Ed Wood (1994)

Frábærlega skemmtileg mynd. Ed Wood hefur verið ansi sérstakur náungi svo ekki sé meira sagt. Hann gerði margar skemmtilegar hallærislegar myndir, sannkallaðar B myndir eða þaðan að verra. En þessi mynd er alls ekki B mynd nema síður sé, þetta er A mynd í plús. Depp sýnir stórleik hérna án efa einn besti leikari sem fram hefur komið seinni árin. Mæli svo sannarlega með þessari mynd fyrir alla kvikmyndaáhugamenn.

Já, Wood kallinn var mjög örugglega versti kvikmyndagerðarmaður allra tíma. Einhverskonar "reverse" útgáfa af fyrirmynd sinni, Orson Welles. En kvikmyndasagan væri ekki söm án hans og það er það sem þessi mynd gengur út á. Hún segir frá hvernig Wood, ásamt fullkomlega snarbiluðum félögum sínum, tókst af framleiða hvern skítinn á fætur öðrum. Hún kemur líka inn á býsna skrautlegt samband hans við tvær kærustur og segir frá löngun hans til að ganga í kvenfatnaði. Þetta er ljómandi skemmtileg og skrautleg ræma og ekki er verra að vera búinn að sjá eitthvað af "meistaraverkum" Wood áður en horft er á hana. "Don´t look back in angora".

Frábær mynd um leikstjóra sem var ekki að láta smáu né stóru atriðin koma í veg fyrir að hann gerði myndir sem féllu að hans einstöku sýn. Allir leikararnir standa sig vel og þegar þið eruð búin að horfa á þessa þá er gott að kíkja á upprunalegu myndir Wood sem eru frábærar.

Kvikmyndasagan geymir marga sérstæða og ógleymanlega karaktera. Einn þeirra var hiklaust Ed Wood sem hér er leikinn af leikaranum Johnny Depp. Snemma kom í ljós að hann bar í brjósti sér þann draum að verða kvikmyndagerðarmaður og leikstjóri. Reyndar ákvað hann að láta ekkert koma í veg fyrir að hann léti drauma sína rætast og skellti sér í að gera kvikmyndir. Þegar fyrstu myndir hans bar fyrir augu gagnrýnenda var samdóma álit þeirra að verri og lélegri myndir hefðu vart verið gerðar í Hollywood. En dómar þessir höfðu engin áhrif á Ed Wood sem hélt sínu striki og safnaði um sig hópi fólks sem átti það sameiginlegt að vilja starfa með honum, þrátt fyrir algert hæfileika ogeða getuleysi. Þeirra á meðal var hinn útbrunni drykkjumaður, Bela Lugosi (Martin Landau hlaut óskarinn sem besti leikari í aukahlutverki 1994 fyrir meistaralega túlkun sína á honum), en hann lék í velflestum myndum Woods og lét sér yfirleitt nægja áfengi eða aðra vímugjafa að launum. Leikstjóri þessarar frábæru myndar er Tim Burton sem fékk brennandi áhuga á Ed Wood og lífshlaupi hans eftir að hann sá myndir á borð við Plan 9 From Outer Space og Glen or Glenda eftir Wood og einsetti hann sér að gera mynd um þennan afar sérstaka mann sem lét engan segja sér fyrir verkum eða trufla sig á leið sinni að takmarki sínu. Með önnur helstu hlutverk fara Sarah Jessica Parker sem leikur vita vonlausa leikkonu, Patricia Arquette sem leikur eiginkonu Woods og Bill Murray, gamanleikarinn góðkunni. Meistaraleg úttekt á lífi, starfi og persónu þessa litríka kvikmyndaleikstjóra sem fór á spjöld kvikmyndasögunnar sem einn af misheppnuðustu leikstjórum allra tíma. Ég gef myndinni þrjár og hálfa stjörnu og mæli ég eindregið með henni við alla unnendur stórfenglegra meistaraverka. Þessi mynd er svo sannarlega í þeirra hópi

Frábærlega skemmtileg og góð mynd um ömurlegasta kvikmyndagerðarmann allra tíma. Burton fer varlega með efnið og er þessi sanna saga gerð og skrifuð eins og hún sé skáldskapur í venjulegri kvikmynd. Mjög skemmtilega gert. Leikur er til fyrirmyndar, allar aukapersónur skemmtilegar, það eina sem mér fannst vanta var tónlistin hans Danny Elfman, en Howard Shore stendur sig ágætlega. Þetta er mynd sem allir verða að sjá!