Hvað er raunverulegt?

Loksins, loksins, loksins er komið að frumsýningu nýrrar Matrix kvikmyndar, The Matrix Resurrections. Myndin er sú fjórða í bálkinum sem hófst með svo eftirminnilegum hætti árið 1999 með fyrstu myndinni, The Matrix, eða Fylkinu, eins og hún heitir á íslensku. Sú mynd fjallaði um tölvuhakkarann Neo sem bauðst að velja á milli rauðrar og blárrar pillu, á milli raunveruleika eða blekkingar.

Myndin er eina nýja myndin sem kemur í bíó í dag, en fleiri Jólamyndir bætast í hópinn á annan í Jólum, Sing 2 og West Side Story. Meira um þær síðar.

Eins og fram kemur í opinberum söguþræði myndarinnar er hér snúið aftur til tveggja raunveruleika: annars sem er daglegt líf, og hins, sem er handan þess. Til að komast að því hvort að hans raunveruleiki er hugarsmíð þarf Mr. Anderson ( Neo) að elta hvítu kanínuna rétt einu sinni enn.

Vissirðu að?

Upphaflega var rætt við Hugo Weaving um að snúa aftur í hlutverki Agent Smith, en hann þurfti að hafna því vegna annarra verkefna.

Samkvæmt leikstjóranum Lana Wachowski þá var hugmynd hennar um að fá Neo og Trinity saman í myndina innblásin af dauða beggja foreldra hennar ( sem dóu með fimm vikna millibili) og náins vinar. Handritaskrifin voru leið hennar til að sætta sig við fráhvarf þessara aðila. Hún skilgreinir Neo og Trinity einnig sem tvær mikilvægustu persónur í lífi sínu. En fyrir Lilly Wachowski þá var missir foreldranna hluti af ákvörðun hennar um að snúa ekki aftur í myndina.

Framleiðsla kvikmyndarinnar hófst 4. febrúar árið 2020 í San Fransisco undir vinnuheitinu Project Ice Cream.

Þetta er fyrsta Matrix myndin sem tekin er upp stafrænt. Hinar þrjár voru teknar upp á super 35 millimetra filmu.

Lagið í fyrstu stiklu myndarinnar, White Rabbit með Jefferson Airplane, var innblásið af Lísu í Undralandi eftir Lewis Carroll. Í fyrstu Matrix myndinni frá 1999 eru margar tilvísanir í Lísu í Undralandi.

Myndin er 148 mínútur og verður lengsta Matrix myndin í seríunni.

Keanu Reeves, Carrie-Anne Moss, Jada Pinkett Smith, Daniel Bernhardt og Lambert Wilson eru einu leikararnir sem snúa aftur úr fyrri myndum.