Blair Witch 2 : Book of Shadows (2000)

Fín mynd byggt á skemmtilegri hugmynd. Miklu betri en fyrri myndin sem var algjört rusl miðað við þessa mynd. Alvöru myndataka í staðin fyrir endalaus skot af fótum aðalleikara fyrri myndarinnar.

Ég varð fyrir miklum vonbrigðum með þessa mynd því, Blair Witch 1 lofaði hrikalega miklu. En þessi mynd var engan veginn að virka því hún var næstum ekkert ógeðsleg, OK það voru sum spooky atriði en það er allt og sumt, ég get því miður ekkert mælt með þessari mynd. Eina skiptið sem mér brá var þegar vesæl ugla flaug inn um gluggann. MIKIL VONBRIGÐI!!!

Þegar ég tók þessa mynd á leigu þá hélt ég að hún mundi vera eins og fyrri allavega í skemmtanagildi, en svo var raunin ekki. Þetta er einhver leiðinlegasta mynd sem ég hef séð og ég sé eftir því að hafa eitt einum og hálfum klukkutíma í hana, þegar ég var að horfa þá hraðspólaði ég yfir hana og það ætti að segja það sem segja þarf! Þessi mynd er alger hörmung.

Ég vissi einhvern veginn að Blair Witch 2 væri léleg. Það er nánast sama umfangsefnið í þessari mynd. Um krakka sem fara út í skóg til að taka upp heimildarmynd af Blair Witch norninni. Hún var ekki nálægt því eins spooky eins og hin myndin og hún er ekki eins raunveruleg eins og hin myndin. Ég verð að segja að það voru mistök að gera framhald af Blair Witch Project. Ég myndi láta hana í 1. sæti yfir verstu myndir sem hafa verið gerðar nokkurn tíma.

Mér hefur aldrei liðið svona illa í bíó. Ég var alveg ógeðslega hrædd á myndinni sjálfri en ég gef henni þrjár stjörnur fyrir að ég og allir þeir sem voru inni í salnum öskruðu alltaf í bregðuatriðunum. En hvar var andskotans Skuggabókin??!! Ég varð hins vegar ekkert hrædd eftir á og gáði ekki einu sinni undir rúmið þegar ég fór að sofa, annars hefði ég gefið myndinni fjórar.

Þvílík vonbrigði. Ég er ekki mikill aðdáandi upprunalegu Blair Witch-myndarinnar en jafnvel sem sjálfstæð mynd er þessi hryllilega léleg bíómynd. Ég skil vel að Artisan hafi viljað græða meira á öllu þessu Blair Witch-dæmi, en það hefði verið betra að leggja smá metnað í gerð þessarar myndar. Í staðinn fær áhorfandinn illa gerða, verr leikna, og asnalega uppsetta kvikmynd. Hugmyndin er ekki vitlaus í sjálfu sér. Fimm manns halda inn í skóginn nálægt Burkittsville í Maryland-fylkil, þar sem atburðir fyrri myndarinnar áttu sér stað. Þessir fimm vesalingar sáu fyrri myndina og fannst hún það góð og sannfærandi að þau borga fyrir að taka þátt í "The Blair Witch Hunt", helgarferð í skóginum fræga. Gott og vel, en þar sem þau eru komin út úr skóginum eftir u.þ.b. 40 mínútur og fara í staðinn í hálf-yfirgefið vöruhús er hugmyndin úr fyrri myndinni farin út um gluggann. Ég sat í bíó og varð meira og meira pirraður eftir því sem leið á myndina; það var ekki neitt sem var gott, spennandi eða frumlegt við hana. Og svo margt fór í taugarnar á mér. Enginn af aðalleikurunum getur leikið, og náunginn sem leikur lögreglustjórann er gjörsamlega óþolandi. Og af hverju í ósköpunum heitir myndin "Book of Shadows"??? Það er hvergi nokkurs staðar í myndinni minnst á slíkan hlut. Fáránlegt! Ein stjarna fyrir góða upprunalega hugmynd og ágætis tónlist innanum.

Þessi mynd kom mér skemmtilega á óvart. Þessi mynd er eins og flestir vita ekki tekin upp með sama stíl og 1. Þetta er hryllingsmynd með geðveiki, ofsjónum, alkahóli, hassi og paranoiju. Leikararnir standa sig nokkuð vel, leikstjórnin er góð og hún fær mann til að bregða oft. Tónlistin er líka ansi góð.

Í fyrsta lagi verð ég að segja að ég er mikill aðdáandi fyrstu myndarinnar, sem mér finnst algjört meistaraverk, og var ég lengi á þeirri skoðun að framhaldsmynd hefði aldrei átt að vera gerð. Ég vildi ekki sjá Book of Shadows: Blair Witch 2. Fyrir u.þ.b. tveimur mánuðum breyttist skoðun mín á þessari mynd úr almennu hatri yfir í smá áhuga; eftir að hafa séð trailerinn og nokkrar góðar umfjallanir var ég nokkuð spenntur að sjá hvað Joe Berlinger (þekktastur fyrir mjög alvarlegar heimildarmyndir) myndi gera úr efniviðnum. Myndin byrjar vel. Ekki mjög vel, en vel. Hún er fyndin, vísar hæfilega mikið í fyrri myndina og gerir smávegis grín að henni. Söguþráðurinn sjálfur er góður og hljómar spennandi: nokkur ungmenni fara ásamt leiðsögumanni í skóga Burkittswille, heimili Blair-nornarinnar. Þau er þar af ýmsum ástæðum og taka dvölina ekki mjög alvarlega. Fyrsta kvöldið í skóginum drekka þau mikið og vakna svo um morguninn, búin að gleyma fimm klukkutímum um nóttina. Myndavélarnar sem þau voru með og ýmis skjöl eru í rúst, en spólurnar úr myndavélunum (sem voru staðsettar allt í kring og tóku stöðugt upp atburði næturinnar) eru óskemmdar. Til þess að komast að því hvað gerðist um nóttina verða þau að horfa á spólurnar og við fáum kröftugan skammt af Blair-Witch-shaky-cam myndefni við áhorfið. Eins og ég sagði, góð hugmynd. En ekki er vel unnið úr henni. Í fyrsta lagi eru allar persónurnar frekar óáhugaverðar og sú litla persónusköpun sem á sér stað er oft á tíð ruglingsleg og algjörlega óviðeigandi. Við sjáum flashbökk o.s.frv. sem skipta raunverulega engu máli þegar myndin er búin. Einnig eru leikararnir sem fara með þessi óspennandi hlutverk alveg ofsalega lélegir og zikk-zakka á milli þess að ofleika hræðilega eða láta eins og mýs. Það versta við þetta allt saman er þó að kvikmyndagerðarmennirnir gera aldrei neitt spennandi úr þessum prýðisgóða söguþræði. Persónurnar sjá aldrei neitt dularfullt eða ógnvekjandi á spólunum en í staðin sjá þau lítil börn sem ganga hallærislega afturábak. Reyndar eru allar tilraunir til að vekja einhvern hroll frekar misheppnaðar og er Berlinger ekki efni í hrollvekjuleikstjóra, þ.e. ekki fyrir fiction myndir. Myndin má þó eiga það að vera ekki þessi týpíska bregðumynd, þó að bregðuatriði séu til staðar. Ólíkt hinni hörmulegu Urban Legends 2 reynir Berlinger a.m.k. að byggja upp einhverja spennu áður en hann lætur fólk hoppa inn í ramma. Þrátt fyrir alla þessa galla er hægt að hafa ágætt gaman af Blair Witch 2 í svona 40-50 mínútur, sérstaklega vegna þess að margar skemmtilegar hugmyndir eru á vappi og ýmislegt sem gerir það að verkum að maður þarf að sjá myndina oftar en einu sinni til að fatta allt saman. Gallinn er sá að myndin er ekki nógu áhugaverð né skemmtileg til þess að fólk eigi eftir að vilja sjá hana aftur, hversu djúpt sem Berlinger kafar niður. Seinni helmingur myndarinnar er hinsvegar bara hallærislegur. Þó endalokin hafi örugglega litið vel út á blaði, og ég er viss um það að Berlinger hafi verið ofsalega sannfærandi þegar hann útskýrði allt sem var í gangi fyrir ráðvilltum framleiðendunum, tekst honum alls ekki að færa "mysteríuna" yfir á skjáinn svo að vel takist heldur sér maður aðeins meininguna og það sem hann ætlaði sér en aldrei verður neitt úr því. Ég gef myndinni þó samt plús fyrir að fara ekki Hollywood-leiðina í endanum og má hún eiga það að vera frekar ófyrirsjáanleg, en þetta er ekkert meira en B-mynd og hún lítur jafnvel enn verr út þegar hugsað er út í vinsældir og gæði forverans. Þegar allt kemur til alls er Book of Shadows (sammála Ásgeiri: hvaða bók???) ekki mjög slæm mynd, en ég stend ennþá á því að hún hefði aldrei átt að vera gerð.

Eftir velgengni The Blair Witch Project var óhjákvæmilegt að framhaldsmynd liti dagsins ljós þó ekki væri nema af fjárhagslegum ástæðum. Hér segir frá ferðamannaleiðangri sem ætlar að kanna þær slóðir þar sem fyrri myndin átti að hafa gerst. Þar byrja fljótlega dularfullir hlutir að gerast sem hrinda af stað afgangnum af atburðarásinni. Framsetning þessarar myndar er mjög ólík fyrri myndarinnar, þar var aðeins notast við handfrjálsar heimamyndavélar án þrífóts (eða "shaky-cam" eins og það hefur stundum verið kallað) en hér er öll framsetning á hefðbundnari hátt, enda var framleiðslukostnaður þessarar myndar margfaldur þeirrar fyrri. Því verður ekki neitað að myndin á nokkur óhugnaleg augnablik en þau byggjast flest á hrollvekjuklisjum og blóði. Myndin fær prik fyrir að reyna að gera frumlega hluti í seinni hálfleik þó það mistakist, einhvers staðar djúpt undir má sjá móta fyrir góðri hugmynd en úrvinnslu hennar er alvarlega ábótavant. Engin þekkt nöfn er að finna í leikhópnum og er leikurinn eftir því. Það eru ekki gerðar margar hrollvekjur í dag og hvað þá margar góðar, þannig að hrollvekju unnendum sem þyrstir í eitthvað nýtt ráðlegg ég alveg eins að sjá Blair Witch 2. Reynið bara að stilla væntingum í lágmark.