Fjölheimar mætast á ný í AXL

Kvikmyndin Everything Everywhere Alll At Once (e. EEAAO) hlaut á dögunum 11 tilnefningar til Óskarsverðlauna, meðal annars í flokki bestu kvikmyndar, bestu leikstjórnar og fyrir besta frumsamda handrit.

Í tilefni þess mun verða haldin sérstök sýning á myndinni laugardaginn næstkomandi, 4. febrúar, í AXL-sal Laugarásbíós. Myndin var sýnd í fáum kvikmyndahúsum á Íslandi og eru eflaust margir sem sjá eftir því að hafa ekki fengið að upplifa þetta verk á stærri skjá.

Ef þú vilt sjá myndina aftur, átt enn eftir að sjá eða þekkir einhvern sem hefur ekki enn séð hana, er þetta kjörið tækifæri til að ná þessu yndislega súra ævintýri aftur á risa tjaldi.

Með aðalhlutverkin fara Michelle Yeoh, Ke Huy Quan, Stephanie Hsu, Jamie Lee Curtis og James Hong.

„Einstakt tækifæri til að njóta veislunnar aftur á einu stærsta kvikmyndatjaldi landsins.“

Þetta segir í lýsingu viðburðar á Facebook og enn fremur: „EEAAO er ein stórundarlega einstök tegund af bíómynd. Það fer ekki á milli mála að þessi metnaðarfulla litla gegnsúra dramakómedía hefur vakið gríðarlega athygli um heim allan… 

Til að fagna hæpinu, hamingjunni og herlegheitunum hjá þessari sigursælu litlu, frábæru lítilmagnamynd hyggjumst við hjá Bíófíklum og Poppkasti vera með sérstaka sýningu á henni næstkomandi laugardag.

Hlæjum, grátum, fögnum og flippumst öll.“

Miðar eru aðgengilegir á vef Laugarásbíós.