Það styttist í frumsýningu Spider-Man: Brand New Day og ný viðtöl við leikstjórann Destin Daniel Cretton gefa betri mynd um hvað aðdáendur Köngulóarmannsins mega búast við.
Samkvæmt Cretton verður myndin ólík fyrri Spider-Man myndum með Tom Holland. Markmiðið hafi ekki verið að gera stærri mynd en Spider-Man: No Way Home, heldur segja persónulegri sögu um Peter Parker.
Eftir atburði Spider-Man: No Way Home man enginn lengur hver Peter Parker er. Hann stendur því einn eftir og þarf að takast á við nýjan veruleika án þeirra sem áður stóðu honum næst.
Punisher verður andstæða Spider-Man
Eitt af því sem hefur vakið mesta athygli er endurkoma Jon Bernthal sem The Punisher.
Leikstjórinn segir að Punisher sé ekki bara í myndinni fyrir hasaratriðin. Hann eigi að vera ákveðin andstæða við Spider-Man og sýna hvaða leið Peter Parker gæti farið ef hann léti reiði og hefndarþrá stjórna sér.
Þrátt fyrir að myndin sé með PG-13 aldurstakmörkun segir Cretton að Punisher verði áfram sami harðneskjulegi karakterinn sem aðdáendur þekkja.
Hlutverk Sadie Sink enn leyndarmál
Marvel og Sony hafa enn ekki upplýst hvaða hlutverk Sadie Sink leikur í myndinni, enda vilja framleiðendur halda því leyndu fram að frumsýningu.
Samkvæmt Cretton er markmiðið að gera bíóupplifunina betri: „Myndin verður einfaldlega betri ef fólk veit ekki ákveðna hluti áður en það sest í bíósalinn,“ segir leikstjórinn. Hann hvetur því aðdáendur til að forðast spoilera og mæta sem óupplýstastir í bíó.
Ný upplifun af Spider-Man
Leikstjórinn segir einnig að mikið hafi verið lagt upp úr því að láta áhorfendur upplifa hvernig það sé í raun að vera Spider-Man.
Við tökur var meðal annars sóttur innblástur í parkour, þar sem hlaupið, klifrað og stokkið er yfir hindranir, ásamt wingsuit-flugi og klassískum Spider-Man teiknimyndasögum til að skapa nýja upplifun af Spider-Man á ferð um New York. Cretton segir jafnframt að markmiðið hafi verið að nota eins mikið af raunverulegum áhættuatriðum og mögulegt var áður en tölvubrellur tóku við.
Það var þó hægara sagt en gert. Eitt atriði þurfti að minnsta kosti 65 tökur áður en leikstjórinn var sáttur við útkomuna.
Spider-Man: Brand New Day verður forsýnd í Smárabíói miðvikudaginn 29. júlí og frumsýnd í Smárabíói, Sambíóunum og Laugarásbíói fimmtudaginn 30. júlí.
Heimildir:
The Hollywood Reporter – Destin Daniel Cretton Believes Secrecy Around Sadie Sink’s Role Makes ‘Spider-Man: Brand New Day’ a Better Movie
Collider – ‘Spider-Man: Brand New Day’ Director Teases a Darker MCU Story Thanks to The Punisher
Spider-Man: Brand New Day (2026)
8/10 
