Drop Dead Gorgeous (1999)

Ég hefði gefið henni fjórar stjörnur ef hún hefði ekki byrjað svona leiðinlega. Engu að síður er þetta frábær svört kómedía um það hve fáránlegar fegurðarsamkeppnir geta verið. Ellen Barkin var skemmtileg og fyndin sem móðir Amber (Kirsten Dunst). Kirsten Dunst tekst vel upp eins og Denise Richards sem leikur Becky, forríka, ofdekraða stelpu og Kirstie Alley sem leikur mömmu Becky sem svífst einskins til að dóttir sín vinni. Mörg atriði eru frábærlega fyndin eins og þegar Becky sýndi atriðið sitt og þegar þær voru að æfa stigaatriði. Farið á hana hún er FRÁBÆR.

Eina ástæðan fyrir því að ég tók þessa mynd á leigu var sú að Kirsten Dunst leikur í henni enda hef ég verið mikill aðdáandi hennar alveg síðan hún heillaði mig upp úr skónum sem lítil stelpa í Interview with the Vampire um árið og ég verð eiginlega að segja að hún eigi þessa einu stjöru sem ég gef þessari mynd enda söguþráðurinn ekki upp á marga fiska og þó að Denise Richards sé rosa falleg og með flottan barm þá bara getur hún ekki leikið, greyið eins og sást bara best í nýjustu James Bond myndinni og Kristie Alley er hundleiðinleg sem mamma Denise en Ellen Barkin stóð sig þokkalega og hefði mátt vera meira í myndinni.

Drop Dead Gorgeous er mynd sem ég hef beðið eftir í mjög langan tíma, eða alveg frá því að hún var sögð ein fyndnasta mynd síðasta árs. Hún er kannski ekki svo góð, en góð er hún og vel þess virði að sjá. Ef þið hafið lesið eitthvað um þessa mynd þá vitið þið að hún fjallar um fegurðarsamkeppni sem endar í miklum ósköpum. Leikararnir standa sig mjög vel, Kirstie Alley og Denise Richards eru fullkomnar sem rík móðir og ofdekruð dóttir, Kirsten Dunst er á góðri leið með að verða áhugaverðasta leikkona í Hollywood og Ellen Barkin er fyndin, en frekar lítið notuð í myndinni. Húmorinn er á tímum alveg frábær (t.d. mæmið sem fyrrverandi fegurðardrottningin flytur í hjólastól) en það kemur kannski engum á óvart að hann ætlaður Ameríkönum sem eiga örugglega auðveldara með að fatta marga brandara. Loka mínúturnar voru kannski svolítið langdregnar, en í heildina er Drop Dead Gorgeous mjög ánægjuleg lítil mynd!

Frekar döpur svört komedía sem segir frá fegurðarsamkeppni í smábæ nokkrum. Myndin er sett fram sem gervi-heimildarmynd eða "mockumentary" (ekki alls ólíkt The Blair Witch Project) og kynnir áhorfendur fyrir aðstandendnum keppninnar og keppendunum sjáfum sem allar eru unglingsstúlkur. Fókusinn liggur helst á tveim keppendanna en það eru Amber (Kirsten Dunst) og Becky (Denise Richards, versta Bond stúlka sögunnar að mínu mati). Amber á fátæka fjölskyldu og býr í hjólhýsi á meðan Becky er dóttir ríkustu hjónanna í bænum og það vill líka þannig til að móðir hennar Gladys (Kirstie Alley) sér um keppnina. Fljótlega fer keppendum grunsamlega að fækka og það verður ljóst að spilling er í spilinu. Allar persónur í þessari mynd eru mjög flatar og leikurinn er alveg eftir því, ég sé enga ástæðu til að lofa neinn leikara fyrir framlag sitt hérna. Það koma fyrir fyndnir punktar í myndinni en þeir eru of fáir og dreifðir, restin er mest til leiðinlegur aulahúmor. Sem ádeila á það hversu fáránlegar fegurðarsamkeppnir geta verið gengur myndin að vissu leiti upp en vandamálið er að þetta hefur verið gert áður. Ég man til dæmis eftir The Simpsons þætti þar sem gert var mjög svipað grín af fegurðarsamkeppnum (Lisa tók þátt í Little Miss Springfield) nema það heppnaðist betur, var fyndnara og tók bara 25 mínútur. Þetta er mynd sem að skilur mann eftir með lítið sem ekkert og get ég því miður ekki mælt með henni.