Scream 3 (2000)

Scream 3 er ein af þessum hryllingsmyndum sem hafa glataðan endi ég tek td. I still know ........, Urbran Legent og Scream 2 en allar þessar myndir eru ný tegund af hrollvekju ( sem nefnist unglingahrollvekja ). Leikarar myndarinnar eru algjörir B-myndaleikarar og fer þar í fararbroddi Neve Campell, einnig eru þau með leikara eins og Contrey Cox og David Arquette ( sem í raun og veru ætti að vera laungu dauður síðan í Scream 2 ). Engu að síður var þessi mynd betri en tvö myndin (enda þurfti nú ekki mikið til). Upprunarlega Scream myndin var eina myndin sem er góð.

Ég fór á þessa mynd kl 24 á föstudag. Ég fíla hinar tvær Scream myndirnar mjög mikið en þessi er seinasta myndin og mér finst hún vera best af þeim öllum. það er meira grín og fleiri morð í þessari mynd og ég hef aldrei áður fengið svona mikið adrenalín kick í bíó-i, miklu meira en á hinum 2 myndunum. Ég gef Scream 1 þrjár stjörnur og Scream 2 tvær og hálfa stjörnu. En þessi er miklu betri og fær því fjórar stjörnur. Ég mæli með að allir fari á þessa mynd.

Ok hér er botninum náð ég veit ekki hvað Wes Craven er spá með þessari steypu en þessi mynd er leiðinlegasta myndin í seríunni og ég vona að það komi ekki fleiri myndir. Í þessari mynd þá er Sidney komin í felur en svo fer einhver að drepa alla í scream búiningum og hún fer úr felum og reddar málunum algjör steypa Wes Craven getur gert betur en þetta enda vantar líka Kevin Williamson að skrifa handritið og myndin ber þess glögglega merki!

Sumir hérna að ofan virðast hafa eitthvað á móti framhaldsmyndum. Oft hafa verið gerðar of margar framhaldsmyndir um góða hugmynd sem hafa svo verið hver annarri verri, en það á ekki við um Scream 3. Náttúrulega skilur söguþráðurinn ekki mikið eftir sig, enda gerði hann það heldur ekki í fyrri myndunum. Það sem máli skiptir er stemmninginn, ég skellihló og öskraði til skiptist á myndinni og svoleiðis á það að vera. Ég segi að sá sem fílaði Scream og Scream 2 á eftir að fíla þessa mynd. Engin leið var til þess að geta hver(jir) morðinginn(jarnir) voru og kom það skemmtilega á óvart þó að það væri e.t.v. dálítið langsótt eins og í fyrri myndunum. En eins og ég segi þá er það skemmtanagildi myndarinnar sem gefur henni 3 stjörnur.

Scream var mjög góð mynd sem kom kvikmyndageira sem var í andarslitrunum af stað aftur. Í kjölfar hennar fylgdi ágæt mynd, I Know What You Did Last Summer, en þar átti að láta staðar numið. Allar unglingahrollvekjur sem fylgdu þessum tveimur eftir voru mjög misjafnar að gæðum og þá allar undir meðallagi. Scream 2 þjónaði engum öðrum tilgangi en þeim að reyna að endurskapa þá múgsefjun sem í kringum forverann myndaðist. Líkt var uppi á teningnum með Urban Legend og I Still Know ... Nú er hins vegar hægt að fullyrða að botninum hafi verið náð. Scream 3 er því miður ekkert annað en kátbroslegt samansafn af ömurlegum bröndurum og veikburða tilraunum til þess að reyna að ná sama stíl og Scream hafði, það er að segja vísunum í aðrar hryllingsmyndir og einhverjum ömurlegum sjálfsvísunarhúmor sem er afar fjarri því að hitta einhvers staðar í mark. Wes Craven hefði alveg eins getað gert mynd með VHS myndavél og látið fólk af götunni þylja upp handritið; „leikhæfileikar“ þess og „fyndni“ hefði notið sín alveg eins vel. Handritið er, eins og þið hafið án efa getið ykkur til, algjör hryllingur og býður ekki upp á neina nýja nálgun á þennan nýskapaða þríleik. Persónulega lít ég á síðustu tvær Scream myndir líkt og seinni Freddie-myndirnar; ég tel þær ekki sem Scream-myndir, aðeins hræðilegar og aumkunarverðar tilraunir til þess að græða pening. Scream 3 stendur engan veginn undir væntingum og er hreint út sagt meðal verstu hryllingsmynda sem gerðar hafa verið. Öll framvinda myndarinnar er móðgun við gáfur áhorfenda og má með sanni segja að seinasti hálftími hennar – og þá það hver er morðinginn og hvað verður um persónurnar – einfaldlega versti tímapunktur kvikmyndasögunnar; allt er svo yfirmáta hallærislegt og fáránlegt að ég varð klökkur yfir því að hafa eytt 650 krónum í svona viðbjóð. Fólki sem líkaði við Scream á ekki að láta bjóða sér svona blauta tusku í andlitið frá hendi Wes Craven og ætti að hunsa myndina og afneita því að hún hafi nokkurn tíma verið gerð. Þessi eina stjarna kemur til vegna þess að ég uppgötvaði þá gleðilegu staðreynd að í samanburði við þessa kvikmyndarnefnu og íslenskar kvikmyndir verða þær íslensku góðar. ÞÁ ER MIKIÐ SAGT!

Ég veit að stjörnugjöf mín virkar sláandi fyrir Scream aðdáendur en það er nú bara einfaldlega þannig að þessi mynd var vægast sagt mjög slök. Byrjunaratriðið greip mann og hélt manni í heljargreipum en þegar maður hélt að myndin yrði öll þannig, þá verð ég að segja að maður hafi verið blekktur. Eftir þetta frábæra byrjunaratriði (sem að eitt og sér vann til þessarar hálfu stjörnu) fannst mér liggur við meira spennandi að horfa á poppið en myndina. Aðalleikararnir voru afburða daprir og skrítið að enginn þeirra skyldi vinna til Kirsu berjaverðlaunanna (andstæðan við Óskarinn). Einnig verð ég að bæta við þetta að í fyrri myndunum var maður virkilega spenntur af því að þá gat allt gerst og persónurnar gerðu ekki einhverja útreiknanlega hluti eins og að ganga um ein í húsi þar sem að brjálaður morðingi drepur þá sem ganga um einir. Því er þessi mynd bara gerð fyrir þá sem að vilja sjá sem flesta drepna nema í þessari mynd er voðalega lítið um blóð miðað við hið mikla magn af "blóðatriðum" sem að voru í hinum tveimur myndunum. Ég verð þó að hrósa myndinni fyrir einstaklega óvænta(n) morðingja og var það til þess að maður vaknaði af blundinum í endann.

Ég get ekki sagt að þessi mynd sé vonbrigði, þar sem hinar myndirnar eru frekar slappar. Áður en ég fór að sjá myndina bjóst ég við ömulegri mynd, en raunin varð nú önnur myndin er bara nokkuð sæmileg. Já, ég hló nú nokkuð en öskraði ekkert, það voru nú aðrir sem sáu um það. Mér brá reyndar nokkrum sinnum, en ekki nóg. Leikarar eru frekar slappir líkt og áður. Persónur eru jafnheimskar og áður. Handrit sæmilegt en myndin sjálf er nokkuð flott. Ég verð að lýsa ánægju minni með það að það eigi ekki að gera fleiri Scream myndir.

Ókei, ég skal alveg viðurkenna að þessi gagnrýni er verulega hlutdræg.. ég dýrka og dái Scream-myndirnar og myndi sennilega gefa Scream XXVI 4 stjörnur líka. En ég lofa því að þessi mynd er engu síðri skemmtun en þær tvær fyrstu, og staðreyndin að þetta er síðasta myndin í flokknum gerir hana enn sérstakari í mínum huga. Þarf nokkuð að lýsa söguþræðinum? Veit ekki alþjóð um hvað málið snýst? OK, fyrir vesalings fólkið sem hefur ekki hugmynd um hvað ég er að tala: Eftir tvær myndir er veslings Sydney Prescott enn að kljást við hnífelskandi morðingjann í svörtu slánni með hvíta Edvard Munch-andlitið. Að venju koma henni til aðstoðar ofurtíkin Gale Weathers og nördinn litli Dewey. Því miður var Randy drepinn í nr. 2 (grenj..) svo hann er ekki hér... eða hvað?? Að þessu sinni gerist sagan í Hollywood þar sem verið er að taka Stab 3: Return to Woodsboro. Fyrr en varir tekur morðinginn okkar við að hakka niður leikarana í myndinni, og auðvitað verða Sydney, Gale og Dewey að taka málin í sínar hendur. Wes Craven er meistari hrollvekjunnar og jafnvel þó Kevin Williamson skrifi ekki handritið hér bregður manni enn jafnoft, og svei mér ef þessi er ekki jafnframt sú fyndnasta hingað til. Neve Campbell, Courteney Cox Arquette og David Arquette kunna hlutverkin sín orðið utanað, en það er gaman að sjá fólk á borð við Patrick Dempsey, Parker Posey, Jenny McCarthy, Scott Foley og Lance Henriksen bregða á leik gegn þessu liði. Þetta er þriðja myndin og eins og reglurnar segja til um.. þá eru engar reglur lengur. Hver sem er getur dáið. Og svo verðið þið bara að bíða og sjá hvað gerist. Góða skemmtun.

Ég er ansi mikill aðdáandi Scream-myndanna og sé myndina frá mjög jákvæðu sjónarhorni. Þessi er ansi lík hinum tveimur en þó nokkuð fyndnari. Hún er mjög flott og vel gerð. Leikararnir eru nokkuð góðir og handritið er mjög gott (þótt að Kevin Williamson sé lang bestur) og það er gengið vel frá þessari seinust mynd. Ef þú ert mikill aðdáandi ráðlegg þér að fara á hana, þú verður ekki fyrir vonbrigðum.

Jæja þá... Ég fór á miðnæturforsýninguna á Scream 3 á föstudagskvöldið. Ég er mikill aðdáandi fyrri myndanna tvegga og var þess vegna mjög spenntur fyrir þessari. Myndin byrjar mjög skyndilega - án fyrirvara, jafnvel - og fellur þessi mynd ekki í sömu gryfju og Scream 2 með því að hafa mjög langan og óspennandi kafla frá fyrsta morði til þess næsta. Nei, Scream 3 skellir öllu framan í þig á tiltölulega stuttum tíma og nær miklu adrenalín-rushi úr bíógestum fyrir vikið. Eitt af því skemmtilegasta við þessa mynd er hversu fyndin hún er, en oft á tíð leið mér eins og ég væri að horfa á grínmynd. Hinar myndirnar voru fyndnar, en þessi er farsi. Fullt af in-joke-um fyrir aðdáendur þess háttar. En það voru margir gallar: Persónurnar voru mjög þunnar og síðustu 20 mínúturnar - eða alveg frá því að morðinginn(arnir) er(u) upplýstur(ir) - eru hræðilegar. Allt lokaatriðið í húsi framleiðandans er mjög skemmtilegt og vel gert og má hið sama segja um alla myndina. Hún á kannski ekki skilið þrjár stjörnur, en ég skemmti mér það vel að ég ætla að vera gjafmildur í dag. En þessi mynd er eingöngu fyrir þá sem höfðu gaman af fyrri myndunum. Báðum! Aðrir ættu að sjá eitthvað annað.

Þessi þriðja og "síðasta" mynd í Scream seríunni tekur upp þráðinn skömmu eftir Scream 2 og gerist mestmegnis í Hollywood þar sem verið er að taka upp kvikmynd sem er byggð á raunum aðalpersónanna. Ég hef ákveðið að fara ekki ofan í söguþráðinn nánar þar sem þetta er dæmigerð mynd sem skemmtilegra er að vita sem minnst um slíka hluti áður en maður sér hana. Fyrsta Scream myndin kom mér afar skemmtilega á óvart á sínum tíma, þetta var ein fyrsta unglingahrollvekjan sem gerð var fyrir hugsandi fólk. Hvernig hún lék sér að væntingum áhorfenda og skírskotaði til annarra hryllingsmynda var meistaralega vel gert. Aldrei átti ég von á að Scream 2 myndi verða nálægt því jafngóð en hún kom mér jafnvel enn meira á óvart því mér fannst hún betri en forverinn, ótrúlegt en satt. Í henni tókst sérstaklega vel að halda tryggð við fyrri myndina en gera samt eitthvað öðruvísi og fara með hlutina á næsta stig. Það var varla hægt að ætlast til þess að sú þriðja myndi slá hinar tvær út en ég leyfði mér nú samt að vona. Í stuttu máli varð ég fyrir dálitlum vonbrigðum. Í stað Kevin Williamson sem skrifaði fyrstu tvær myndirnar er kominn nýr handritshöfundur að nafni Ehren Kruger og hann nær ekki sömu tökum á hlutunum. Sagan er að mörgu leiti frekar slöpp og "greindarvísitalan" í þessari mynd er mun lægri en í hinum tveimur þó að sniðugir hlutir komi reyndar fyrir inn á milli. Fórnarlömbin gera oft fáránlega hluti sem enginn heilvita maður myndi gera þegar geðsjúkir morðingjar væru nálægt. Þessi mynd gerist að því leiti sek um hluti sem voru teknir fyrir í Scream 1 og gert grín af. Leikurinn hjá aðalpersónunum er líka ekkert til þess að hrópa húrra fyrir, enginn af þeim leggur neitt á sig nema þá helst nýliðarnir í hópnum og sérstaklega fannst mér Courtney Cox döpur. Í samanburði við myndir eins og I Know What You Did Last Summer er þessi frekar góð en sem framhald af tveim sniðugustu hrollvekjum síðasta áratugs er hún vonbrigði.