Hin þekkta danska leikkona, Trine Dyrholm, verður heiðursgestur RIFF þetta árið og viðstödd frumsýningu á Margréti fyrstu (e. Margrete den første). Svo segir í tilkynningu frá Alþjóðlegri kvikmyndahátíð í Reykjavík en hátíðin verður haldin í átjánda sinn þann 30. september og stendur til 10. október.
Þar að auki verður Trine formaður dómnefndar í Vitranaflokki RIFF þar sem 9 myndir ungra kvikmyndaleikstjóra keppa um Gyllta lundann, aðalverðlaun hátíðarinnar.
Trine, sem leikur aðalhlutverkið í Margréti fyrstu, hefur áður hlotið 27 verðlaun og 26 tilnefningar fyrir besta leik bæði í aðal- og aukahlutverki. Með henni í dómnefnd í ár sitja Gísli Örn Garðarsson leikari, leikstjóri og framleiðandi, Aníta Briem leikkona, Gagga Jónsdótttir, leikstjóri og handritshöfundur og Yorgos Krassakopoulos dagskrárstjóri hinnar virtu Þessalónikuhátíðar á Grikklandi.
,,Það er mikill heiður að fá Trine til landsins til að taka þátt í hátíðinni en hún er tvímælalaust ein hæfileikaríkasta og virtasta leikkona Norðurlanda í dag og þótt víðar væri leitað enda margverðlaunuð fyrir frammistöðu sýna. ,,Það verður gaman að kynna hana fyrir bransanum hér og íslenskum áhorfendum,’’ segir Hrönn Marinósdóttir stjórnandi RIFF og bætir við að henni til heiðurs verði auk þess sýnd myndin Drottningin frá 2019 með Trine í aðalhlutverki en hún hlaut t.d. aðalverðlaunin á kvikmyndahátíðinni Gautaborg fyrir þá mynd. Trine mun spjalla við áhorfendur í Bíó Paradís af því tilefni.
Stórmyndin Margrét fyrsta er samstarfsverkefni allra Norðurlandanna og er ein dýrasta kvikmynd sem framleidd hefur verið á Norðurlöndunum. Myndin var frumsýnd sl. miðvikudag við frábærar viðtökur í Kaupmannahöfn og voru meðframleiðendi myndarinnar Kristinn Þórðarson hjá True North og leikkonurnar Tinna Hrafnsdóttir og Halldóra Geirharðsdóttir viðstödd frumsýninguna en báðar leika þær veigamikil hlutverk í myndinni.
