The Gift (2000)

Ágætlega heppnuð hrollvekja, þó ekki sé frumleikinn allt að kæfa. Góðir leikarar lyfta ræmunni talsvert upp úr meðalmenskunni, sérstaklega Keanu Reeves, sem nær því að teljast einn alógeðfelldasti karakter kvikmyndasögunnar síðan Orson Welles lék í Touch of Evil 1958.

Annie Wilson (Cate Blanchett) er ekkja með þrjá syni í smábæ einhvers staðar í suðurríkjum Bandaríkjanna. Maðurinn hennar dó í slysi og hún hefur lifibrauð sitt af félagsmálayfirvöldum og að spá fyrir fólki. Annie er skyggn. Hún hefur verið það alveg frá því hún var lítil stelpa. Margt fólk í bænum trúir á skyggnigáfu hennar og þar á meðal er Valerie Barksdale (Hilary Swank) en hún er gift ofbeldismanninum Donnie (Keanu Reeves) sem er ekkert um það gefið að Annie sé að menga hana "með einhverjum nornabrögðum". Hann ógnar bæði Annie og strákunum hennar en hún getur ekki að gert. Annie er einnig að reyna að hjálpa bifvélavirkjanum Buddy Cole (Giovanni Ribisi) sem er alvarlega veikur á geði út af einhverju atviki sem henti hann þegar hann var lítill. En dag einn birtist frétt í blöðunum um að ung kona, Jessica King (Katie Holmes) sé horfin. Hún var u.þ.b. að fara að giftast skólastjóra bæjarins, Wayne Collins (Greg Kinnear). Böndin berast að Donnie Barksdale en Annie er ekki viss í sinni sök og ákveður með dulrænum hæfileikum sínum að grennslast sjálf til um málið. Síðast þegar Sam Raimi og Billy Bob Thornton unnu saman gerðu þeir A Simple Plan sem Raimi leikstýrði og Billy Bob lék í. Núna er Raimi aftur leikstjórinn en Thornton er handritshöfundur ásamt Tom Epperson. Mér líkar virkilega vel við myndina framan af. Eins og allar góðar hryllingsmyndir tekur hún sinn tíma í að byggja upp spennu, flækir málin óendanlega og ræðst síðan til atlögu. En slæmt að það skuli allt fara til fjandans út af afskaplega asnalegum endi. Hann virkar ekki líklegur og er allur hálf klaufalegur. Meira má ég nú víst ekki segja um svona týpur af myndum. Það sem skilar sér hér eru frammistöður leikaranna. Mér finnst virkilega gaman að sjá Keanu Reeves í hlutverki þessa brjálaða "redneck". (Afsakið slangrið). Það er mikilvægt fyrir leikara að breyta til og Reeves er öflugur og sannfærandi á skjánum. Ribisi stendur sig frábærlega sem virkilega hugsjúkur maður og það er í rauninni athyglisverð og ákaflega sorgleg hliðarsaga í myndinni. En á toppnum trónir hin magnaða Cate Blanchett með þrælsterka frammistöðu hér alveg eins og í Elizabeth sem hún í raun hefði átt að fá Óskarinn fyrir. Hún er virkilega sannfærandi og með frábæran hreim miðað við að hún kemur frá Ástralíu. Þetta er ágætis spennuhrollur með góðum fyrri hluta, frábærum leik og flottri myndatöku en nánast sekkur í seinni hálfleik. Samt góð tilraun.

Þetta er mjög spúki mynd frá Sam Raimi (spider-man,evil dead og Darkman)í anda sixth sence og what lies beneath.

Þetta er um konu sem er skygn og vinnnur sér inn pening með því að spá fyrir fólk og í eitt skiptið sér hún dauða konu og viti menn konan sem hún sá dauð fynnst dauð stuttu eftir sýnina

og svo fjallar myndin um það hver drap konuna.

Þetta er mjög góð spennumynd sem ég mælieindregið með.

Ég hef sagt það oft áður en verð að segja það aftur: Sam Raimi er snillingur! Þetta nýja átrúnaðargoð mitt sýnir það og sannar með hverri mynd sinni að hann er algjör snillingur og þó The Gift sé fjarri því að vera hans besta mynd er hún samt sem áður gott dæmi um þessa hröðu þróun Raimis í átt að því að vera fullkominn leikstjóri. Í The Gift leikstýrir hann eftir handriti Billy Bob Thornton en saman unnu þeir við myndina A Simple Plan, sem var einnig alveg frábærlega yndislegt meistaraverk. Thornton byggir handrit sitt, eða aðalpersónu þess, á móður sinni sem var skyggn og leikur Cate Blanchett þessa konu, Annie. Annie er fengin til að hjálpa við rannsókn á dularfullu mannshvarfi og hefst þá skelfilega ógnvekjandi og dularfull atburðarrás... Raimi er þekktur fyrir ótrúlegar kvikmyndatökur og kraftmiklar myndir. Upp á síðkastið hefur hann þó haldið aðeins aftur af sér, kannski til þess að öðlast meiri virðingu í Hollywood, en í The Gift má þó sjá leifar af hinni þekktu "crazy-cam" sem hann skapaði og ýmisleg ummerki hans sem m.a. þeir Coen bræður hafa tileinkað sér. Raimi fer einnig þá óhefðbundnu leið (þ.e. nú til dags) að byggja upp einhverja spennu áður en hann kastar á okkur bregðuatriði, eitthvað sem ég held ég hafi ekki séð í svona spennumynd síðan What Lies Beneath. Myndin er þó allt öðruvísi en What Lies Beneath þar sem hún er mun dekkri og drungalegri og ekki að velta sér upp úr jafnmörgum subplottum. The Gift er frekar einföld mynd þannig séð en leggur þá mun meiri áherslu á persónurnar svo að okkur stendur ekki á sama um afdrif þeirra í lokin. Og talandi um lokin: þau voru það sem ég var mest óánægður með fyrstu mínúturnar eftir að myndinni lauk, en eftir því sem ég hugsa meira um endinn, því ánægðari verð ég með hann. Af leikurunum má segja að allir standi sig mjög vel. Cate Blanchett er á góðri leið með að verða ein besta leikkonan í Hollywood í dag og er frábær hérna eins og venjulega. Giovanni Ribisi, sá venjulega óþolandi hálfviti, er einnig mjög góður og það sama má segja um Keanu Reeves sem kemur manni mjög mikið á óvart. Hillary Swank og Katie Holmes (!) standa sig líka vel í minni hlutverkum. Sam Raimi hefur með The Gift tekist að gera eina bestu spennumynd ársins (til þessa) og mæli ég eindregið með henni.

Það má með sanni segja að The Gift hafi verið óvæntur glaðningur. Ekki get ég sagt að ég hafi haft stórkostlegar væntingar til þessarar myndar þar sem tiltölulega lítið hefur farið fyrir henni vestan hafs en það kemur í ljós að þetta er ein besta hrollvekja (eða yfirnáttúrlegi spennutryllir) sem komið hefur út í langan tíma. Hún fjallar um konu nokkra sem býr í smábæ og má segja að sé skyggn. Hún fer að sjá óhugnalegar sýnir sem tengjast morðmáli og þetta hrindir af stað spennuþrunginni atburðarás. Styrkleikar myndarinnar liggja á helst í því að öll hlutverk eru frábærlega vel leikin og persónurnar jafnframt trúverðugar og vel skrifaðar. Það er dálítið skondið að hugsa til þess að Keanu Reeves er líklega að skila bestu leikframmistöðu sinni til þessa hérna í aukahlutverki sem ofbeldishneigður sveitalubbi. Svo virðist vera sem leikarinn Billy Bob Thornton hafi líka góð tök á pennanum, því hann skrifaði handrit myndarinnar. Á köflum verður myndin verulega óhugnaleg og ég man satt að segja ekki eftir því að hafa fengið svona gæsahúð í bíó síðan ég sá Event Horizon fyrir nokkrum árum. Leikstjórn Sam Raimi er traust og það er ljós að hann hefur sjaldan eða aldrei staðið sig betur. The Gift er í stuttu máli einstaklega vel og fær sterk meðmæli frá mér. Svo sakar heldur ekki að Katie Holmes kemur fram "topless" í henni ;-)