Domestic Disturbance (2001)

Þetta er spenna og háski frá upphafi til enda og þetta er ein af betri myndum sem Travolta hefur leikið í síðan hann var upp á sitt besta. Ég mæli eindregið með að allir sjái þessa mynd sem fyrst. John Travolta er í hlutverki bátasmiðs sem á 14 ára gamlan son sem verður vitni að hrottalegu morði sem unnusti móður hans fremur. En enginn trúir honum.....nema pabbi hans og nú er það undir þeim komið að sanna hið rétta.

Þegar haldið var að John Travolta væri aftur kominn á toppinn (eftir þrælfínan leik í Swordfish) er hann sokkinn aftur niður á botninn, í mynd sem er næstum því jafn léleg í gæðum (ókei kannski ekki alveg) og Battlefield: Earth hryllingurinn. Domestic Disturbance er ferlega vondur þriller sem er með afar illa skrifað plott (sem hver annar krakki í grunnskóla hefði getað fattað upp á) þar sem spenna og áhugi áhorfandans er í lágmarki. Hæfileikum hins stórgóða Steve Buscemi er líka sóað á hinn versta hátt sem hann ætti að skammast sín fyrir (svo á hann ekki meira en 10 mínútur í skjátíma), og sama má segja um hinn ágæta Vince Vaughn. Teri Polo er voðalega hæfileikalaus, og er ekkert betri hér en í Meet the Parents, og ég er viss um að hver önnur fimmauraleikkona hefði getað gert þetta betur. Atburðarásin er voðalega útreiknanleg og ekkert við söguþráðinn kemur á óvart, ekki einu sinni endirinn. Jafnvel opnunar kredit-listinn benti til þess að manni ætti eftir að leiðast yfir myndinni. Hann var ÞAÐ basic. Eini kosturinn sem ég sé við þessa mynd er leikurinn hjá Vaughn og Buscemi - og báðir tveir eru það vannýttir að það er varla hægt að réttlæta þann kost. Annars er ég viss um að Travolta eigi eftir að eiga erfitt með að bjarga ferlinum sínum héðanaf. Hann hefði kannski frekar átt að leika vonda kallinn í myndinni og Vince Vaughn góða gaurinn. Það hefði fittað betur.4/10

Ég verð að segja að ég bjóst við miklu meiru af Þessari mynd. Myndin er um ungan strák sem býr hjá mömmu sinni og verðandi manni hennar. Hann er ekkert alltof hrifinn af þeim manni og stuttu eftir að þau giftast kemur hann með ótrúlega sögu sem að pabbi hans og aðrir taka ekkert alltof trúanlega. En hver er að segja satt og hver er að ljúga. Meðal leikara eru gamli diskó boltinn John Travolta og svo snillingurinn Steve Buscemi, þrátt fyrir það er þetta bara ein af þessum slöppu fjöldaframleiddu lummum sem skilja ekkert eftir sig.