Armageddon (1998)

Ég hef tekið eftir því að margir eru að tala um að hún sé svo óraunveruleg. Það skiptir ekki baun máli ef myndin er skemmtileg, sem hún er. Hin loftsteinamyndin, Deep Impact, er lélegri því að hún er hæg eins og gömul kerling.

Þessi er algjörlega vonlaus.. og viðbjóðslega væmin og asnaleg. Fannst hún nógu slæm í fyrsta skipti sem ég sá hana en neyddist svo til að sjá hana döbbaða á ítölsku og svo á frönsku í rútuferð milli Frakklands og Ítalíu!! Skelfing.. fær hálfa stjörnu fyrir það að manni stökk nú stundum bros yfir hallærislegheitunum...

Ég verð að vera sammála Helga Páli sem skrifaði hér áðan að Armageddon stóðst ekki undir mínum væntingum. Bæði handritið og leikurinn var hálf misheppnaður og sérstaklega var söguþráðurinn lapþunnur, hálfgerð eftiröpun af vinsælli myndum um þetta sama eða svipað efni. Ég fór með miklar væntingar í brjósti í bíó í sumar til að horfa á Armageddon en þær vonir voru fljótar að hverfa sem dögg fyrir sólu. Það eru því bæði dýr og hryllileg mistök sem birtast þeim sem sjá Armageddon. Hún verðskuldar því fyllilega ekki yfir tveim stjörnum, hámark

Loftsteinahríð hrellir New York búa, geimskutla springur í loft upp, og ekki líður á löngu þar til stjörnuvísinda áhugamaður upplýsir NASA að hann hafi uppgötvað risa loftstein. Þannig byrjar Armageddon með fullum hasar og spennu. Fljótlega gera NASA menn, með Dan Truman (Billy Bob Thornton) í forustu, sér grein fyrir að þessi loftsteinn er sömu stærðar og Texas og mun hitta jörðina innan 18 daga. Þeir kalla til Harry S. Stamper (Bruce Willis), besta bormann sem vitað er um, til að lenda á loftsteinum, bora holu í hann, og sprengja hann í loft upp. Ég mæli alltaf með myndum sem eru framleiddar af Jerry Bruckheimer. Hann hefur framleitt myndir eins og Con Air og The Rock. Hingað til hef ég ekki orðið fyrir vonbrigðum, né heldur þegar ég sá Armageddon. Þetta er hröð og mjög vel gerð mynd. Armageddon er líka með alveg mátulegri blöndu af alvörugefnum og gamansömum atriðum, þó svo bandaríska þjóðernisstoltið fari nú stundum yfirum. Sérstaklega er Billy Bob Thornton góður, ásamt Steve Buscemi sem aldrei bregst og Will Patton sem ég persónuleg hef mikið álit á. Samskipti Harry og A. J. (Ben Afflick) eru gamansöm, en Liv Tyler sem leikur dóttir Harry, Grace Stamper, er frekar litlaus karakter. Besti partur myndarinnar er þó án efa rússneski geimfarinn Lev Andropov (Peter Stormare) sem gerir skemmtilega grín að könunum. Ég mæli með Armageddon, en aðeins fyrir þá sem vilja sjá léttmeti, góða spennu og smá grín.

Ef þig langar að æla yfir yfirþyrmandi væmni þá skaltu horfa á þessa vitleysu hérna. Þetta er svona séramerísk mynd um einhverja aumingja sem að sjálfsögðu verða hetjur að lokum. Þetta er örugglega ein mesta þvæla sem fest hefur verið á filmu hin síðari ár og er ekki boðleg fólki með smá skynsemi í toppstykkinu. Steve Buscemi fær þessa hálfu stjörnu en hann er eina persónan sem er þolanleg í þessari mynd. VARIST ÞESSA ÞVÆLU.....

Armageddon er tvímælalaust ein af verstu kvikmyndum sögunnar og slær jafnvel út hina alræmdu Plan 9 from Outer Space eftir Ed Wood. Kemur þar einkum til nautheimskur söguþráður um nokkra auðsjáanlega treggáfaða olíuborpallsverkamenn, sem af öllum mönnum eru sendir í snarheitum út í geiminn til að bora holu í risastóran loftstein, svo hægt verði að sprengja hann í tætlur með kjarnorkusprengju áður en hann rekst á jörðina og grandar öllu lífi á henni. Til öryggis hafa þeir jafnframt Gatling vélbyssur á borvélunum rétt eins og von sé á óvættunum úr Alien myndunum eða einhverju því um líku. Allt er þetta síðan sett fram með hraðri glundroðakenndri kvikmyndatöku og hverju fáránlega hasaratriðinu á fætur öðru, sem gera það eitt að drepa niður alla spennu, og kryddað með yfirgengilegri væmni og svo óþolandi bandarískum þjóðernisrembingi, að myndir á borð við Triumph des Willens blikna í samanburði. Þrátt fyrir allt Hollywood fjáraustrið við gerð myndarinnar, valda tæknibrellurnar víða vonbrigðum eins og logandi brak úti í geimnum og æði gervilegt umhverfið á loftsteininum. Þetta misheppnaða samkrull af hasar, vísindaskáldskap, andlausum húmor, spuna og stórslysamyndaþema gefur til kynna, að hvorki leikararnir né leikstjórinn hafi vitað út á hvað myndin átti að ganga, enda einsýnt, að launin ein hafi laðað að. Wood gerði myndir sínar af hugsjón og í þeim má finna vott af barnslegri einlægni, en hér ræður metnaðarleysið eitt ríkjum. Enda þótt Plan 9 from Outer Space sé með ólíkindum vond mynd, er skemmtanagildi hennar ótvírætt og eykst jafnvel við endurtekna áhorfun. Armageddon er hins vegar ekki aðeins hörmulega illa gerð, heldur hreint út sagt hundleiðinleg og allt of löng. Hún er skólabókadæmi um Hollywood framleiðendur, sem halda, að þeir geti sagt kvikmyndahúsgestum upp í opið geðið, að þeir séu svo heimskir, að það sé hægt að bjóða þeim upp á hvað sem er. Ég sé ekki aðeins eftir því að hafa borgað mig inn á myndina, ég er satt að segja sármóðgaður.

Hvað er eiginlega að? Fullt af fínum leikurum og margar milljónir dollara...og ekkert gerist. Risastór loftsteinn stefnir á jörðina og ráðamenn senda nokkra olíubormenn, hvern öðrum vitlausari, að freista þess að sprengja hann í loft upp. Bruce Willis fremstur í flokki hóps ágætisleikara sem ættu allir að skammast sín fyrir að taka þátt í þessari vitleysu. Tæknibrellurnar flottar en stundum ekki alveg að gera sig, t.d. logandi brak í geimnum. Þeir sem hafa gaman af svona ættu að leita sér aðstoðar.

Þessi mynd er ekki mjög eftirminnileg, já þetta er sama hugmyndin og í Deep Impact. Það stefnir risaloftsteinn á jörðina og hópur hugrakkra geimfara eru sendir til að eyða steininum. Það þarf auðvitað enginn að óttast þegar Bruce Willis fer fremstur í flokki, hann gerir myndina hálf fyrirsjánlega. Samt eru brellurnar góðar.

Armageddon er án efa heimskasta mynd sem ég hef séð. Hún er svo tilgerðarleg, léleg, leiðinleg og illa leikin að manni verður illt. Deep Impact var mun betri vegna þess að hún var tilfinningarík, skartaði góðum leikurum og var ekki bara að sýna hvað væri hægt að eyða miklum peningum í tæknibrellur. Armageddon inniheldur mörg flott brelluatriði, en handritið er ekkert að reyna að búa til mikið í kringum það. Reyndar er ekki neitt í kringum það. Bruce Willis er svo ömurlegur að það hálfa væri allt of mikið, Liv Tyler kann ekki að leika og Ben Affleck ætti að fremja sjálfsmorð svo að ég þurfi ekki að drepa hann sjálfur. Líf hans er ekki þessi virði að lifa því. Húmorinn, sem er svo þröngvaður og illa skrifaður (og nær eingöngu fluttur af Steve Buscemi), hittir aldrei í mark og öll þjóðernisástarvæmnin er óþolandi. Armageddon er bara gott dæmi um það hvernig myndir með miklum látum en engu öðru eru að taka yfir sumarmarkaðinn. Ekki styrkja þessa þróun: brennið öll eintök af Armageddon sem þið sjáið...

Flottar brellur en mjög takmarkað handrit. Er það bara ég eða er þessi mynd skuggalega lík Deep Impact? Leikararnir standa sig ágætlega og það má hlæja að nokkrum atriðum en yfir heildina finnst mér myndin ekki standa undir væntingum.