Star Trek: Insurrection (1998)

Níunda Star Trek myndin veldur ekki vonbrigðum. Í aðalatriðum gengur atburðarásin út á það að fólk á plánetu einni hefur skapað sér hálfgerða paradís og afneitað allri tækni - það lýsir hugsjón þeirra kannski best að vitna í eina persónuna sem segir að þegar vél sé smíðuð til að vinna verk manns þá sé verið að taka eitthvað frá manninum. Áhöfn Enterprise flækist inn í hættulega atburðarás þegar að kemur í ljós að ekki er í allt með felldu hvað varðar áhuga Stjörnuflotans á plánetunni og það kemur í ljós að hún býr yfir einstakri náttúruauðlind sem margir myndu drepa fyrir. Jonathan Frakes virðist hafa náð góðum tökum á því að leikstýra því að þetta er önnur Star Trek myndin þar sem hann gerir það og tekst vel til í bæði skiptin. Reyndar er þessi mynd samt ekki eins góð og sú síðasta, sem var langsamlega besta Star Trek myndin að mínu mati, en enga að síður mjög góð skemmtun. Ef yfir einhverju er að kvarta er það helst að hún verður dálítið væmin á köflum en það er í sjálfum sér smekksatriði hvort það sé ókostur. Mæli með henni fyrir Star Trek aðdáendur og þá sem hafa gaman af vísindaskáldskap.