Bullock og Reynolds aftur saman

Fólkið á bakvið myndina The Proposal, þar á meðal Óskarsverðlaunaleikkonan Sandra Bullock og Ryan Reynolds, sem léku aðalhlutverkin í myndinni, ásamt leikstjóranum Anne Fletcher, hafa ákveðið að endurtaka leikinn og gera aðra mynd í svipuðum dúr.

Myndin heitir Most Wanted og fjallar um persónu sem Bullock leikur, sem er á flótta undan réttvísinni. Reynolds leikur skilorðseftirlitsmanninn sem sér um hana.

Myndinni er lýst sem svipaðri og myndinni The Midnight Run, gaman-spennumynd frá árinu 1988 með Robert De Niro og Charles Grodin í aðalhlutverkum. Universal er reyndar að vinna að framhaldi þeirrar myndar einnig, en það er önnur saga.

Upphaflega ætlaði Disney að framleiða Most Wanted, en fyrirtækið þénaði 317 milljónir Bandaríkjadala á The Proposal. Síðan þá hefur landslagið hjá Disney breyst, og áherslurnar orðnar meira fjölskylduvænar.

Sæt saman, þau Bullock og Reynolds.