Hasarleikarinn frá Hong Kong, Jackie Chan, mun fara með hlutverk í þriðju Expendables myndinni, Expendables 3. Þetta staðfesti leikarinn sjálfur á blaðamannafundi í Kuala Lumpur. „Sly [Sylvester Stallone] bauð mér að vera í Expendables 2 en ég var of upptekinn þá við að taka CZ12 og gat ekki skuldbundið mig til að leika í myndinni,“ sagði Chan á blaðamannafundi í Kuala Lumpur þar sem hann var að kynna nýjustu mynd sína Chinese Zodiac.
Það var malasíska kvikmyndasíðan Cinema Online sem hafði þetta eftir leikaranum. „En hann bauð mér í staðinn að vera í þriðju myndinni, sem ég samþykkti, með þeim skilyrðum að ég myndi koma fram í sæmilegu hlutverki, ekki minniháttar hlutverki þar sem ég léki bara í nokkrum senum,“ bætti Chan við.
Framleiðsla á Expendables 3 mun að öllum líkindum hefjast á næsta ári.