Íslenska kvikmyndin Ástin sem eftir er, eftir leikstjórann Hlyn Pálmason, hefur verið tilnefnd til Kvikmyndaverðlauna Norðurlandaráðs 2026.
Alls eru sex kvikmyndir tilnefndar til verðlaunanna í ár, fimm leiknar kvikmyndir og ein heimildarmynd. Tilnefningarnar verða formlega kynntar á morgun á norsku kvikmyndahátíðinni í Haugesund.
Hlynur Pálmason er tilnefndur sem leikstjóri og handritshöfundur myndarinnar og framleiðendurnir Anton Máni Svansson og Katrin Pors eru einnig tilnefnd.
Þetta er í fjórða sinn sem Hlynur hlýtur tilnefningu til Kvikmyndaverðlauna Norðurlandaráðs. Hann var fyrst tilnefndur árið 2018 fyrir Vetrarbræður, árið 2019 fyrir Hvítan, hvítan dag og árið 2022 fyrir Volaða land.
Vetrarbræður 2017
Vetrarbræður gerist í einangraðri verkamannabyggð einhvers staðar í Danmörku þar sem við kynnumst bræðrunum Johani og Emil. Þegar heimabrugg þess síðarnefnda leiðir til þess að einn af verkamönnunum veikist hastarlega…
Síminn
Hvítur, hvítur dagur 2019
Ingimundur er lögreglustjóri sem hefur verið í starfsleyfi frá því að eiginkona hans lést óvænt af slysförum. Í sorginni einbeitir hann sér að því að byggja hús fyrir dóttur sína og afastelpu, þar til athygli hans…
Volaða land 2022
Volaða Land er stórbrotin saga af baráttu manns við náttúruna, trúnna og sitt dýrslega eðli. Undir lok 19. aldar ferðast ungur danskur prestur til Íslands í þeim tilgangi að reisa kirkju og ljósmynda íbúa eyjunnar…
SÝNAnton Máni Svansson hefur einnig komið að framleiðslu allra fjögurra myndanna og hlýtur nú sína fjórðu tilnefningu. Katrin Pors hefur framleitt síðustu fimm verkefni Hlyns ásamt Antoni Mána og er raunar með tvær myndir í keppninni í ár, þar sem hún er einnig einn framleiðenda dönsku myndarinnar Beginnings.
Ástin sem eftir er var frumsýnd í Cannes Première hluta Cannes kvikmyndahátíðarinnar árið 2025. Myndin fylgir Önnu og Magnúsi í gegnum eitt ár þar sem þau takast á við skilnað og breytt fjölskyldulíf. Dómnefndin lýsir henni meðal annars sem raunsærri og gamansamri sýn á sorg, ást, list og störf.
Hinar tilnefndu myndirnar
Danmörk sendir Beginnings eftir Jeanette Nordahl. Myndin fjallar um Ane og Thomas sem eru á leið í skilnað þegar Ane fær heilablóðfall og fjölskyldan neyðist til að takast á við gjörbreyttar aðstæður.
Beginnings 2025
Ane og Thomas eru í miðjum skilnaði þegar Ane fær skyndilega heilablóðfall. Þau ákveða að vera saman þar til Ane er komin á fætur aftur, en á meðan hún berst við að komast aftur til lífsins kviknar ástin þar sem þau…
Finnska myndin A Light That Never Goes Out, eftir Lauri-Matti Parppei, segir frá 29 ára flautuleikaranum Pauli sem snýr aftur í heimabæ sinn eftir áfall og finnur nýjan tilgang í vináttu og heimi tilraunakenndrar tónlistar.
A Light That Never Goes Out 2025
Hinn farsæli klassíski þverflautuleikari Pauli snýr aftur í smábæinn sinn eftir taugaáfall. Hann endurnýjar kynnin við gömlu skólasystur sína, Iiris, og laðast að tilraunakenndri tónlist. Pauli, sem hefur alltaf leitað…
Framlag Færeyja er heimildarmyndin Birita eftir Búa Dam. Þar fylgist hann með fjölskyldu sinni undirbúa uppfærslu á Lér konungi eftir Shakespeare þar sem móðir hans, leikkonan Birita Mohr sem glímir við Alzheimer, fer með aðalhlutverkið.
Birita 2025
Í Færeyjum vinnur leikhúsfjölskylda að því að setja upp „Lé konung“ með móðurina í aðalhlutverki – ástsæla leikkonu sem þjáist af Alzheimer.
Norska myndin Sentimental Value eftir Joachim Trier fjallar um systurnar Noru og Agnes sem endurnýja kynni sín við föður sinn, fyrrverandi kvikmyndaleikstjóra sem reynir að snúa aftur með nýrri mynd. Þegar Nora hafnar aðalhlutverkinu ræður hann unga Hollywood stjörnu í hennar stað og gömul fjölskyldutengsl flækjast enn frekar.
Sentimental Value 2025
Tvær systur snúa aftur á æskuheimili sitt þar sem þær hitta föður sinn sem eitt sinn var frægur kvikmyndaleikstjóri. Hann býður annarri þeirra aðalhlutverk í nýrri kvikmynd ... og þá breytist allt.
Sænska myndin Kevlarsjäl eftir Mariu Eriksson-Hecht segir frá bræðrunum Alex og Robin sem þurfa að sjá að mestu um sig sjálfir eftir að móðir þeirra deyr. Sterk tengsl þeirra eru síðan reynd þegar Alex verður ástfanginn og Robin upplifir að bróðir hans hafi yfirgefið sig.
Kevlar Soul 2025
Bræðurnir Alex og Robin búa við ömurlegar aðstæður hjá ofbeldisfullum og illa förnum föður sínum sem er alkóhólisti. Í tilraun til að gera lífið bærilegra reynir Alex að halda föður sínum í góðu skapi á meðan hann tekur…
Verðlaunin fyrst veitt árið 2002
Kvikmyndaverðlaun Norðurlandaráðs voru fyrst veitt árið 2002 og hafa verið veitt árlega frá árinu 2005. Verðlaunin eru veitt norrænni kvikmynd sem þykir skara fram úr listrænt og á sama tíma eiga rætur sínar að rekja til norrænnar menningar.
Verðlaunin nema 300 þúsund dönskum krónum, eða um 5,7 milljónum íslenskra króna, og skiptast jafnt á milli handritshöfundar, leikstjóra og framleiðanda eða framleiðenda verðlaunamyndarinnar.
Tilnefndu myndirnar verða sýndar víðs vegar um Norðurlöndin í haust. Hér á landi verða þær sýndar í Bíó Paradís dagana 13. til 18. október á sérstökum sýningum í samstarfi við Stockfish, en Stockfish kvikmyndahátíðin fór fram í mars síðastliðnum.
Sigurvegarinn verður tilkynntur 20. október og tekur við Nordlys-styttunni í Helsinki.
