The Bone Collector (1999)

Ekki eins góð mynd og vonir stóðu til.Það vantar meiri spennu í þessa mynd finnst mér hún er mjög hæg nánast allan tímann.Vondi kallinn í þessari mynd er nú sá hlægilegasti vondi kall sem sést hefur á hvítu tjaldi.Hann er svo ótrúgverður að annað eins hefur ekki sést.Lítið reynir á Denzelinn hann liggur bara í bælinu og tuðar.Þessi mynd er samt ekki alslæm á þokkalega spretti,hún sleppur fyrir horn........

"The Bone Collector" er nýjasta kvikmynd spennumyndaleikstjórans Phillip Noyce sem gerði m.a. myndirnar "Dead Calm", "Patriot Games" og "Clear and Present Danger". Í aðalhlutverkum eru óskarsverðlaunaleikararnir Denzel Washington og Angelina Jolie ásamt þeim Queen Latifah og Michael Rooker, en myndin fjallar um leitina að óhugnanlegum fjöldamorðingja og sver sig einkum í ætt við myndir eins og "Seven", "The Silence of the Lambs" og "Kiss the Girls". Denzel Washington leikur glæpasérfræðinginn Lyncoln Rhyme sem liggur nú algjörlega lamaður og hjálparvana eftir slys sem hann lenti í við rannsókn síðasta máls síns hjá lögreglunni. Hann er við það að gefast upp á lífinu sjálfu og hefur fengið loforð vinar síns, sem er læknir, um að hann hjálpi honum yfir móðuna miklu eftir örfáa daga. Á sama tíma rekst lögreglukonan Amelia Donaghy (Jolie) á illa farið lík manns inni í lestargöngum og uppgötvar á ummerkjunum, bæði á líkinu sjálfu og í kringum það, að hér er ekkert venjulegt mannslát á ferðinni. Svo fer að henni er skipað að fara til Lyncolns og sýna honum hvað hún fann í þeirri von að hann geti gefið lögreglunni einhverjar vísbendingar. Lyncoln fær fljótlega brennandi áhuga á málinu, tekur það að sér og krefst þess að hér eftir verði Amelia augu hans og eyru við rannsókn málsins og í stöðugu símasambandi við hann á meðan þau komast til botns í því. Í fyrstu er Ameliu ekkert sérlega vel við að taka þetta að sér, en verður auðvitað að gera það sem henni er sagt að gera. Þar með er hafin ein óvenjulegasta rannsókn sem sögur fara af á morðmáli sem á engan sinn líka! Þau Denzel Washington og Angelina Jolie fara hér bæði á kostum og skapa eftirminnilega karaktera eins og þau eru þekkt fyrir. Þau hafa líka bæði hlotið óskarinn fyrir innihaldsríka túlkun og eru hreint ógleymanleg bæði tvö. Þau eru grundvöllurinn í allri myndinni og gera hana sífellt spennandi með snilldarleik sínum. Hasarreið sem er hreint frábær allt frá upphafi til enda. Þó fannst mér endirinn furðulegur, en það kemur ekki að sök. Ég gef því "The Bone Collector" þrjár og hálfa stjörnu og mæli hreint eindregið með henni. Fantagóð kvikmynd sem allir ættu að sjá. Alls ekki missa af henni!! Pottþétt kvöldskemmtun sem er mun hiklaust halda þér í greipum spennunnar til hinstu stundar!

Sérlega spooky þriller sem ætti ad gleðja flesta aðdáendur góðra spennumynda. Þrátt fyrir frekar ólíklegt plott skemmtir myndin út í gegn og heldur manni oft á tíðum frekar óþægilegri spennu. Sagan er í meginatriðum sú að lögreglumaðurinn Lincoln Rhyme (Denzel Washington) er rúmfastur og lamaður eftir slys á vettvangi glæps. Hann þykir sérlega goður í úrlausnum flókinna glæpa og sömu helgina og Rhyme ákveður að binda enda a líf sitt bankar löggan upp á hjá honum til að biðja um hjálp í mjög flóknu máli, sem virðist snúast um illilega bilaðan raðmorðingja sem myrðir fórnarlömb sín á frekar vibbalegan hátt. Þar sem Rhyme er rúmfastur þarf hann einhvern til ad vera sín "augu og eyru" á vettvangi og fyrir valinu verður uppreisnargjörn götulögga, Amelia Donaghy (Angelina Jolie). Ásamt hópi fólks sem manni finnst að geti allir verið morðinginn reyna þau að ná þeim seka áður en hann lætur aftur til skarar skríða. Yfir höfuð vel gerð mynd sem fólk á sennilega eftir að flykkjast á til að láta sér bregða. Og það tekst líka oft, sérstaklega í rottuatriðinu... ójbara. Denzel og Jolie standa sig vel, eins og við var að búast og Phillip Noyce (Dead Calm, Patriot Games) skilar af sér annarri fagmannlegri spennumynd. Takið eftir Queen Latifah í hlutverki Thelmu hjúkrunarkonu.. hún leynir á sér..

The Bone Collector byrjar mjög vel en er of langdregin og kolfellur um sjálfa sig í hallærislegu uppgjörinu. Philip Noyce hefur gert margar ágætar myndir á ferli sínum (t.d. Dead Calm) en hérna sést það greinilega hvernig góðum leikstjóra og góðum leikurum tekst engan veginn að bjarga lélegu handriti. Allur lokahluti myndarinnar, þ.e. þegar byrjað er að ráða fram úr plottinu, er svo heimskulegur og hálfvitalegur og aðeins þeir sem ekki fylgjast nógu vel með eiga ekki eftir að komast að því hver morðinginn er löngu áður en hann tekur af sér hettuna. Ég varð fyrir miklum vonbrigðum með The Bone Collector, ekki útaf því að ég hélt að hún yrði góð heldur vegna þess að hún byrjaði svo vel en fór svo út í eitthvað kjaftæði. Það þarf betri handritshöfunda í Hollywood! Strax!

Beinasafnarinn er mynd sem er vel þess virði að sjá og kom mér mjög á óvart. Angelina Jolie leikur mjög vel og Denzel Washington ekki síður. Ágætis spennumynd með áhugaverðum söguþræði sem heldur manni spenntum frá upphafi til enda.

Þokkaleg spennumynd sem fjallar rannsókn nokkurra lögreglumanna á morðum sem framin eru í New York af manneskju sem þykist vera leigubílstjóri en skilar farþegum sínum aldrei á áfangastað. Denzel Washington leikur þaulreyndan og bráðgáfaðan rannsóknarlögreglumann, Lincoln, sem hefur misst alla lífslöngun eftir að hafa lamast nær algerlega í vinnuslysi, hann er bundinn við rúm sitt öllum stundum og stjórnar rannsókn málsins þaðan með hjálp fullkomins tæknibúnaðar. Angelina Jolie fer með hlutverk götulöggunnar Amelíu sem vekur aðdáun Lincolns eftir að hafa safnað sönnunargögnum af staðnum þar sem fyrstu líkin finnast. Hún er andlega skemmd eftir slæma reynslu í einkalífi sínu og kærir sig í upphafi ekkert um að verða hluti af rannsókninni. Sambandið milli aðalpersónanna tveggja og hvernig þau hafa áhrif hvort á annað er eitt það best heppnaðasta við myndina. Myndataka er einnig framúrskarandi en handritið er hvorki fugl né fiskur, morðinginn og ástæður hans eru ívið klisjukenndar. Það má líka halda því fram að myndin sé ekki nógu spennandi, til að mynda vantar atriði eins og eltingaleikinn við morðingjann sem hefur hingað til nánast verið skylduatriði í myndum af þessu tagi. Ef meiri metnaður hefði verið lagður í söguþráðinn er ég sannfærður um að þetta hefði getað orðið fyrsta flokks spennumynd, en myndin er í staðinn bara þokkalega afþreying sem gleymist fljótt.