Hancock (2008)

Já hann Hancock er að mínu mati fínasta skemmtun. Eftir að ég ákvað að fara á hana með föður mínum var ég svolítið kvíðinn því þessi mynd virtist ekki vera að fá neitt góða dóma en þetta var bara rosalega góð mynd og við feðgarnir hlógum mjög mikið af þessari mynd. En eins og gerist oft eru sýnd atriði í trailernum sem eru ekki í myndinni eins og það voru nokkur sem ekki voru sýnd í myndinni. En ég mæli með þessari mynd 9,5 af 10 hjá mér.

Hancock er ofurhetjumynd sem, að ég held sé ekki byggð á neinum myndasögum. Will Smith leikur titilpersónuna sem virðist hafa þrjá af ofurkröftum Superman þ.e. líkamsstyrkinn, ósæranleikann og flugorkuna. Nema John Hancock þessi er drykkjurútur og satt að segja ekkert mjög vinsæll en röð (ó)heppilegra atvika breyta því. Þessi mynd hefði eiginlega getað orðið mun betri en hún er. Hún kemur með fullt af góðum hugmyndum og sumar fá að njóta sín og aðrar ekki en hún er keyrð áfram af leiðinlegum söguþræði sem spillir mörgu. Einnig er þessi heilmikla breyting á Hancock persónunni alveg skelfileg, ég kunni mun betur við hann í byrjun og þó að þetta hafi verið nauðsynlegt þá fannst mér þetta afturför. En allt í allt sniðug mynd og fínar tæknibrellur en ég sá samt mynd sem hefði getað orðið betri. Tvær stjörnur.

Það er áhugavert, óvænt og skemmtilegt að fá eins og þrumu úr heiðskýru lofti, á miðju hetjusumri, ofurhetjumynd sem er ekki Marvel. Og þetta er engin smá ofurhetja, heldur hetja sem beygir aðrar hetjur auðveldlega í duftið, eða ég sé fáar Marvel hetjur með jafn hrikalega krafta og Hancock. Will Smith er flottur og Charlize Theron og Jason Bateman líka en myndin hefði kannski mátt vera betur skilgreind, þ.e. grín, hasar, spenna, sci-fi. Auk þess hefði verið gaman að fá aðeins meiri kjöt á beinin þegar kom að útskýringum á hvaðan Hancock kom og afhverju hann er til. Þetta er svona Hálendingurinn í þúsundasta veldi.En ég hafði gaman að þessu og kannski var skemmtilegast hvað menn kipptu sér lítið upp yfir þessari hetju og enginn var að velta neitt vöngum yfir henni. Hún var bara þarna, ....af því bara.

Ég er ansi hrifinn af Will Smith sem leikara, hann fær allavega alltaf ákveðið goodwill hjá mér þegar ég sé nafnið hans á plakati. Ég mætti þessari mynd með talsverðar væntingar enda finnst mér Jason Bateman vera ansi skemmtilegur líka. Strax frá fyrstu mínútu er hraðinn keyrður áfram og myndin heldur í kómísku hliðarnar vel að hléi. Leikararnir standa sig allir vel í hlutverkum sínum, þó svo að handritið sé svolítið formúlukennt.Þegar litið er á myndina í heild sinni þá er hún alger froða - en ekki endilega á slæman hátt. Myndin er með skemmtilegt plot twist sem gerir það að verkum að það sem maður býst við að gerist næst er ekki endilega það sem handritshöfundarnir höfðu í huga. Hún heldur uppi hraða og skemmtun yfir klukkustundina, en síðan hægist of mikið á henni og ókláraðir endar hér og þar koma í ljós. Það helsta sem ég saknaði var virkilega góð spenna, en það er varla hægt að segja að ég hafi verið með spennufiðring í maganum á einhverjum tíma í myndinni.Myndin getur samt sem áður ekki ákveðið sig hvort hún eigi að vera grín eða spenna og er því eins og svart og hvítt á tímum. Þessi blanda, ásamt plot twistinu, gerir hana öðruvísi en gerir það einnig að verkum að hún fangar mann ekki jafnmikið og hún gæti annars gert.Niðurstaðan er því vel ásættanleg og öðruvísi ofurhetjumynd en engin snilld þó. Hún hefur ofanaf manni og er sæmilegasta afþreying á hvíta tjaldinu. 2 og 1/2 stjarna. (af 4) - 6.5/10