Signs (2002)

Signs er hörkuspennandi vísindaskáldsöguhrollvekja með góðum gálgahúmori. Undarlegir hringir byrja að birtast á jörðinni og líka á kornakri bónda og prests (Mel Gibson,Braveheart,Whe Were Soldiers) og hann byrjar að gruna að þetta eru ekki menn sem gera þetta. Hann á heima með tveim börnum sínum og strákurinn er með alvarlegan asma og bróðir hans (Joaqim Phoenix,Buffalo Soldiers). Svo kemur í ljós að þetta eru alvöru geimverur og þær eru hættulegar og eru komnar á kornakrinn. Signs er bara ein magnaðasta mynd sem ég hef séð og ég vara við MJÖG óhugnaleg.

Góð spennumynd sem heldur manni allan tímann. Handritið er nokkuð gott. Spennuþrungið andrúmsloft er skapað með yfirþyrmandi ógn frekar en blóðsúthellingum. Myndin er mjög vel leikin og ber sérstaklega að nefna samleik þeirra Gibson og Phoenix. Ekki má gleyma litlu krökkunum tveimur.

Helstu gallar eru þeir að myndin verður svolítið amerísk undir lokin og farnar eru frekar ódýrar leiðir í úrvinnslu á efninu. Einnig verður að nefna eitt atriði í framvindu sem er frekar ótrúverðugt en verður ekki farið nánar út í hér.

Frábær mynd eins og hinar fyrri frá snillingnum M. Night Shyamalan. Hann er ótrúlegur listamaður og ég dýrka sköpunarverk hans... get ekki beðið eftir því næsta. Ég fór á Signs í bíó í sínum tíma og fékk alveg það sem ég bjóst við; hörkuspennu, hraða, miklar tilfinningar og góðan leik. Söguþráðurinn var fremur ófyrirsjáanlegur og mikil spenna frá upphafi svo maður datt bókstaflega inn í myndina. Ég þykist alltaf hafa vitað að geimverur eru til (þetta er nú dáltið stór heimur, þið verðið að viðurkenna það), þótt það sé þægilegra að ímynda sér að þær séu góðar :) En hér er spunnin upp magnþrungin saga um baráttu mannsins við fljúgandi furðuhluti og um leið er foríðin gerð upp hjá aðalpersónunum. Ég held ég geti ábyrgst það að ef þú hefur ekki séð þessa frábæru mynd þá ættirðu að drífa þig og ég lofa góðri skemmtun (þó kannski betra að hafa einhverja manneskju við hliðina). Frábært handrit, flott tónlist, góð leikstjórn, pottþéttar tæknibrellur, góður leikur. Æði ;)

Ein af betri myndum sem ég hef nokkurntían séð. M. Night Shyamalan sannar enn og aftur að hann sé snillingur og vonandi heldur hann áfram að koma með svona snilldarverk. Mel Gibson er frábær í sínu hlutverki en hann leikur fyrrverandi prest sem er enn að jafna sig eftir að hafa misst konuna sína. Einnig er Joaquin Phoenix góður og aðrir aukaleikarar. Tónslitin er góð og heldur manni meira spenntum nær alla myndina. Sjáðu þessa ef þú ert ekki búinn að því.

Signs er einfaldlega ótrúlega svöl mynd,það er allt sem mælir með henni.Allir leikarar standa sig með prýði hvort sem það er Gibson eða litla stelpan(og leikstjórinn sem er í ultraflottu aukahlutverki)og myndatakan er flott og tónlistin spilar vel inní myndina en er ekki ofnotuð einsog í svo mörgum myndum.ég veit ekki hvað er hægt segja meira en að þetta sé algjör snilld og ef þú ert ekki búinn að sjá hana þá hlauptu Forrest hlauptu.....út á næstu leigu.

Mjög góð mynd og skemmtilega útfærð en ótrúleg á köflum mjög góður leikur hjá Rory Culkin sem leikur sannfærandi í sínu hlutverki.Ég var mjög hræddur á tímabili þegar allt stóð í botni;).Ég mæli með þessari mynd sérstaklega útaf góðum leik,húmor og góðum tæknibrellur.

Ég ætla bara að hafa greinina stutta, því að ég vil ekki eyðileggja fyrir sumum. En þessi mynd hefur nær allt frábært upp á að bjóða, s.s. leikara, myndataka, tónlist, klipping, leikstjórn og fyrst og fremst, tónlistin. Ég mæli með að þú (lesandi góður) sjáir þessa mynd sem fyrst (áður en hún fer í minni sal)! Frábær mynd!

Signs er svolítið öðruvísi en aðrar myndir hún tekur svolítið á taugarnar en gerir það á annan hátt, þar sem að flestir nota tónlist er notuð þögn og viti menn spennan verður ekki minni, yfirbragðið verður allt pínulítið þvingandi og fær taugarnar til þess að taka við sér.

Myndin er frábærlega vel leikin og handritið er æðislegt.

Þessa mynd er vel þess virði að sjá í bíó og mæli ég eindregið með henni, fyrir alla sem vilja sjá öðruvísi vísindaskáldsögu.

Ég verð að segja að ég var soldið tvístígandi áður en ég sá myndina. Shyamalan hafði áður gert snilldina The Sixth Sense og seinna unbreakable sem að ég hef heyrt að væri ekki neitt rosalega góð, en það breyttist allt því ég hef aldrei verið jafn spenntur í bíó.

Mel Gibson stendur sig vel eins og oftast sem og Joaquin Pheonix, en Shyamalan kann sko líka að velja börn í hlutverk og verð ég að segja að Abigail Breslin sem leikur fimm ára dóttur Gibson´s og má þess geta að þetta er hennar fyrsta mynd.

Ég mæli eindregið með því að allir sjái þessa snilldar mynd.

Ég held að ekki sé nein ástæða fyrir mig að fara að rekja söguþráðin í Signs. Það hafa aðrir þegar gert. Signs er um margt mjög áhugverð mynd. Hún er spennandi og verulega vel gerð.Shyamalan sannar hér endanlega snilli sína í gerð mynda sem eru allt í senn, óhugnalegar og spennandi en samt sem áður hugljúfar og viðkunnalegar. Mel Gibson er stórkostlegur sem prestur sem misst hefur trúarfestuna með konunni. Meira að segja litli Culkin getur leikið.(nokkuð sem stóri bróðir gat aldrei) Topp mynd.

Graham Hess (Mel Gibson) býr með börnum sínum tveimur, Morgan (Rory Culkin) og Bo (Abigail Breslin) og bróður sínum Merrill (Joaquin Phoenix) á sveitabæ í Pennsylvaníu. Hann var áður prestur en hefur misst trúna vegna persónulegs harmleiks. Einn góðan veðurdag vaknar hann upp við hræðsluóp dóttur sinnar. Hann hleypur út og sér að undarleg tákn hafa verið gerð í maísinn í formi risavaxinna hringja. Fyrst í stað afskrifar hann þetta sem plat en eftir að hann og bróðir hans elta torkennilega veru sem hverfur síðan, hundarnir á bænum verða óðir og undarleg hljóð taka að berast með útvarpsbylgjum fara að renna á hann tvær grímur. Hvað er eiginlega um að vera? Eru geimverur komnar til jarðar? Eða er einhver að spila með hann? Hvað sem það er þá er eitthvað ógnvænlegt á sveimi rétt fyrir utan bæinn hans sem gæti ógnað bæði hans eigin lífi og lífi fjölskyldu hans.

M. Night Shyamalan hefur einstakt lag á að vekja óhug með fólki bara út úr samtölum fólks. Hann hefur einnig áttað sig á því alveg eins og meistari Hitchcock eða meistari Kubrick að það sem maður hvorki sér eða heyrir er það skelfilegasta af því öllu. Það er langt síðan ég hef séð þögn vera notuð á jafn áhrifamikinn hátt eins og hér. Eins og þegar Graham fer út á maísakurinn til að rannsaka málið. Það er algjör þögn og spennan er nánast óbærileg. Allt í allt þá er þetta umfram allt annað verulega óhugnanleg og óþægileg mynd á að horfa sem er einmitt þau áhrif sem er verið að reyna að fá.

Til þess að ná fram óþægindatilfinningunni er mikið notast við kvikmyndatöku og tónlist og bæði eru í toppformi. Kvikmyndataka Tak Fujimoto býr til einangrun og frábærlega innilokunarkennt andrúmsloft. Og tónlist James Newton Howard er verulega taugatrekkjandi og minnir talsvert á hina frábæru tónlist Bernard Herrmann í Psycho (upprunalegu).

Leikarar standa sig einnig afar vel. Mel Gibson er alltaf bestur í einhverjum svona hlutverkum sem hin sterka en samt sem áður mannlega týpa. Hann stendur sig hér með stakri prýði og bætir upp fyrir hörmungina We Were Soldiers. Joaquin Phoenix sem yngri bróðir hans gefur honum síðan lítið eftir. Og enn og aftur er aðdáunarvert hversu vel Shyamalan tekst að ná góðum leik frá barnungum leikurum, þá sérstaklega Rory Culkin sem sýnir frábæran leik sem hinn áhrifagjarni Morgan. Culkin (af Culkin-fjölskyldunni samanber Macauley Culkin) stefnir í að verða mikið efni.

Þetta er áreiðanlega einn af bestu spennutryllum ársins og er nánast jafngóð og fyrsta bandaríska mynd Shyamalans, The Sixth Sense. Þessi er mögnuð.