Leikin bíómynd er nú á leiðinni eftir manga teiknimyndasögum Hajime Isayama, Attack on Titan, en sögurnar hafa notið mikilla vinsælda síðan þær komu fyrst á sjónarsviðið árið 2009. Búið er að gera teiknimyndir fyrir sjónvarp eftir bókunum, nokkra tölvuleiki ofl.
Sagan gerist þegar mannkynið er við það að verða þurrkað út af yfirborði jarðar, af risum sem kallast Titans, sem virðast birtast út úr buskanum, og ráfa um Jörðina í leit að mönnum til éta.
Enginn veit hvað risarnir ætla sér, og í fyrstu virðist sem útilokað sé að drepa þá eða eiga við þá samskipti. Þær fáu hræður sem enn eru eftirlifandi á Jörðinni af mannkyninu, búa á bakvið stóra varnarveggi. Sagan í myndinni fjallar um ungan mann að nafni Eren, sem gengur til liðs við Survey Cops, herdeild sem ætlar sér að drepa Titan risana, eftir að hafa horft upp á dauða móður sinnar í einni árás risanna á þorpið hans.
Leikarar í myndinni eru allir japanskir og áætlað er að sýna myndina í nokkrum bíóhúsum í Bandaríkjunum.
Búið er að gera stiklu með enskum texta og hana má sjá hér að neðan, en eins og sést í stiklunni eru risarnir frekar óhugnanlegir, með dauð augu, og risastóra munna, sem henta vel til að háma í sig mannfólkið.
Eins og sést í stiklunni þá er einungis hægt að drepa risana með því að ná til svæðis á hnakka þeirra, sem er þeirra eini veiki hlekkur.
Búið er að heimsfrumsýna myndina í the Egyptian Theatre í Los Angeles, en myndin verður frumsýnd í Japan 1. ágúst nk.
Strax 19. september er svo von á annarri myndinni; Attack of Titan: End of the World.