Í dag eru 25 ár liðin síðan jólamyndin vinsæla Home Alone var frumsýnd vestanhafs. 
Þá lenti hinn 8 ára Kevin McCallister í því að vera skilinn aleinn eftir heima á meðan fjölskyldan hans fór í frí til Parísar um jólin.
Catherine O´Hara, sem lék móður Kevin, segir söguþráðinn alls ekki óraunhæfan. „Þetta er vel mögulegt,“ sagði hún í nýlegu viðtali.
„Mamma og pabbi eignuðust sjö börn og einu sinni fluttu þau frá einu húsi yfir í annað og skildu systur mína eftir,“ sagði hún.
Home Alone var frumsýnd 16. nóvember 1990 og nefna hana margir á meðal uppáhalds jólamynda sinna. Hún var vinsælasta mynd ársins og rakaði inn um 476 milljónum dala um heim allan.
„Ég hef mjög gaman af því þegar ég frétti af ungu fólki sem var börn þegar myndin kom út sem horfir á hana á hverjum jólum. Ég er þakklát fyrir að vera hluti af jólahefðum fólks,“ sagði O´Hara.