Föstudaginn 28.nóvember verður This Is Where I Leave You frumsýnd í Sambíóunum.
Fjögur uppkomin systkini þurfa að heiðra hinstu ósk látins föður síns og eyða heilli viku á æskuheimilinu ásamt móður sinni. This is Where I Leave You er skemmtilegt gamandrama með úrvalsleikurum í helstu hlutverkum og í leikstjórn Shawns Levy sem gerði m.a. Night at the Museum-myndirnar, Real Steel og nú síðast myndina The Internship með þeim Vince Vaughn og Owen Wilson í aðalhlutverkum.
Við kynnumst hér fyrst hinum ólánssama Judd Altman sem missir bæði vinnuna og heimilið í kjölfar þess að hann kemur að eiginkonu sinni í rúminu með yfirmanni sínum. Ekki batnar staðan þegar faðir hans deyr skömmu síðar og Judd, sem er þjakaður af eftirsjá og biturð, þarf að eyða heilli viku á æskuheimilinu ásamt fjórum syskinum sínum og móður í samræmi við trúarhefð gyðinga og að ósk hins látna. Á þessari viku þarf fjölskyldan að taka á móti ýmsum gestum sem koma til að votta hinum látna virðingu sína og aðstandendum samúð og um leið komumst við að því að hin systkinin, þau Wendy, Phillip og Paul, glíma hvert fyrir sig við sín eigin vandamál, rétt eins og Judd, svo ekki sé talað um móður þeirra, hina lífsglöðu Hillary sem hefur aldrei átt í vandræðum með að segja meiningu sína og liggur ekki á skoðunum sínum á afkvæmunum frekar en fyrri daginn.