Tökur eru hafnar á kvikmyndinni Fiskar á þurru landi í stúdíói Sagafilm við Laugaveg en myndin verður sýnd í tveimur hlutum á RÚV um páskana.
Myndin verður tekin upp á aðeins átta dögum.
Í tilkynningu frá Saga film segir að það séu ánægjulegar fréttir að RÚV hyggist taka virkan þátt í kvikmyndavorinu með því að bjóða upp á frumsýningu á glænýju íslensku efni um páskana.
„Fá fordæmi eru fyrir því og er þetta vonandi merki um það sem koma skal í ljósi aukinnar fjárveitingar til kvikmyndagerðar.“
Óskar Jónasson leikstjóri ræðir við Hilmar Guðjónsson leikara á tökustað
Fiskar á þurru landi gerist á gistiheimili í litlu plássi úti á landi en myndin er byggð á leikriti eftir Árna Ibsen. Handritið skrifuðu þeir Óskar Jónasson og Sjón en Óskar er enn fremur leikstjóri myndarinnar. Óskar er Íslendingum að góðu kunnur og hefur meðal annars leikstýrt sjónvarpsþáttaseríunum Pressa, Svartir englar og Stelpurnar.
Í stúdíói Sagafilm er nú búið að byggja gistiheimilið í heild sinni þar inni.
„Það er gríðarlega mikil vinna sem liggur á bak við þessa metnaðarfullu sviðsmynd en upptökur á myndinni taka aðeins átta daga sem er talsvert styttra tökutímabil en gerist og gengur,“ segir í frétt Saga film.
Fjórir leikarar leika í Fiskar á þurru landi lífi. Það eru þau Ólafía Hrönn Jónsdóttir, Hilmar Guðjónsson, Sara Margrét Nordahl og Davíð Guðbrandsson.
Myndin er framleidd af Sagafilm en Sagafilm hefur áður framleitt sjónvarpsseríur eins og Vaktarseríurnar, Pressu, Rétt, Ástríði og Svarta engla sem og kvikmyndirnar Bjarnfreðarson og Köld slóð.