Double Jeopardy (1999)

Kvikmyndin "Double Jeopardy" er ein af vinsælustu myndum ársins 1999, en hún halaði inn meira en 116 milljónir dollara þegar hún var sýnd í bandarískum kvikmyndahúsum. Hér er um að ræða dúndurgóða spennumynd sem er leikstýrð af meistaraleikstjóranum Bruce Beresford (gerði óskarsverðlaunamyndina "Driving Miss Daisy") og í aðalhlutverkum eru óskarsverðlaunaleikarinn Tommy Lee Jones (The Fugitive) og Ashley Judd (Kiss the Girls). Libby Parson (Judd) veit ekki betur en að hún sé í hamingjuríku hjónabandi með eiginmanni sínum Nick (Brucee Greenwood) en þau eiga einn son saman. Dag einn umturnast veröld hennar þegar hún er handtekin, grunuð um að hafa myrt Nick með hrottalegum hætti. Öll sönnunargögn benda til sektar hennar og svo fer að hún er dæmd í fangelsi fyrir morð sem hún framdi ekki. Sex ár líða og að því kemur að Libby er látin laus á ströngu skilorði. Í huga hennar kemst þó fátt annað að en að finna Nick, enda er hún sannfærð um að hann hafi sviðsett dauða sinn á sínum tíma og hún er staðráðin í að endurheimta son sinn úr höndum hans. Vandamálið er að hún getur sig hvergi hreyft nema brjóta skilorðið og eiga það á hættu að þurfa að afplána restina af dóminum sem hún hlaut. Sá sem á að hafa eftirlit með Libby, skilorðsfulltrúinn Travis Lehman (Jones), er ekki par hrifinn af áformum hennar og ekki eykst sú hrifning þegar hún ákveður að fara sínu fram og stingur af úr bænum. Þar með er hafinn æsilegur eltingarleikur þar sem Libby er í raun bæði í hlutverki kattarins og músarinnar, annars vegar staðráðin í að hafa uppi á Nick og komast að því út af hverju hann gerði það sem hann gerði og hins vegar með hinn ákveðna og óþreytandi Travis Lehman á hælunum! Ágæt spennumynd sem stendur og fellur með traustu handriti og góðum leik þeirra Ashley Judd og Tommy Lee Jones, en þau fara hér hreinlega á kostum. Ég get því ekki annað en að mæla eindregið með "Double Jeopardy" og hvet alla að drífa sig á næstu leigu til að kynna sér hana og sjá hana!! Góð mynd með afar óvæntum endi. Ekki missa af þessum hörkugóða spennutrylli

Stórgóð kvikmynd þar sem Ashley Judd og Tommy Lee Jones fara með aðalhlutverkin. Ashley leikur Libby Parsons sem er telur sig lifa í hamingjusömu hjónabandi, en það á eftir að breytast fljótt. Eiginmaðurinn hennar Nick sem leikinn er af Bruce Greenwood sviðsetur sitt eigið morð og kemur henni á bak við lás og slá og sleppur með sína eigin líftryggingu. Síðar kemst hún að því hvað hefur gerst og þegar hún losnar út reynir hún að hafa upp á honum til að ná hefndum þar sem ekki er hægt að dæma hana fyrir morð í annað skiptið. Frumleg, spennandi og alls ekki lík the Fugitive - Óvæntur endir.

Það fer ótrúlega í taugarnar á mér þegar auglýsingatrailer segir manni allt um myndina og skilur lítið af óvæntum atriðum eftir, en þetta er einmitt tilfellið með Double Jeopardy. Eftir að hafa séð þennan þriggja mínútna trailer gat ég getið mér rétt til um hvernig endir myndarinnar mundi verða ásamt því að sjá mest spennandi atriðin koma úr mílu fjarlægð. Til þess að rétt minnast á söguþráðinn þá segir myndin frá konu nokkurri að nafni Libby Parsons (Ashley Judd) sem telur sig vera hamningjusamlega gifta. Einn daginn fer hún í siglingu með eiginmanni sínum og vaknar upp þakin blóði og allt lítur út fyrir að hún hafi myrt eiginmann sinn og lík hans hafi endað í sjónum. Þessu trúir að minnsta kosti kviðdómurinn því að Libby er fundin sek og dæmd til fangelsisvistar. Það sem Libby finnst sárast við að fara í fangelsi er að vera í burtu frá syni sínum, en hún bað bestu vinkonu sína að ættleiða hann áður en hún fór í steininn. Það gerist síðan að vinkonan og sonurinn virðast hverfa og í kjölfar þess kemur ýmislegt í ljós sem bendir til þess að Libby sé fórnarlamb samsæris. Eftir 6 ár losnar hún úr fangelsinu og hefur leit að syni sínum og sannleikanum. Þessi kvikmynd verður seint sökuð um að vera frumleg en hún er samt ekki eins óhugnalega lík The Fugitive og trailerinn gefur til kynna. Tommy Lee Jones er til dæmis ekki í mjög líku hlutverki og í þeirri mynd. Þetta er ágætis afþreying en það eru samt nokkur fáránleg atriði í myndinni sem verða ekki útskýrð með rökrænni hugsun. Ágætis spenna myndast á staka stað en það mætti þó hafa verið oftar. Ashley Judd er mjög viðkunnaleg leikkona og nær í það minnsta að halda broti af athygli karlkynsáhorfenda. Hún reynir að gera besta úr gölluðu hlutverki. Tommy Lee Jones er bara eins og hann er vanur og sýnir engin snilldartilþrif. Yfir heildina litið er þetta þokkaleg spennumynd en reyndar góðum skammti af væmni. Þetta var ein vinsælasta myndin í Bandaríkjunum í fyrra og það sannar enn einu sinni að bandaríska miðasalan er ekki marktækur mælir á gæði kvikmynda.