Idle Hands (1999)

Ég get ekki að því gert... mér finnst þessi mynd bara snilld. Djöfullinn (eða illur andi) leitar hýsils fyrir hönd sína -hann þarf að vera hámarks iðjuleysingi og sinnuleysingi. -Og djöfsi var svo heppinn að finna táningsdreng sem stóðst allar kröfurnar... Og hefst þá mikil sálfræðileg og hryllileg saga dengsa sem uppgötvar með látum að hver er sinnar gæfu smiður... Svo mikið kjaftæði... en bara svo skemmtilegt að horfa á það... Ég hló mjög mikið og það sást greinilega að leikararnir skemmtu sér konunglega í sínum skondnu hlutverkum. Prýðilegt handrit, tónlist og leikur. Ef þið hafið snefil af kaldhæðnum húmor kíkið þá endilega á Idle Hands -hún kemur manni allavega í gott skap á leiðinlegu rigningarkvöldi.

Anton (Devon Sawa) er ofurlatur hasshaus sem hangir með hinum tveimur ofurlötu hasshausavinum sínum, Mick og Pnub (Seth Green og Elden Ratliff) reykir marijúana, glápir á sjónvarpið og lætur sig dreyma um stelpu að nafni Molly (Jessica Alba) í skólanum sem semur sína eigin lagatexta og keyrir um á vespu. Anton er svo sljór og latur að hann hefur ennþá ekki áttað sig á því að foreldrar hans eru dánir. Hafa þeir verið myrtir á hrottalegan hátt af hendi sem er andsetin af djöflinum og hefur í hyggju að setjast að í Anton og halda síðan áfram að myrða alla sem hún sér. Loksins þegar Anton fattar að foreldrar hans eru dánir er það einum of seint þar sem höndin er búin að taka sér bólfestu í honum (nánar tiltekið hans hægri hönd) og þeir fyrstu sem deyja eru þeir Mick og Pnub, vinir Antons (deyja þeir einnig á ansi hrottalegan hátt). En þeir snúa engu að síður aftur sem uppvakningar til þess að geta djammað áfram. Anton verður nú að finna ráð til þess að stöðva hendina og bjarga Molly sem er næsta fórnarlamb handarinnar. Það er ekki til ein einasta frumlega mínúta í þessari mynd. Morðhendi hefur verið gert ótal sinnum áður og hefur víst aldrei tekist vel upp. Fyrr en núna. Leikstjóri myndarinnar, Rodman Flender veit að þetta er hallærislegt kjaftæði og gerir hann þess vegna myndina hálfpartin að dellugamanmynd. Það var einmitt það sem átti að gera og tekst hún mjög vel upp aðallega sem sprenghlægileg gamanmynd og líka er hún allt í lagi sem afar blóðug hryllingsmynd. Handritið er svosem ekki upp á marga fiska en myndin er keyrð töluvert áfram svo að maður fyrirgefur henni t.d. nánast enga persónusköpun og meira i þeim dúr. Myndin er ein af þeim blóðugustu sem hafa komið í langan tíma, t.d. er hún mun blóðugri en Scream en það er allt gert í léttari kantinum svo að hún verður aldrei neitt sérstaklega hryllileg. Enda er hún aðallega ágætis gamanmynd. Devon Sawa sem leikur Anton er allt í lagi svo langt sem það nær en bestir eru þeir Seth Green og Elden Ratliff sem hálfvitarnir vinir hans. Jessica Alba er svaka skutla en óttalega litlaus. Í heildina litið er þetta hið prýðilegasta léttmeti og della og er fínt að skella sér á hana eftir erfiðan og kannski leiðinlegan dag.

Þetta er alveg skelfileg vitleysa. Þeir sem hafa gaman af þessari mynd eru unglingar, en hún er eiginlega of ógeðsleg fyrir þá. Hún fær hálfa stjörnu fyrir snyrtilegar tæknibrellur. Leikur er hér á frekar lágu plani...

Ansi lunkin mynd sem fellur engan veginn inn í þennan leiðindahóp sem unglingahrollvekjur eru orðnar. Jennifer Love Hewitt og brjóstin hennar eyðilögðu þann flokk, og eru sem betur fer fjarri góðu gamni hér. Devon Sawa leikur Anton, sem er sennilega einhver mesti letihaugur kvikmyndasögunnar. Einn daginn uppgötvar hann að foreldrar hans hafa verið myrtir á allhrottalegan hátt, en samt ekki fyrr en hann er búinn að hanga í sófanum og reykja smá hass. Drengurinn er sem sagt algjör aumingi. En viti menn, gott ef hann er ekki sjálfur morðinginn; eða reyndar hægri höndin hans sem er allt í einu andsetin morðóðum ærsladraugi (eða eitthvað...). Hann byrjar að hakka niður vini og löggur en gerir allt sem hann getur til að væntanleg kærasta fari ekki sömu leið. Idle Hands tekur sjálfa sig sem betur fer ekki alvarlega á neinn hátt, allir hlutaðeigandi virðast átta sig á að þeir ættu bara að skemmta sér og reyna að skemmta öðrum í leiðinni. Og það tekst vel. Það má eiginlega segja að allar myndir sem Seth Green leikur í geti ekki verið lélegar, maðurinn er ekkert smá fyndinn, sama hvort hann er að leika Scott Evil eða rúmlega dauðan besta vininn hér. Elden Henson nýtur sín vel með hausinn í kjöltunni og Vivica Fox tekur fáránlegt hlutverk og framkvæmir það með réttum skammti af gríni og Alien-kvenhörku. Fínasta skemmtun; ég myndi a.m.k. frekar sjá þessa aftur en að þurfa að sjá Urban Legend 2.

Sem grínmynd virkar Idle Hands fullkomlega; ég fór á hana haldandi að þetta væri jafn ömurleg mynd og Urban Legend, en eftir fyrri helminginn varð ég að viðurkenna að ég skemmti mér bara mjög vel. Þrátt fyrir það er þetta mynd sem maður vill sjá bara einu sinni, því að ef maður sér hana oftar þá mun hún líklegast verða verri fyrir vikið, en samt sem áður er þetta hin besta afþreying og skemmtilegt hliðarspor frá "alvarlegu" slasher myndunum...

Frekar slöpp blanda af hrylling og gríni sem fjallar um latan hasshaus sem kemst að því einn daginn að önnur hendin hans er setin illum anda. Höndin tekur upp á því að drepa flesta sem hann hittir og einhvernveginn verður hann að leysa það leiðinda vandamál. Það segir mikið um gæði myndarinnar að það er aldrei einu sinni reynt að útskýra hvernig eða af hverju höndin varð andsetin. Annars er það sem helst heldur manni vakandi hversu ógeðsleg myndin er, það er ekkert verið að spara blóðið. Þó nokkuð af "bregðuatriðum" eru í henni en virka öll mjög innantóm. Húmorinn er sennilega eitt það besta við myndina en bestu brandarana var ég þegar búinn að sjá í auglýsingum. Það er vel hugsanlegt að unglingar sem ekki eru kröfuharðir geti skemmt sér ágætlega yfir henni en öðrum ráðlegg ég að forðast hana.