Training Day (2001)

Þessi mynd er án efa ein af bestu myndum ársins. Washington brýst hér fram á sviðið í hlutverki sem er gjörólíkt öllum öðrum sem hann hefur áður fengist við. Hann kemur svo fullkomlega frá sér undirförlu eðli karaktersins, grimmdinni og ósvífninni að ógleymdri síðblindunni að unun er á að horfa. Allir aðrir leikarar, að Hawke meðtöldum, falla hér í skuggann af meistaralegum leik Washington. Hawke skilar sínu hlutverki óaðfinnanlega án þess að vera með einhverja snilldartakta. Alltaf öruggur og klúðrar ekki sínum málum.

Einn af fáum göllum sem maður finnur á þessari mynd er þetta óþolandi eðli hetja kvikmyndanna að geta þolað endalausar barsmíðar, flug ofan af húsum og árekstur við bíla. Þetta er kannski í lagi í veruleikafirrtum Bondmyndum og Batman, en mér finnst passa illa í myndum sem eiga að hafa einhver tengsl við raunveruleikann.

Í hnotskurn er þetta mynd sem er hverrar mínútu virð, einkennist af framúrskarandi leik og góðri tæknilegri vinnu. Án efa ein af betri myndum ársins.

Training Day er bæði mjög kraftmikil og vel gerð spennumynd. Plottið (það litla sem er af því) rennur á góðum hraða og aðalleikararnir smellpassa í sín hlutverk. Denzel Washington er í hlutverki sem enginn annar hefði getað túlkað eins vel. Hann sér líka um húmorinn í myndinni. Ethan Hawke er líka mjög góður, en hann verður samt alltaf eftirminnilegastur fyrir hlutverk sitt í snilldinni Gattaca. Myndin byrjar virkilega vel og keyrir svo hratt af stað (no pun intended), en inn á milli getur hún verið aðeins of slöpp og jafnvel einhæf. Hún er svo í raun allt öðruísi eftir hlé og þá var hún komin út í einhverja fléttu, en það jákvæða við þann hluta var að þá fór eitthvað almennilegt að gerast. Seinustu 20 mínúturnar náðu nú samt að bjarga miklu, og endaatriðið sjálft var mjög flott. Myndatakan og tónlistin er góð, samræðurnar eru margar beittar og vel skrifaðar. Training Day er kannski ekki eins spennandi og hún ætlar sér að vera en þó nær hún að halda uppi þokkalegu afþreyingargildi. Hún var ekki alveg eins góð og ég átti von á, og reyndar finnst mér hún hæfa betur að vera séð í sjónvarpi heldur en í bíó. Allir verða bara að dæma sjálfir.6/10

Denzel Washington þarf í eitt skipti fyrir öll að gera sér grein fyrir því að það er ekki magnið sem skiptir máli, það eru gæðin. Hann reynir svo mikið (í endalausri leit sinni að herra Óskar) að hann er við það að fá kviðslit. Hann ofleikur gríðarlega, og reynir að yfirskyggja alla aðra leikara, þar á meðal stórgóðan Ethan Hawke sem er mun betri í sínu hlutverki. Myndin sjálf er mikil útlits, hún er ábúðamikil að sjá og ágætlega gerð á allan hátt. Það nær þó ekki að hylja hversu innantóm og formúlukennd myndin er á allan hátt. Ótrúlega stór göt í plottinu gera það að verkum að maður andvarpar af gremju yfir hugsunarleysi handritshöfundanna (t. d. hvernig í andsk. gat mafían vitað að Washington yrði staddur í bílnum á einmitt þessum ljósum c.a. korteri eftir að hann átti að vera búinn að skila peningunum, eða hvernig meðvitundarlaus Ethan Hawke uppi á þaki komst á fimm sekúndum niður á götu ofan á húddið á bílnum hjá Washington, hin ótrúlega tilviljun hvernig mennirnir sem voru ráðnir til þess að drepa Hawke gera það ekki því þeir finna í vasanum hjá honum veskið hjá frænku eins mannsins en Hawke hafði bjargað henni frá nauðgun fyrr um daginn o. s. frv o. s. frv). Myndin er full af steríótýpum, allir svertingjar í myndinni eru með byssur, húðflúr, selja eiturlyf, hata löggur og kalla hvern annan ''nigger''. Washington karakterinn er mesta steríótýpa sem ég hef séð (og ég hef séð þær margar), hann er ekki aðeins vond lögga, hann er VERSTA LÖGGA ALLRA TÍMA (tm) og spilltari en andskotinn. Einnig er fáránlegt hvernig Ethan Hawke breytist á nokkrum klukkutímum frá heiðarlegustu löggunni í bænum, yfir í mann sem tekur eiturlyf, lemur mann og annan í stað þess að handtaka þá, tekur þátt í ráni, morði, fjárkúgun og guð má vita hverju án þess að blikna. Persónusköpun myndarinnar er ekki til fyrirmyndar. Ég skil ekki þá sem hafa haldið því fram að hér sé um að ræða eina bestu mynd ársins, því það er hún vissulega ekki. Ekki láta blekkja ykkur, hæst bylur í tómri tunnu.

Mér finnst þessi mynd vera sérlega góð vegna söguþráðs og góðs samleiks milli Denzel Washington og Ethan Hawke. Myndin er með þeim betri sem ég hef séð á árinu og er söguþráðurinn á þá leið að Jake (Ethan) er nýbúinn að fá að fara í inntökupróf í fíkniefnadeild, leiðbeinandinn er Alonzo (Denzel) og kemst Jake að því að hann Alonzo er bara spillt lögga og stelur og selur dóp og annað slíkt. Mæli með þessari mynd.

Myndin fjallar um fyrsta dag nýliða í fíkniefnalögreglu Los Angeles (Ethan Hawk) sem hittir fyrir hinn spillta yfirmann sinn (Denzel Washington). Þetta er þessi týpíska vonda lögga, góða lögga mynd svo þú skalt ekki fara í bíó haldandi að hér sé eitthvað nýtt að sjá. En fín mynd engu að síður.

Ég er með það á hreinu að ég er í minnihlutahópi hér, en ég var alls ekki jafn yfirgengilega ánægður með þessa mynd og margir hafa verið. Fólk hérna vestan hafs hefur reyndar verið á skiptri skoðun með þessa mynd. Margir segja hana vera það besta sem sést hefur hingað til á árinu, á meðan aðrir sjá bara svona la-la spennu-ádeilu með misjöfnum árangri. Það er óneitanlega margt gott við myndina. Sagan er traust og handrit David Ayer á hrós skilið. Leikstjórinn Antoine Fuqua (The Replacement Killers) skilar af sér mynd sem er ábúðarmikil á að horfa. Kvikmyndataka og tónlist eru mjög áhrifamikil og gera margt gott fyrir myndina. Ádeilan er líka tímabær, enda hefur lögreglan í Los Angeles sætt gífurlegri gagnrýni undanfarið fyrir mikla spillingu. Ethan Hawke, sem hefur ekki verið mikið á hvíta tjaldinu undanfarin ár, fer á kostum í hlutverki nýliðans sem veit ekki hvort hann á að fljóta með spilltri löggunni sem hefur framtíð hans í hendi sér eða fylgja eigin sannfæringu og láta yfirvöld vita af framferði félaga síns. So far so good, eins og þar segir. Það sem dregur myndina niður er enginn annar en Denzel Washington, að mínu mati. Ég hef lengi verið aðdáandi Denzels, enda er hann óneitanlega einn besti leikari samtímans. Undanfarið hefur hins vegar borið á einhvers konar sjálfumgleði hjá honum, sem tengist endalausri krossferð hans til að eignast eitt stykki Óskarsverðlaun fyrir bestan karlleik í aðahlutverki. Hann á eina styttu heima hjá sér, fyrir aukahlutverk í Glory (1989). En það hefur ekki farið fram hjá neinum undanfarin ár að Denzel vill fá stóru styttuna, hvað sem það kostar. Hann hefur valið hlutverk sem gulltryggja honum tilnefningu (t. D. The Hurricane). Hann er hættur að leika MEÐ öðrum leikurum og er farinn að leika YFIR þeim. Í Training Day gerir hann þetta einu sinni enn, núna með því að leika gegn týpu (hann hefur aldrei verið vondi kallinn áður), sem er traust uppskrift að tilnefningu. Þetta er farið að pirra mig vægast sagt, og ég tók hann aldrei trúanlegan sem siðblinda löggu vegna þess að hver einasta sena er sniðin fyrir hann til að sýna akademíunni. Ég var líka ósáttur við það hvernig myndin endaði, og það truflaði mig líka hvernig Fuqua tróð söngvurum og röppurum í annað hvert hlutverk (Macy Gray, Snoop Dogg, Dr. Dre). En eins og ég segi, ég er örugglega í minnihluta, og það verður bara að hafa það. Njóti aðrir vel.

Klárlega ein af bestu myndum ársins 2001. Denzel Washington er magnaður leikari og sýnir enn og aftur að hann er með þeim bestu í Hollywood. Ethan Hawke kemur alveg svakalega á óvart, enda hefur hann ekki leikið í neinni stórmynd síðan Reality Bites. Svakaleg ræma sem á eftir að slá í gegn á Íslandi.

Frábær spennutryllir sem fjallar um nýliða í fíkniefnadeild lögreglu Los Angeles borgar og fyrsta daginn hans með yfirmanni sínum. Ethan Hawke leikur nýliðann sem vill gera hlutina samkvæmt bókinni en Denzel Washington fer með hlutverk yfirmanns hans sem hefur sínar eigin reglur. Það má með sanni segja að hér sé komin ein besta mynd sem ég hef séð mánuðum saman. Stórgóðar leikframmistöður, vel skrifað og afar grípandi handrit ásamt góðri tónlist og klippingu leggjast á eitt til að skapa pottþétta mynd sem heldur manni spenntum alveg út í gegn. Denzel Washington vinnur leiksigur í sínu fyrsta hlutverki sem illmenni og hefur hann jafnvel verið orðaður við Óskarsstyttuna fyrir hlutverk sitt hér. Ethan Hawke er litlu síðri og kemistrían sem skapast milli þessara andstæðukenndu félaga gerir mikið fyrir myndina. Einnig tekst að byggja upp nokkuð sannfærandi mynd af undirheimum Los Angeles og þeim ófáu hættum sem þar liggja. Í handritinu má sjá móta fyrir hugleiðingum um það hvort að réttlætiskerfið sé ekki nógu strangt og hvað gerist þegar farið er of langt í hina áttina. Í stuttu máli er hér loksins komin önnur virkilega góð mynd á þessu afspyrnuslaka kvikmyndaári. Training Day er skotheld ræma sem ætti ekki að valda neinum vonbrigðum.