Burn After Reading (2008)

Leikarahópurinn bjargar því sem bjargað verður í þessari nýju Coen-bræðra mynd. Þeir bræður eru komnir á kunnuglegar slóðir eftir meistaraverkið No Country for Old Men í fyrra og reyna hér að endurnýta að einhverju leyti húmorinn úr Fargo og The Big Lebowski, en án mikils árangurs. Handritið er sérlega kjánalegt og flatt og brandararnir fáir, en bestu sprettina á þó Brad Pitt í frábæru hlutverki. John Malkovich fer með aðalhlutverkið, og gerir það vel, en myndin fer þokkalega af stað þegar segir frá brotthvarfi hans frá CIA og ákvörðun hans um að rita endurminningar sínar. Það fer þó fljótt að halla undan fæti þegar Frances McDormand, George Clooney og Pitt flækjast inn í málið. Allir eiga leikrararnir þó hrós skilið, enda frábærir hæfileikamenn og -konur þar á ferð, en án þeirra væri myndin hvorki fugl né fiskur.María Margrét Jóhannsdóttirkvikmyndir.com

Burn after Reading er nýjasta afurð Coen bræðra og bara ágætis skemmtun. Skrautlegir karakterar eru aðallega það sem heldur myndinni á floti en þar sem hún uppfyllir engar aðrar kröfur þá verður hún alls engin snilld. En leikurinn hér er barasta þvílíkt skemmtilegur og húmorinn er í flestum tilvikum alveg yndislegur(stundum er hann þó hrikalega þunnur). John Malkovich og Brad Pitt eru alveg stórgóðir í hlutverkum sínum og fast á hæla þeirra kemur Frances Mcdormand og samleikur þeirra er áhugaverðasti og besti partur myndarinnar. En annars þá býður Burn after Reading ekki upp á neitt stórbrotið, þó að hún sé stórskemmtileg þá vantar of margt til að hún fái hærri einkunn en tvær og hálfa stjörnu. Eitthvað endar hún líka snögglega. 7/10 í einkunn. Fín skemmtun en ekkert minnisstætt.

Það er alltaf ánægja að setjast niður og horfa á Coen-mynd. Maður getur einhvern veginn alltaf stólað á það að ekkert venjulegt bíó sé á ferðinni. Þeir Coen-bræður hafa líka alltaf verið háðir fjölbreytni, og kemur það ekki á óvart að þeir skildu bera fram kómíska mynd á borð við þessa eftir hina alvarlegu - en engu að síður frábæru - No Country for Old Men. Burn After Reading er ekki bara gamanmynd með svörtum húmor, heldur ekta grínfarsi þar sem að margar óviðkunnanlegar persónur lenda í kjánalegum og tilviljanakenndum aðstæðum. Myndin er algjör hrúga og eiginlega er enginn heilsteyptur söguþráður til staðar, en þessi sjúskaða atburðarás ásamt óborganlegu samspili leikarana er einmitt það sem að gerir þessa mynd svona nett skemmtilega.En þrátt fyrir að myndin gangi langt í vitleysunni og þá staðreynd að myndin sé á köflum bara hreinlega stefnulaus er maður alltaf í góðum höndum hjá Coen-bræðrum. Þeir spila skemmtilega með áhorfandann og undir lokin getur maður ekki annað en bara hlegið að öllu ruglinu. Svo er eitthvað svo gaman við það að horfa á stórstjörnur gera sig að algerum aulabárðum.George Clooney, Tilda Swinton og John Malkovich koma alveg ómótstæðilega vel út sem algjörir skíthælar. Þau spila vel með þessi hlutverk og virðast alltaf ná að halda uppi ákveðnum ferskleika, í stað þess að detta út í stereótýpur. Frances McDormand og Brad Pitt standa hins vegar upp úr. Þau eru bæði hálf hallærisleg en sakleysisleg á sama tíma, og Pitt á eflaust eitt besta augnablik ferils síns þegar að hann á í samskiptum við Malkovich. Myndin tekur sig aldrei neitt alvarlega, enda hefur hún enga ástæðu til þess. En þrátt fyrir nautheimsku hegðanir persónanna er handritið afar snjallt og vel unnið. Góður húmor er einnig til staðar, eins og yfirleitt fylgir myndum Coen-bræðra. Það eru nokkur frábær atriði hér að finna og fáein faktískt drepfyndin. Myndin er hins vegar ekkert sprenghlægileg frá upphafi til enda, en hún hefur þó þennan spes húmor sem bræðurnir eru þekktir fyrir, og þar af leiðandi helst maður brosandi út alla lengdina. Ef út í það er farið má eiginlega segja það sama um The Hudsucker Proxy, The Big Lebowski, Intolerable Cruelty (sem er án efa einhver vanmetnasta mynd bræðrana) og jafnvel Raising Arizona; Allt mjög skemmtilegar gamanmyndir sem að halda ákveðnum lágstemmdum húmor en ekkert neitt sem þú kafnar af hlátri yfir.Lokasena myndarinnar ein og sér setur punktinn yfir i-ið yfir það hversu óborganleg mynd þetta er og mér finnst hún tvímælalaust eiga skilið meðmæli. Hún missir örfá stig fyrir pínu hæga keyrslu í byrjuninni og fyrir að uppljóstra ekki lokaörlög einnar tiltekinnar persónu (segi ekki hver - þið hljótið að fatta), en ef að þú ert mikill aðdáandi Coen-gamanmynda þá er bókað að þú fílir myndina talsvert betur en þeir sem eru kannski meira vanir hefðbundnum gamanmyndum. Annars, ef þú fílar leikaravalið og kannt að meta vel skrifaðar þvælur, þá ætti Burn After Reading alls ekki að valda þér neinum vonbrigðum heldur.Rétt sleppur upp í... 8/10