The Mexican (2001)

The Mexican er fyrsta myndin sem þau Brad Pitt og Julia Roberts leika saman í. Brad leikur Jerry sem að þarf að taka að sér sitt síðasta verkefni til að hætta í allri vitleysunni sem hann er í. Hann þarf að ná í byssu sem að fullt af fólki vill komast hendur yfir. Hann í byrjun nær alveg með léttum leik að ná byssunni en þegar hann er að fara með byssuna til baka þá byrjar allt. Þetta er ágætis mynd með mjög góðum leik þeirra Brad Pitt, Juliu Roberts og líka James Gandolfini.

Leikstjóri The Mexican er leikstjóri sem ég hef aldrei heyrt nefndan áður, Gore Verbinski. Og tekst honum með eindæmum að eyðileggja annars fínt handrit. Leikararnir standa sig vel og þar má nefna James Gondolfini (The Sopranos) fyrstan, Julia Roberts og Brad Pitt eru fín saman (þó að þau leiki ekki nema 10 mínútur saman í þessari mynd) og svo kemur Gene Hackman með aukahlutverk. En myndin er bara mjög slæm, hún er löng, ófyndin og illa leikstýrð. Handritið og leikurinn eiga bara þessa eina stjörnu skilið. Bíðið eftir þessari þegar hún kemur á RÚV.

Verð að segja að ég bjóst ekki við miklu þegar þessi ræma fór í spilarann, en myndin kom þó glettilega á óvart. Hér hefur tekist að smíða allþokkalega gaman/spennumynd hvar Brad Pitt tekst að framkalla einhvern þann alaulalegasta karakter sem hann hefur gert skil. James Gandolfini kemst einnig mjög vel frá sínu, eins og hans er von og vísa. Svo er saga byssunnar sjálfrar líka ákaflega viðunandi innslag í söguna og skemmtileg á að horfa.

Þessi mynd er frábær en ekki gott að fara á hana þegar maður er þreyttur. Það er mjög gaman að sjá þessa tvo þekktu leikara leika saman. Þótt þessi mynd sé löng er hún ekki langdreginn eins og skemmir svo margar myndir. Það er alltaf eitthvað að gerast; hassar, spenna eða eitthvað. Pottþétt sumarmynd.

Skemmtileg og afar vel leikin kvikmynd af tveimur af þekktustu leikurum sinnar kynslóðar; þeim Juliu Roberts og Brad Pitt sem hafa aldrei verið saman í kvikmynd á hvíta tjaldinu fyrr en nú er þau birtast í þessari mögnuðu mynd sem heldur áhorfandanum algerlega við efnið og ætti að skemmta honum svo um munar. Hér segir af smákrimmanum Jerry Welbach (Pitt) sem hefur um tvo afarkosti að velja í sögubyrjun. Annaðhvort heldur hann til Mexíkó að sækja verðmætan forngrip, byssu sem er kölluð Mexíkóinn, fyrir mafíuna eða hljóta verra af ella. Skipun þessi kemur beint frá mafíuforingjanum sjálfum. Hinn kosturinn er að gera eins og kærastan hans, Samantha (Roberts) biður hann um; slíta öll tengsl sín við mafíuna og fara með henni til Las Vegas þar sem hún vill hefja nýtt og betra líf með honum. Jerry veltir hlutunum fyrir sér andartak og telur að það sé betra að vera á lífi og eiga reiða kærustu en að vera dauður og eiga enga kærustu. Svo hann heldur til Mexíkó til að vinna sína vinnu og ná í byssuna, en Samantha sem er foxill með ákvörðun Jerrys heldur af stað til Las Vegas. Bæði eiga eftir að lenda í heljarinnar ævintýrum áður en yfir lýkur. Óskarsverðlaunaleikkonan Julia Roberts (Erin Brockovich) skilar góðri leikframmistöðu miðað við efni og aðstæður og skapar magnaða persónu sem lendir í óvæntum aðstæðum. Hún hefur sennilega aldrei verið vinsælli en nú eftir að hafa hlotið óskarinn sem besta aðalleikkonan fyrir stórleik sinn á hinni mögnuðu Erin Brockovich í lok mars. Hún klikkar ekki frekar en fyrri daginn. Brad Pitt er einnig góður í þessari mynd og skilar einni af sínum bestu leikframmistöðum til þessa, en hann fer á kostum í hlutverki Jerrys og nær að höndla kosti hans og galla afar vel. Það er mjög gaman að sjá þau saman í kvikmynd og það var kominn tími til segi ég. Þau skila sínu mjög vel, en senuþjófur myndarinnar er hiklaust leikarinn James Gandolfini sem flestir sjónvarpsáhorfendur ættu að þekkja úr hinum vandaða og vel leikna framhaldsþætti "The Sopranos" þar sem hann leikur mafíuforingjann Anthony Soprano. Hann sýnir hér á sér nýja og öðruvísi hlið á sér sem leikara og kemur mjög vel útúr sínu, en hann er skyndilega orðinn einn af þekktustu leikurum samtímans eftir að hann fór að leika í þessum mögnuðu mafíuþætti sem er vinsælasti framhaldsþátturinn um þessar mundir vestan hafs. Það var mjög gaman að sjá óskarsverðlaunaleikarann Gene Hackman birtast undir lok myndarinnar í smáu en afar góðu hlutverki. Það er alltaf gaman að sjá þennan frábæra leikara, en hann á að baki einstaklega fjölbreyttan og góðan leikferil sem spannar tæp 45 ár, en hann er nú kominn á áttræðisaldurinn (er fæddur 1930). Hann er hiklaust með betri leikurunum í Hollywood og stendur hann sem fyrr vel fyrir sínu og gott betur en það. Ég hafði sannkallað gaman af því að sjá þessa kvikmynd og skemmti mér alveg konunglega, enda er boðskapur hennar hiklaust, njótið og hafið gaman af. Þetta er góð og vönduð afþreying sem allir ættu að hafa gaman af. Ekki spillir ef þið eruð aðdáendur aðalleikaranna og hafið gaman af góðum kvikmyndum með bæði gamansömu og mafíulegu ívafi. Þá ætti þetta að vera afþreying við ykkar hæfi. Ekki skemmir tónlistin og myndatakan fyrir en hvort tveggja er mjög vel af hendi leyst og á hrós skilið. Semsagt; ég mæli eindregið með að þið skellið ykkur á þessa mynd og hafið gaman að henni og njótið hennar í botn! Hún er svo sannarlega þess virði að þið sjáið hana. Alls ekki missa af henni! Hún er alveg mögnuð!