Notkun Íslendinga á streymisveitunni Netflix hefur aukist stöðugt á undanförnum árum (og ekki síður undanfarna daga þegar sóttkví Íslendinga eykst með degi hverjum) og virðist vera nóg af framboði efnis sem hentar hverjum og einum.
Nýverið tók veitan upp á því að birta lista yfir tíu vinsælustu titla í hverju landi, en þar falla kvikmyndir, sjónvarpsþættir, heimildarmyndir og allt tilheyrandi undir sama hatt.
Listinn uppfærist daglega en að svo stöddu samanstendur hann af 10 eftirfarandi titlum sem eru heitastir á Íslandi í dag:
1. RuPaul’s Drag Race
„Ef þú elskar ekki sjálfan þig, hvernig ætlarðu að fara að því að elska einhvern annan?“ spyr skemmtikrafturinn RuPaul í lok hvers þáttar, en keppnisþættir dragdrottningarinnar hafa hægt og bítandi klifrað upp íslenska Netflix-listann. Það er af góðri ástæðu, enda stórskemmtilegt sjónvarp – og dramað er vægast sagt ávanabindandi og uppfullt af eftirminnilegum keppendum.
2. Self Made
Bandarísk mini-sería byggð á ævisögu brautryðjandans C. J. Walker, sem hér er leikin af Octaviu Spencer. Myndin var gefin út um helgina en þættirnir eru fjórir talsins og hafa hlotið ágætis viðtökur.
3. 100 Humans
Raunveruleikaþættirnir 100 Humans fengu útgáfu á dögunum en í þeim svara hundrað mismunandi manneskjur öllum þeim spurningum sem brenna á okkur öllum – en á léttu nótunum. Mælt með.
4. The Letter for the King
Framtíð konungsríkisins er í höndum ungs raddarasveins sem fær það verkefni að færa konungnum leynileg skilaboð. Má þess geta að Jóhannes Haukur fer með lítið hlutverk í þáttunum. Áhorfendur geta sett sig í stellingar fyrir mikla fantasíu og tilheyrandi epík.
5. Tiger King: Murder, Mayhem and Madness
Hér er sagt frá sérvitringnum Joe Exotic, fagi hans, einkennilega brotaferli og öllum hans félögum. Exotic er eins og persóna úr skáldskap og hafa ýmsir viðmælendur í heimildarþáttunum meira en kostulegar sögur að segja af dýragarðsverðinum umrædda. Þessi leynir á sér.
6. Love is Blind
Raunveruleikaþátturinn Love is Blind hefur verið ákaflega umtalaður síðastliðinn mánuð og trekkir enn inn góðar tölur á streymiveitunni. Áhorfendur hafa víða deilt um gæði þessarar seríu en grunnhugmyndin gengur út á mismunandi pör sem kynnast í sitthvoru, lokaða herberginu og ná tengingu áður en hulunni er svipt og þá tekur trúlofun við ásamt næstu skrefum í lífi þeirra para.
7. Spenser Confidential
Mark Wahlberg og Winston Duke fara með aðalhlutverkin í þessari hasargamanmynd frá leikstjóranum Peter Berg, en þeir Wahlberg hafa áður unnið saman að myndunum Lone Survivor, Deepwater Horizon, Patriot’s Day og Mile 22. Spenser Confidential er lauslega byggð á bókinni Wonderland eftir Ace Atkins og verkum Roberts B. Parker.
8. Lost Girls
Spennudramað Lost GIrls var frumsýnt á streyminu í síðustu viku og rauk beint í efsta sæti aðsóknarlistans þá helgi. Hér segir frá konu sem leitar að týndri dóttur sinni en fær hvorki aðstoð né áheyrn frá yfirvöldum. Þá neyðist hún til að taka málin í eigin hendur, með ýmsum óvæntum afleiðingum. Myndin er byggð á samnefndri metsölubók og sönnum atburðum.
9. Friends
Gamanþættirnir Friends hafa lengi vel notið hreint svakalegra vinsælda í gegnum árin og poppa þeir stöðugt annað slagið á áhorfslista sem þennan. Milljónir manna horfa á þættina – aftur og aftur – á hverjum einasta degi og hefur eitthvað verið í loftinu á Íslandi undanfarna daga sem hefur komið þáttunum inn á topp 10 listann. Ætli þetta sé nostalgían að tala eða eru Friends raunverulega þættir sem eldast eins vel og hörðustu aðdáendur vilja meina?
10. The English Game
Sannsögulegt íþróttadrama í sex hlutum. Hér fylgjumst við með uppruna enska boltans í þeirri mynd sem við þekkjum hann. Þessi stéttabaráttu- og lítilmagnasaga, sem lenti á Netflix nú um helgina, kemur úr smiðju Julian Fellowes, höfund Downton Abbey og Gosford Park.