Thir13en Ghosts (2001)

Þetta er ein leiðinlegasta, ömurlegasta og fáranlegasta mynd sem ég hef séð. Ég torgaði rétt svo 40 mínútur af myndinni og ældi af leiðindum. Illa gerð, leiðinlegur söguþráður og ljótt hús. Að veiða drauga.. þessi mynd væri fín árið 1970 r sum. Mæli tafarlaust að enginn sjái þessa mynd... Cr4cKeD

Fýlukallinn þarna lýsir tilfinnugnum mínum um þessa mynd. Það er einfaldlega ekkert gott við þessa hörmung: handritið er svo lélegt að maður fer að velta því fyrir sér hvort að leikurunum hafi bara verið stillt upp og þeir bara látnir segja eitthvað. Draugarnir eru alveg misheppnaðir og svo gervilegir að ég hefði getað látið litla bróður minn gera flottari drauga úr pappalími. Svo virðist sem aðstandendur myndarinnar hafi fattað hvað leikararnir og bara allt var misheppnað svo að þeir hafa bara dundað sér við að finna upp klígjulega dauðdaga fyrir alla vondu kallana og klippa svo nógu hratt til að reyna að láta mann missa meðvitund af leiðindum og rugli. Sem sagt, sleppið þessari mynd.

Slöpp hryllingsmynd með lélegum persónum, ömulegri leikstjórn og afskaplegu efnislaust handrit. Gerið ykkur sjálfum greiða og sleppið 13 Ghosts. Leikurinn var svo lélegur að þeir létu krakkana tínast og þar með sjást þau ekki mest alla myndina.

Jamm... ég fór á þessa mynd með jákvæðu hugarfari og í góðra vina hópi. Samt fannst mér hún léleg. Þráðurinn er tóm steypa og fyrirsjáanlegur þar að auki, en þrátt fyrir það er hugmyndin góð. Afspyrnu aulaleg mistök hér og hvar og lítið varið í leikarana, sem þó eiga sína spretti. Ekki miðans virði.

Bú er kanski ekki rétta orðið hér þar sem að þetta er sko ekki lásí scream bregðu hrollvekja þessi heldur þér bara einfaldlega allan tímann spenntum, og ef þú ert veik sál þá sérðu líklega ekki nema helminginn af myndinni, sökum illkvitnislegrar myndatöku og klippingar : )

Dark Castle fyrirtækið var stofnað eingöngu til þess að endurgera B-mynda hrollvekjur Williams Castle og sýnir hér að það er að ganga upp.

Það sem príðir myndina er flott sviðsmynd, flott myndataka, flott klipping, flottar tæknibrellur og góður húmor sem er þó svo lúmskur að það fatta hann ekki allir, og er erfitt fyrir íslensku þýðendurnar að koma á blað, eins og has the lawier splitted : )

Matthew Lillard er uppáhalds leikarinn minn og hann olli mér ekki vonbrigðum í þessarri mynd, þar sem maður getur alltaf treyst á svartan og kaldhæðnislegan húmor þegar hann á í hlut.

Þetta er mynd til að sjá í bíó eða að minsta kosti í myrkri fámennri stofu, maður fær ljóta kalla í hausinn eftir hana.

Thirteen Ghosts er frekar misheppnuð hrollvekja sem fjallar um hóp af fólki sem lokast inni í mjög svo óvenjulegu húsi ásamt þó nokkrum draugum. Eitt það besta hér er sviðsmyndin, en glerhýsið sem megnið af myndinni gerist í lítur mjög vel út. Það eru líka nokkrir áhugaverðir hlutir á ferðinni hér (sem eru þó ekki nauðsynlega frumlegir) eins og það að draugarnir eru einungis sýnilegir í gegnum sérstök gleraugu. Þetta er notað á áhrifaríkan hátt í einu eða tveimur atriðum en nær samt litlu að bjarga. Leikararnir standa sig frekar illa og finnst mér óskiljanlegt hvernig Tony Shaloub og F. Murray Abraham létu fá sig út í þessa vitleysu. Ég geri ekki mikið meiri kröfur til hrollvekjumynd ena að þær standi undir nafni -það er að þær nái að vekja upp hroll. Ef þær geta ekki staðið undir þessum kröfum, sem er tilfellið með Thirteen Ghosts, er ósköp lítil ástæða til að mæla með þeim við nokkurn mann.

Ókei, handritið er alls ekki neitt til að hrópa 'húrra' fyrir og leikurinn er í algeru lágmarki, en samt sem áður er alltaf hægt að hafa gaman af svona ræmu. 13 Ghosts er meðal B-hrollvekja sem toppar auðveldlega aðrar nýlegar misheppnaðar myndir af svipaðri tegund (Jeepers Creepers er m.a. ein þeirra), þó að ekkert frumlegt sé hér um að ræða. Söguþráðurinn fór ekki það í mjög mikið í taugarnar á mér í þetta sinn, því ég átti hvort sem er ekki von á neinu snilldarverki. Tæknibrellurnar eru mjög flottar og bæta upp fyrir nokkra smágalla og leikmyndin er einnig æðislega flott. Það eru ekki mörg bregðuatriði (nánast engin) hér til staðar en þó tekst myndinni að vera á köflum ansi ógeðsleg og blóðug. 13 Ghosts kemst ekki nálægt því að vera meðal bestu hryllingsmynda allra tíma, en þó er hún heppin að vera ekki sú alversta.

Thirteen Ghosts hefur allt sem þarf til að vera nokkuð góð hryllingsmynd. Það er mjög flott sviðsmynd, förðunin er mjög góð, það eru meira að segja nokkrir góðir leikarar í henni. En það sem dregur hana niður er of mikið, handritið er einstaklega illa unnið, sagan sjálf er ekkert alltof léleg en handritið er skelfilegt. Persónurnar eru svo leiðinlegar að maður vonar stundum að draugarnir nái sínu fram. En handritið er ekki það versta, leikstjórnin eftir Steve Beck er sú allra versta sem ég hef séð lengi. Það er bókstaflega erfitt að horfa á myndina.



Fyrst aðeins um söguna. Arthur Kriticos missti konuna sína í bruna fyrir einhverjum mánuðum. Síðan hefur hann og börnin hans tvö verið í miklum fjárhagserfiðleikum(samt hefur hann efni á barnfóstru fyrir 6 ára gamla son sinn, barnfóstran er án efa leiðinlegasta persónan í kvikmyndinni, hún er svo íkt að manni langar að henda einhverju í skjáinn í hvert skipti sem hún fer með one liner brandara), börnin hans tvö eru Bobby sem er bein eftirherma af Danny úr The Shining nema að hann er með svona rosalega sætan málgalla og Kathy sem gerir lítið annað en að brosa í myndavélina. Einn daginn komast þau af því að frændi þeirra, Cyrus hefur dáið og arfleitt þeim húsið hans. Cyrus var einhverskonar draugafangari, hann var að safna draugum með hjálp miðilsins Dennys, ég skildi reyndar ekki afhverju hann þurfti að hafa miðil því að hann átti fullt af gleraugum sem hann getur séð drauga með. Allavegana fara þau í húsið(sem er í raun ekki hús heldur risastórt tæki sem djöfullinn hannaði) og þau komast að því að Cyrust geymdi drauganna í húsinu og þeir eru allir að sleppa úr glerfangelsum þeirra!


Nær allt í myndinni er stolið úr öðrum hryllingsmyndum, The Shining, Evil Dead, A Nightmare on Elm Street og fleirum. En hljóðið og myndatakan er hrein og bein árás á skynfærin. Hún er svo hávær að Armageddon virðist vera í mono og filman er klippt til og frá svo að manni líður beinlínis illa og ef að myndavélin er ekki að snúast í hringi fram og til baka þá eru slow motion atriðin, þessi mynd gæti verið mjög gott sönnunargagn ef einhver vildi að slow motion yrði bannað í kvikmyndum.


En það ótrúlegasta við myndina er eiginlega hvernig fór hún að því að vera svona misheppnuð? Tony Shalhoub, F. Murray Abraham eru báðir mjög góðir leikarar og hún er framleidd af ekki síðri mönnum en Joel Silver og Robert Zemeckis en af einhverjum ástæðum var ákveðið að fá hinn óreynda leikstjóra Steve Beck sem er því miður algerlega hæfileika laus. Svo er líka spurn afhverju myndin var gerð? Þetta er endurgerð af kvikmyndinni 13 Ghosts frá árinu 1960 eftir hinn goðsagnakennda hryllingsmyndaleikstjóra William Castle. En ég efast um að ástæðan muni nokkurn tíman koma, þetta verður bara ein af ráðgátum lífsins. - www.sbs.is

13 Ghosts er endurgerð á samnefndri mynd frá árinu 1960 eftir hinn goðsagnakennda hrollvekjuleikstjóra William Castle.

Arthur Kriticos (Tony Shalhoub) hefur erft geysistórt hús eftir hinn sérvitra frænda sinn Cyrus (F. Murray Abraham). Arthur er enn í sárum eftir að hann missti eiginkonu sína í eldsvoða og kemur þetta með vonarneista inn í líf hans ásamt því að vænka fjárhagsstöðuna hjá honum. Hann flytur inn í húsið ásamt krökkunum sínum Kathy (Shannon Elizabeth) og Bobby (Alec Roberts) ásamt barnfóstru Bobby, Maggie (Rah Digga). En áður en langt er um liðið eru þau öll föst inni í húsinu og þau eru ekki ein. Inni í því er banvænt draugahyski sem Cyrus hafði safnað í gegnum tíðina. Ásamt hinum dularfulla Dennis (Matthew Lillard) og draugabananum Kalina (Embeth Davidtz) reyna þau nú að finna undankomuleið áður en þau enda öll í litlum bútum.

Lélegasta mynd sem ég hef nokkurn tímann séð er hörmungin Judge Dredd. Þessi gæti hugsanlega toppað hana. Það fólk sem gerði þessa mynd hefur klúðrað öllu sem það gat hugsanlega klúðrað. Í fyrsta lagi: Myndin er ekki hrollvekjandi (ég hef séð hryllilegri Marilyn Manson myndbönd). Hún er ekki spennandi: Myndin reiðir sig öll á bregðuatriði og hraðar klippingar í staðinn fyrir undirliggjandi hrylling. Eftir fyrstu bregðuna rís ekki upp á manni augabrúnin, hvað þá eitthvað annað. Hún er ekki einu sinni fyndin: Nema þá óviljandi á köflum. Húmorinn sem á að vera í henni er meira og minna misheppnaður. Fyndnustu hlutirnir eiga að koma frá barnfóstrunni sem er, þú giskaðir rétt, svört sem er svo klisjukennt að maður fær klígju. Það er nákvæmlega ekkert gott við þessa mynd. Handritið er alveg vonlaust, sama gildir um ófrumlega og lélega leikstjórn Steve Beck og leikararnir lánlausir: Hvað voru þeir eiginlega að hugsa. Hinum ágætu leikurum Tony Shalhoub og F. Murray Abraham er sóað gjörsamlega í þessari þvælu, sá síðarnefndi reyndar ekki gert neitt sérstakt markvert síðan hann fékk verðskuldað Óskarinn fyrir Amadeus og sama má segja um Embeth Davidtz sem hefur ekki heldur gert neitt af viti síðan Schindler's List árið 1993. Það er í rauninni eins og allir þeir sem komu að gerð þessarar myndar hafi ekki vitað hvað þeir voru að gera. Gusum bara nógu miklu af blóði og ljótum andlitum, klippum það nógu hratt svo að enginn átti sig á því að þetta er ekki mjög vel gert og treystum síðan á heimsku og trúgirni áhorfenda. Það virðist allavega hafa verið planið miðað við gæði myndarinnar. Hún beinlínis móðgar þá sem horfa á hana.

Ég sé eftir þeim 500 kalli og klukkutíma og 50 mínútum sem ég eyddi í þetta. Ekki sjá þessa mynd. Hún er fullkomin hörmung ef svo má að orði komast.

Ég er kannski skrítinn, en til þess er athvarf svo margra ungmenna notað: kvikmyndir.

13Ghosts var áhugaverð að mörgu leiti; Hún byrjar vel, nær að halda sér vel á lofti fram yfir fyrri helminginn en dalar verulega þegar sígur á endann.

Margir fullkomlega góðir leikarar koma að gerð þessarar myndar og stendur F. Murray Abraham hvað mest upp úr, (verst að eina syndinn við þessa mynd er sú hve lítið hann er í henni). 13 Ghosts er fjarri því að vera týpísk hrollvekja á Hollywood staðlinum. Í henni er að finna vott af frumleika, sem skýrir stjörnufjöldan hjá mér, sem er, því miður, ekki nógu góð afsökun til þess að hlaupa út í bíó, þegar hún kemur, og láta af hendi rakna 800kr fyrir þunnri mynd með eitthvað skemmtanagildi.

Myndinn spilar mikið inn á sálfræðina hjá hverjum og einum sem sér hana: t.d er innilokunarkennd og hræðsla við rúmlítil pláss einna helst stærsti drifkrafturinn í söguþræðinum og nær að halda sæmilega vel í SCREAM/I KNOW WHAT YOU DID.. þyrstu áhorfendurnar sem botna þær myndir. En, aftur á móti, væru ákkúrat þeir eimmit líklegastir til að skjóta þessa mynd hvað mest niður, þar sem frumleikinn er helst til of mikill.

Þrátt fyrir að vera mjög góð hugmynd og einstaklega flott pæling, mun þessi mynd aldrei ná að lenda á top1000 listanum yfir bestu Hollywood A-B myndirnar.. Allt í lagi mynd og er allveg ágætis afþreyingar efni. 2og1/2 stjarna

Þetta er ágætis ræma sem kemur kanski ekki á óvart en ágætis skemmtun þó. Hún er ekki ein af þessum langlokum sem framleiddar hafa verið undanfarið, heldur rennur hún þægilega áfram án vandkvæða. Ágætis mynd sem minnir á köflum á myndir eins og the Cube og Hellraiser. Og fyrir þá sem þyrstir í hrollvekjur ætti þessi að vekja áhuga.

Það er gaman að sjá að Warner Bros. hefur ákveðið að halda aðeins í hefðina og halda áfram að endurvinna gömlu B-hrollvekjurnar eftir William Castle frá 6. og 7. áratugnum. Fyrir tveimur árum fékk House on Haunted Hill endurvinnsluna með misgóðum árangri, en þar sem Robert Zemeckis og Joel Silver standa að baki nýja Dark Castle framleiðslufyrirtækinu hefur verið gerð önnur tilraun. Í þetta sinn er myndin 13 Ghosts, sem Castle gerði 1960, valin til uppfærslu. Sagan segir frá nær gjaldþrota ekkjumanni með tvö börn og barnapíu sem fær einn daginn þær fréttir að gamall sérvitur frændi hans hafi dáið, og í kjölfarið eigi hann að erfa allar hans eigur. Það kemur í ljós að frændinn átti risastórt hús úr gleri, og þar geymdi hann alla þá muni sem hann sankaði að sér um ævina. Verst var að honum þótti einna skemmtilegast að safna að sér draugum og fanga þá. Þegar fjölskyldan mætir á staðinn ásamt verulega undarlegum draugasafnara (Matthew Lillard) fer allt til fjandans þar sem þau leysa draugana úr prísund sinni, og þeir eru allt annað en ánægðir með gang mála. Myndin er verulega hrollvekjandi og manni bregður oft mjög óþægilega. Það er væntanlega ætlunin svo það telst vera af hinu góða. Tæknibrellurnar eru mjög vel gerðar og það var greinilega engu til sparað þar. Leikmyndin er líka alveg einstök. Húsið er algjört listaverk, og ef ekki væri fyrir snobbið hjá akademíunni myndi ég persónulega vilja sjá Óskarstilnefningu fyrir þá vinnu. Leikurinn er ekki beint aðalmálið í svona mynd. Lillard er bráðfyndinn að venju og hann stelur myndinni. F. Murray Abraham ofleikur eins og hann eigi lífið að leysa, og það gengur ágætlega upp. Shannon Elizabeth og Tony Shalhoub gera lítið annað en að vera hrædd og hlaupa um, og rapparinn Rah Digga er snilld sem barnfóstran Maggie. Það er hálfundarlegt að sjá manneskju eins og Embeth Davidtz, sem hóf ferilinn í Schindler's List, í svona mynd. 13 Ghosts er í heildina séð óvenju flott gerð B-mynd, fyndin og hrollvekjandi til skiptis. Fínasta afþreying á köldu, dimmu vetrarkvöldi.