriðja situr köngulóarmaðurinn í Spider-Man: Across the Spider-verse.
Nýja myndin Ruby Gillman, Teenage Kraken, teiknimynd sem fjallar um táningssæskrímsli, fór beint í fimmta sæti listans.
Sjáðu listann í heild sinni hér fyrir neðan:
