Á síðasta ári fór framleiðslufyrirtækið Republik af stað með dagskrárdeild innan fyrirtækisins. Mörg verkefni hafa nú þegar litið dagsins ljós og fleiri eru í vinnslu um þessar mundir, að því er fram kemur í frétt frá fyrirtækinu.
Á síðasta ári var heimildamyndin um Fjallabræður í Abbey Road frumsýnd í Háskólabíói og á RÚV, og í vor var það myndin Spólað yfir hafið sem sýnd var í Bíó paradís. Spólað yfir hafið verður sýnd á RÚV í byrjun október næstkomandi. Allar myndir sem framleiddar hafa verið hjá Republik hafa farið í afþreyingarkerfi Icelandair.
Hér fyrir neðan eru nokkur verkefni sem eru í vinnslu hjá félaginu:
Bó segir gó
Bó Hall þekkja allir. En í það eru ekki margir sem þekkja persónuna Björgvin Halldórsson. Í nýrri heimildamynd um þennan farsælasta söngvara þjóðarinnar fær fólk að kynnast persónunni á bak við nafnið í tveimur þáttum. Umsjón með verkefninu hafa reynsluboltarnir Jón Þór Hannesson og Ágúst Guðmundsson. Myndin er vel á veg kominn og verður sýnd á RÚV áður en langt um líður.
Jólasveinar einn og átta
Jólin koma á hverju ári, og fyrr en maður heldur. Andri Freyr Viðarsson veit það, og frá síðustu jólum hefur hann unnið að sjónvarpsþáttum fyrir börn á öllum aldri, sem sýndir verða í sjónvarpi í desember. Í þáttunum fáum við að skyggnast á bak við tjöldin hjá aðstoðarmönnum jólasveinanna.
Aðstoðarmenn Jólasveinanna er fólk sem á það sameiginlegt að vera með jólahjartað á réttum stað. Hvort sem fólkið aðstoðar jólasveininn með að leika hann þegar hann kemst ekki, eða að kenna fólki að föndra. Halda jólaböll eða að bera út jólakort. Blóðið í þessum jólabörnum er jólarautt. Þættirnir verða 13 talsins. Nema hvað?
Retro Stefson kveður
Síðastliðið vor hélt hljómsveitin Retro Stefson sína síðustu tónleika. Republik var falið það skemmtilega verkefni að gera heimildamynd um viðburðinn og kvikmyndaði allt frá aðdraganda tónleikanna, til síðasta lags. Meðlimir sveitarinnar er skemmtilegt fólk sem lét ljós sitt skína á á öllum stundum, og útkoman er frábær. Skemmtileg og góð heimild um þessa áhugaverðu sveit, sem margir munu sakna úr íslenskri tónlistarflóru. Myndin verður sýnd á RÚV í desember næst komandi.
Grúskarinn
Sigurður Pálmason er nafn sem margir kannast við. Flestir sem muna efir honum sem litla dreng Pálma Gunnarssonar sem söng jólalög svo fallega fyrir nokkrum áratugum. Það sem færri vita er að Sigurður er grúskari mikill og býr yfir mikilli vitneskju um sögu hluta og staða á Íslandi. Í 8 þáttum sem Republik framleiðir fyrir RÚV, sláumst við í för með Sigga sem fer um víðan völl og kynnir fyrir fólki sögur um áhugaverða staði og minjar um allt land. Þættirnir Grúskarinn verða á dagskrá RÚV í byrjun árs 2019.
Spólað yfir hafið tilnefnd á ökutækjakvikmyndahátíð
Heimildamyndin Spólað yfir hafið sem frumsýnd var í vetur í Bíó Paradís, var á dögunum tilnefnd sem ein af bestu myndunum á London Motor Film Festival. Sú hátíð er sérsniðin að myndum sem fjalla á einhvern hátt um ökutæki af öllum stærðum og gerðum.