Spy Game (2001)

Ég verð að segja að ég bjóst við mun meira actioni og hún hefði getað orðið miklu flottari ef það hefði verið smá Mission impossible 1 stíll á þessu , en maður á aldrei að gera of miklar væntingar. En allanvegana þá er myndin flott, vel gerð og vel þess virði að sjá.

Hörkugóð spennumynd sem er nákvæm lýsing á njósnum og gefur glögga mynd af leyniþjónustu Bandaríkjanna, CIA. Leikstjórinn Tony Scott er algjör sérfræðingur í bæði njósna- og hasarmyndum og er sérstaklega flinkur þegar kemur að tæknihliðinni og má ævinlega stóla á að hann komi með betri tæknibrellur en síðast. Árið er 1991. Hér segir af ofurnjósnaranum Nathan Muir (Robert Redford) sem er í þann veginn að láta af störfum eftir farsælan feril hjá leyniþjónustunni. Hann mætir í vinnuna á síðasta vinnudeginum sínum og kemst að vinur hans og lærlingur Tom Bishop (Brad Pitt) hafi verið fangelsaður í Kína og að það eigi að taka hann af lífi. Hann veit að það verður ekki erfitt að hjálpa honum, en hann er staðráðinn í að gera sitt besta. Myndin er að mestum parti sögð í upprifjun allt frá fyrstu kynnum þeirra í stríðinu í Víetnam, og einnig af samstarfi þeirra í Beirút og Berlín. Óskarsverðlaunaleikstjórinn Robert Redford er án nokkurs vafa einn af þekktustu leikurum sinnar kynslóðar og á að baki magnaðan feril og leik í úrvalsmyndunum Butch Cassidy and Sundance Kid, The Sting, All the President's Men, Out of Africa, The Electric Horseman, The Way We Were, The Horse Whisperer, The Natural, Three Days of the Condor, The Candidate, Jeremiah Johnson, Up Close & Personal, Indecent Proposal, Sneakers, Havana, og mörgum fleirum úrvalsmyndum. Hann hlaut hinsvegar leikstjóraóskarinn 1980 fyrir kvikmynd sína Ordinary People sem var frumraun hans sem leikstjóra. Hann hlýtur heiðursóskarinn fyrir magnaðan feril sinn á Óskarsverðlaunahátíðinni í mars. Hér mætir hann Brad Pitt og eiga þeir báðir góðan leik í þessari mynd. Þetta er hinsvegar myndin hans Redford og hann fer á kostum í hlutverki njósnarans sem augljóslega er ýmsu vanur, rúnum rist andlit hans er augljóslega vitnisburður um að hann hefur upplifað margt. Ég hafði mikið gaman af þessari mynd og mæli eindregið með henni. Hún er fyrsta flokks afþreying fyrir spennufíkla

Traustur spennumynd úr smiðju Tony Scotts, sem hefur áður leikstýrt myndum á borð við Crimson Tide og Top Gun. Myndin fjallar í stuttu máli um gamlan njósnara á vegum CIA sem er í þann mund að setjast í helgan stein, en þannig vill til að á síðasta starfsdegi hans kemst fyrrverandi samstarfsfélagi og lærlingur hans í hættulega stöðu sem mun leiða hann til dauða innan sólarhrings nema eitthvað sé að gert. Sýnishornin fyrir myndina gefa töluvert öðruvísi hugmynd um hvernig mynd þetta er en raun ber vitni. Sagan er í raun og veru sögð út frá augum eldri njósnarans, leikinn af gamla brýninu Robert Redford, og samband hans við lærlinginn (Brad Pitt) er skýrt með flashback atriðum. Spy Game er mjög góð afþreying í flesta staði, en stundum fannst mér hún gera ráð fyrir að áhorfendur væru heiladauðir - til dæmis er margoft minnt á það að söguhetjan sé undir tímapressu og það er gert á ótrúlega klunnalegan hátt. Fyrir utan þetta hef ég ekki mikið á myndina að setja og mæli með henni fyrir þá sem þyrstir í traustan njósnatrylli.

Spy Game er þokkalegur njósnaþriller þar sem spennumyndameistaranum Tony Scott (Enemy of the State, Crimson Tide) hefur tekist að sameina tvo stórfína leikara (sem unnu áður saman við A River Runs Through it, árið 1992) og gott handrit. Myndin byrjar hálf klisjulega en fer svo út í hina fínustu atburðarás. Myndin gerist á árinu 1991, og segir frá tveimur CIA-mönnum, Nathan Muir (Redford) og Tom Bishop (Pitt). Eftir að Bishop verður handtekin í Kína fyrir njósnir, hefur hann aðeins sólarhring þar til að hann verður tekinn af lífi. Muir reynir að taka málin í eigin hendur, og um leið rifjar hann upp síðustu 16 árin, þegar þeir tveir störfuðu saman. Inn í söguna bætist svo við saklaus kona (sem Catherine McCormack (sem var óborganleg í Shadow of the Vampire) túlkar alveg ágætlega, þrátt fyrir að vera þunglynd næstum allan tímann sem hún sést á skjánum) sem tengist einu verkefni þeirra, en Pitt verður að sjálfsögðu hrifinn af henni. Eitt sem er svolítið skondið við myndina er að á meðan við fylgjumst með aðalpersónum myndarinnar í gegnum öll þessi ár, líta þeir alltaf nákvæmlega eins út. Redford og Pitt breytast svo lítið sem ekkert frá árinu 1975, til '91. En nóg um það. Útlit myndarinnar er glæsilegt og stíllinn sem Scott hefur hér á ferðinni, er sniðugur en oft afar þreytandi. Fjölbreytta kvikmyndatakan og snöggu klippingarnar eru bara too much og það mætti halda að leikstjórinn sé að reyna að hafa eitthvað músík-vídeó-look í gangi. Tónlistin fór líka oft í taugarnar á mér og fannst mér hún alls ekki vera við hæfi spennumyndar. Þetta er slík tónlist sem heyrist yfirleitt í slöppum drama-myndum. Aðalleikararnir eru samt skemmtilegir saman og myndin sjálf er fjandi góð afþreying sem ætti að ná athygli flestra í tvo tíma.

Hin fínasta Scott mynd sem heldur sig við efnið og heldur við þeim stöðuleika sem hín byrjar með. Bandarískum útsendara (Brad Pitt) er handtekinn í Kína fyrir njósnir og fær dauðadóm, en nú hefur gamli þjálfari (Robert Redford) hans séns í bjarga honum en tíminn er naumur og hann hefur 24 klukkustundir. Mest myndin gerist svona í flashback þegar Redford er að tala um Pitt og frammistöðu hans. Góð mynd sem heldur sig við efnið og hefur góðan leikstjóra.

Bara rétt að láta ljós mitt skína. Ég var rétt í þessu að klára að horfa á myndina og hún er þrælskemmtileg. Það er nú búið að fara í söguþráðinn hér að ofan og læt það duga. Redford hefur engu gleymt og er stórfínn í þessu hlutverki, plottið er gott og þessi 2ja tíma mynd heldur manni alveg við efnið allan tímann.

Fín skemmtun.

Spy Game fjallar um samband milli Nathan Muir (Robert Redford)sem er gamall jálkur innan CIA sem er að hætta störfum og Tom Bishop (Brad Pitt) sem Muir fékk til að ganga í raðir CIA til að leysa viðkvæm verkefni. Bishop er handtekinn af Kínverskum yfirvöldum í leyniaðgerð í Bejing og verður hann tekinn af lífi innan 24 stunda. CIA reynir að blanda sér ekki í málið svo að þetta komi ekki til með að skaða samskipti ríkjanna. En Muir á hinn bóginn líst ekki á þá hugmynd að skilja Bishop eftir og bíða eftir að vera tekinn af lífi. Hann fer að vinna að því að frelsa Bishop úr prísundinni. Þetta er hreint frábær thriller sem menn ættu ekki að láta fram hjá sér fara.

Áratug eftir að Robert Redford kom Brad Pitt á kortið í myndinni A River Runs Through It leiða þeir félagar hesta sína aftur saman með góðum árangri, þó gæðin nálgist ekki fyrri myndina. Spy Game er hin ágætasta spennumynd, mjög fagmannlega gerð (enda Tony Scott við stjórnvölinn) og afar slétt og felld í öllu yfirbragði. Redford leikur CIA-manninn Nathan Muir, sem er einn dag frá því að fara á eftirlaun (klisja, en það pirraði mig ekki hér). Hann fær fréttir af því að ungur félagi hans, Tom Bishop (Pitt), hafi verið handtekinn í Kína fyrir njósnir. Myndin gerist í raun öll á fundi í höfuðstöðvum CIA þar sem Muir segir yfirmönnunum allt um Bishop. Þetta gerir aðstandendum kleift að hoppa um í tíma og um allan heim... frá Víetnam til Austur-Þýskalands og svo til Beirút. Það er í þessum flashback-atriðum sem myndin á sína bestu spretti, og þau eru mjög vel leyst af hendi. Handritið heldur uppi spennu nær allan tímann og Redford og Pitt leika vel hvor á móti öðrum. Það er líka talsverður húmor í myndinni, einkum í því hvernig Muir fer með skrifræðisaumingjana hjá CIA. Spy Game er samt ekki gallalaus mynd. Catherine McCormack finnst mér passa illa í þriðja aðalhlutverkið, ástkonu Pitts sem leikur fleiri skjöldum en ég gat talið. Myndin gerist frá 1972 fram til 1991, og Pitt breytist ekkert allan tímann. M. A. s. í Þýskalandi á 8. áratugnum var hann klæddur í nær nútíma tískuföt og með nýjustu klippinguna á meðan allir aðrir gengu í ullarvestum og með hár niður fyrir augu. Tónlistin var ekki góð, og Scott notast við of mikið af gimmick-skotum, hröðuðum skotum, litaðri filmu, o. S. frv. Þegar maður tekur meira eftir tækninni en myndinni er of langt gengið. Þrátt fyrir þessa galla er Spy Game traustur þriller sem flestir ættu að geta verið sáttir við.