Stigmata (1999)

Ákaflega skemmtileg áhorfunar og inniheldur margt flott; brilljant klippingar og tökur og flottar tæknibrellur. Þó svo handritið sé alvarlega götótt fyrirgefst það vegna þess hvað Patricia Arquette er sæt. Reyndar á hún að vera 23 ára í myndinni og er ekki mjög sannfærandi sem slík, enda komin eitthvað yfir þrítugt. Fjallar í stuttu máli um hárgreiðslukonu sem fær píslarsár eftir að hafa fengið róðukross í pósti, en krossinn hafði verið í eigu prests í S-Ameríku. Myndin ruglar á leiðinlegan hátt saman kaþólskri trú, spíritisma og göldrum og lætur kaþólska presta líta út sem sambland af seiðkörlum og prestum. En hún er bara svo bráðskemmtileg og kom svo vel á óvart að ég splæsi hálfri þriðju stjörnu.

Kvikmyndin "Stigmata" er kyngimagnaður, dulrænn spennuhrollur sem má alls ekki fara fram hjá neinum sem slíkar myndir kunna að meta. Sagan kemur verulega á óvart og inniheldur einkar magnaða fléttu sem ekki leysist úr læðingi fyrr en alveg í blálokin þegar púsluspilið fellur saman í heildstæða og órjúfandi mynd. Segja má að efni myndarinnar standi einhvers staðar mitt á milli úrvalsmyndanna "The Sixth Sense" og "The Exorcist"! Frankie Page er þrítug hárgreiðslukona í Pittsburgh, frjáls, óháð og ósköp venjuleg, ekki ólík þúsundum annarra kvenna sem búa í borginni. Og hún er ekki mjög trúuð þótt opinberlega sé hún kristin. En áhyggjulausu lífi Frankie er kollvarpað þegar óútskýranlegir hlutir taka að henda hana, hlutir sem virðast við fyrstu sýn vera yfirnáttúrulegir. Á meðal þess eru blæðingar úr sárum sem myndast á líkama hennar, nákvæmlega þar sem sár Jesú á krossinum voru. Andrew Kiernan er prestur í Vatíkaninu sem hefur það starf með höndum að ferðast um heiminn og kanna (og oftast afsanna) sögur um kraftaverk. Þegar fréttirnar um það sem hent hefur Frankie berast honum til eyrna ákveður hann að kanna málið frá fyrstu hendi. Smám saman verður honum og fleiri aðilum innan kirkjunnar ljóst að Frankie er einhvers konar sendiboði æðri máttarvalda og flytur skilaboð sem gætu hæglega kippt öllum stoðum undan kristinni trú. Og á meðan sumir sannfærast um að þagga verði niður í Frankie, reynir Kiernan af öllum sínum mætti að vernda hana og boðin sem hún flytur. Hið góða og hið illa hefur aldrei háð jafn hatramma baráttu! Í aðalhlutverkum í myndinni eru þau Patricia Arquette, Gabriel Byrne, Jonathan Pryce, Nia Long, Patrick Muldoon og Portia de Rossi, en leikstjóri hennar er bretinn Rupert Wainwright. "Stigmata" er að mörgu leyti einstakt kvikmyndaverk og hvet ég alla kvikmyndaunnendur að láta henni ekki fram hjá sér fara. Hún kom mér verulega á óvart. Hún stóðst væntingar og gott betur en það. Ég mæli eindregið með henni við alla þá sem hafa yndi á vönduðum og vel gerðum spennuhrollvekjum

Oj bara, eyddi ég virkilega tveimur klukkutímum af lífi mínu í þessa hörmung? Ég hélt að ég væri að fara að horfa á fína hryllingsmynd með bregðuatriðum og svoleiðis, en nei, þetta er hundleiðinleg della með götóttum söguþræði, leiðinlegum leikurum sem leika leiðinlegar persónur og það er enginn tilgangur með þessu veseni. Eftir tíu mínútur var ég farin að ókyrrast og eftir hálftíma óskaði ég þess að hafa frekar verið heima að læra danskar sagnir, málfræði og jöfnur. Svo leiðinleg er þessi ömurlega mynd sem er í mínum augum hreinasta slys.:(

Þegar ég keypti miða á Stigmata bjóst ég við að vera að kaupa mig inn á einhverja ódýra B-hryllingsmynd en raunin varð allt önnur. Stigmata er í raun ádeila á þá stefnu sem kaþólsk kirkja hefur haldið til streytu gegnum aldirnar. Þessi harði boðskapur fer vel við listilega útfærð hryllingsatriði sem fá hárin til að rísa. Myndin er ákaflega dimm og flott í alla staði auk þess sem tæknibrellur eru til fyrirmyndar.

Ansi traustur yfirnáttúrulegur spennutryllir sem segir frá ungri konu að nafni Frankie Paige (Patricia Arquette) sem fer á dularfullan hátt að þjást af ofskynjunum ásamt því að fá píslarsár (sárin sem eiga að hafa orðið Jesú að bana þegar hann var krossfestur). Þegar Vatíkanið fréttir af þessu er rannsóknarmaðurinn Andrew sendur til þess að kanna málið en hann er eins konar blanda af presti og vísindamanni sem ferðast um heiminn til þess að rannsaka kraftaverk og oftar en ekki afsanna þau. Eftir fyrri hluta sem var í meðallagi kom myndin mér á óvart eftir hlé með nokkrum ansi spennandi og ógnvekjandi atriðum. Þegar púsluspilið fór að smella saman og maður sá heildarmyndina skildi maður að söguþráðurinn er byggður á áhugaverðri hugmynd sem er vel útfærð. Gabriel Byrne sýnir mestu leiktilþrifin en Arquette er líka ágæt þó hún verði seint sökuð um að sýna stórleik hér. Tónlist Billy Corgan gefur myndinni sérstakt yfirbragð en aftur á móti fannst mér klippingunni vera ábótavant á köflum þar sem myndin virtist einhvern veginn ekki flæða alveg nógu vel á köflum, ýmist of hratt eða hægt. En þetta er samt fínasta þriggja stjörnu afþreying.