Með eitt stórt Super Mario bros

Ítalski píparinn frá Nintendo er með þekktari fígúrum veraldar. Frá upprunalegri sköpun var alltaf tímaspursmál hvenær hann myndi rata á bíótjaldið – og í hvaða búningi.

Aðeins nokkrum vikum áður en Júragarðurinn sigraði heiminn rötuðu Maríóbræður í kvikmyndahús og þá við lítinn hvell. Afraksturinn var nægilegt slys til að Nintendo hafnaði því lengi vel að koma bræðrunum aftur í kvikmyndaform… þangað til á næsta ári.

En þó, þrátt fyrir slæmar viðtökur og óskiljanlegar ákvarðanir í framleiðslunni, leynist í SUPER MARIO BROS. (1993) einhver stórfurðulegur kúltúr-gimsteinn með merka sögu að baki.

Þið getið sagt hvað sem þið viljið um þessa svokölluðu tölvuleikjamynd, en hún er mikill brautryðjandi í þeirri brand-bólu að taka ‘gritty reboot’ nálgunina á frægt, peppandi vörumerki.

Drengirnir í Poppkúltúr setja á sig verkfærabeltin og meta skaðann. Er þetta költ eða kex? Og hvers vegna eru Mario-bræður ekki bræður?

Þáttinn má nálgast gegnum Spotify hlekk hér að neðan, en sarpur Poppkúltúrs er að finna hér í heild sinni.