Contact (1997)

Stórkostleg mynd óskarsverðlaunaleikstjórans Roberts Zemeckis "Forrest Gump" er af mörgum talin ein af bestu myndum hans, enda hafa gagnrýnendur lofað hana í hástert. Myndin er byggð á metsölubók stjarnfræðingsins og vísindamannsins Carls Sagan og skartar þeim Jodie Foster og Matthew McConoughey í aðalhlutverkunum. Með önnur stór hlutverk í myndinni fara þekktar stjörnur eins og James Woods, John Hurt, Angela Bassett og Tom Skerritt. Myndin segir frá vísindakonunni Ellie Arroway sem segja má að hafi leitað svara allt sitt líf. Þegar hún var ung stúlka sat hún tímunum saman við stuttbylgjutækið, í þeirri von að einhver, einhvers staðar, myndi svara hennar eigin kalli. Í kjölfar dauða föður síns ákvað hún síðan að helga líf sitt vísindunum - því eina sem hún taldi að gæti veitt svör við spurningum hennar. Eftir því sem árin liðu tók hún síðan að beina athyglinni í stöðugt ríkari mæli út í himingeiminn, sífellt sannfærðari um að þar væri eitthvað að finna annað en endalaust tóm. Hún barðist fyrir því að fá aðstöðu til að geta hlustað eftir einhverjum merkjum og vegna dugnaðar síns tókst henni að fá því framgengt. Og morgunn einn gerist það! Frá hinni fjarlægu ströndu Vega taka skyndilega að berast skýr merki sem í huga Ellie taka af allan vafa um að líf sé að finna á öðrum hnöttum. Og við rannsókn þessara merkja kemur einnig í ljós að þau innihalda teikningar að einhvers konar geimfari sem gert gæti mönnum fært að ferðast lengra en nokkurn tíma áður. Hvaðan kemur þetta? Hverjir sendu það? Þýðir þetta nýja von fyrir allt mannkyn eða er þetta byrjunin á endalokunum? Hér er á ferðinni frábær kvikmynd sem ég gef þrjár og hálfa stjörnu og hvet ég ennfremur eindregið alla til að sjá hana.

Áður en ég sá þessa mynd hafði ég ekki heyrt mikið um hana og vissi í raun ekkert um hana nema að hún gerist í geimnum. Því sem ég bjóst við var ömurleg geimmynd en ég fékk eitthvað allt annað. Því þótt hún fjalli í raun um kynni manna við geimverur þá fer hún yfir margt meira en það. Það eina sem kemur í veg fyrir að hún fái betri einkunn er það að hún er langdreginn en annars er þetta góð mynd.

Stórkostleg mynd frá leikstjóra Forrest Gump og Back to the Future sem skilur mikið eftir sig. Það er ekki oft sem maður sér vísindaskáldskapsmyndir með svona áhugaverðum og djúpum persónum. Allir leikararnir standa sig óaðfinnanlega. Söguþráðurinn er einstakur og nálgast spurninguna um hvort líf sé til annarstaðar í heimnum á annan hátt en ég hef áður séð. Það er ekki verið að gleyma sér í tæknilegum atriðum á kostnað mannlegra þátta eins og í svo mörgum öðrum myndum.

Ef til er ein mynd sem er fær um að breyta skoðunum og hugsunum, þá er það Contact. Snillingurinn Robert Zemeckis hefur á "stuttum" ferli sínum ekki tekið eitt einasta feilspor og þó að hann hafi upp á síðkastið gert aðeins alvarlegri myndir en t.d. Who Framed Roger Rabbit eða Back to the Future, hafa myndirnar alls ekkert breyst hvað varðar gæði og tæknilega fullkomnun. Ég leyfi mér að fullyrða að Contact sé hápunkturinn á ferli hans því að erfitt er að toppa svona ótrúlega flókna, erfiða og snilldarlega kvikmyndagerð. Eftir að hafa hlustað á Zemeckis á DVD disknum komst ég að því að þessi maður er einstakur kvikmyndleikstjóri og að Contact var mun stórfenglegri en ég hefði getað ímyndað mér. Hún er, að mínu mati, fullkomin. Þetta er án efa besta vísindaskáldsaga sem gerð hefur verið, já, betri en 2001 og Close Encouners, og algjörlega vanmetin af bæði sumum gagnrýnendum og áhorfendum; t.d. var þessi mynd rænd á óskarsverðlaunaafhendingunni 1998. Ef þið hafið áhuga á mynd sem nær að sameina gæði, skemmtun, dýpt, frábæra persónusköpun, yndislegt handrit og óviðjafnanlegan leik (allir leikarar standa sig vel, þá sérstaklega Foster, og eru allar persónur þrívíðar, raunverulegar og skiljanlegar)þá er Contact mynd fyrir þig. Hún er ein af 10 bestu myndum tíunda áratugarins og ein af mínum uppáhaldsmyndum. Þú munt ekki líta á hluti eins og trú, vísindi og geiminn sömu augum eftir að hafa séð þessa mynd.