The 6th Day (2000)

Arnold Schwarzenegger leikur hér mann að nafni Adam Gibson sem lendir í því að vera klónaður. Skiljanlega sættir hann sig ekki við að vera ekki hinn eini sanni og upphefst nú fjörug atburðarás þar sem ýmsum leyndarmálum er ljóstrað upp. Þessi mynd, Sixth day er alveg ágæt, snjöll og flott þó hún sé ekkert yfirgnæfandi frumleg. Klónun hefur reyndar lítið verið notuð í kvikmyndum, fyrir utan þessa man ég ekki eftir nokkurri annari klónunarmynd en Multiplicity með Michael Keaton, Sú mynd er gamanmynd en í Sixth day er þetta á alvarlegri nótunum og heppnast það bara mjög vel miðað við að handritið verður seint talið algjörlega óaðfinnanlegt. Neggerinn stendur alltaf fyrir sínu, alveg toppleikari en aðrir leikarar í þessari mynd eru að meika voða lítið. Niðurstaðan er sú að Sixth day ekki eins og eitthvað sem maður hefur aldrei séð áður en aðdáendur Neggersins ættu ekki að verða fyrir vonbrigðum.

Þetta er bara ótrúlega góð framtíðarmynd sem er líkleg og trúleg á alla vegu. Arnold Schwarzenegger kemur með góða frammistöðu (Hann var tilnefndur fyrir 3 Razzie verðlaun fyrir frammistöðu sína, Bömmer) sem Adam Gibson sem á afmæli í dag en eftir einn dag í lífi hans breytist allt. Þegar hann kemur heim finnur hann sjálfan sig heima hjá sér að halda upp á afmælið sitt. En þegar útsendarar Michael Druckers (stuðningsaðili klóningar) reyna drepa Gibson fer Gibson á för að finna út hvað er á seyði. Plottið er gott og er öll myndin það.

Sjötti dagurinn fjallar um Adam Gibson (Arnold Schwarzenegger), venjulegan fjölskyldumann sem verður fyrir því að vera tvöfaldaður. Hann kemur heim einn daginn og sér sjálfan sig halda upp á afmælið sitt með konu sinni og barni. Þetta kemur að sjálfsögðu illa við kauða, og er hann ekki á þeim buxunum að láta þetta afskiptalaust. Myndin fjallar svo um hvernig hann kemst að hinu sanna í málinu og tilraunir hans til að brjóta niður illmennið sem stendur á baki þessu, forstjóra Replacement Technologies, Michael Drucker (Tony Goldwyn). Þetta er á köflum skemmtileg mynd, enda býður cloning (eða einrækt á íslensku) upp á fjölbreytilegar uppákomur. Ekki get ég nú sagt að Adda Svaganagg takist frekar enn fyrr að sýna mikil leiktilþrif, þó að augljóst sé að hann er virkilega að reyna. Það sem gerir þessa mynd þess virði að sjá eru aukaleikararnir. Má þar fyrstan nefna vísindamanninn hjá Replacement Technologies Griffin Weir, listilega leikinn af Robert Duvall. Honum tekst vel að vekja samúð áhorfenda, og er mjög trúverðugur á allan máta. Tony Goldwyn sem hið margræktað illmenni er líka skemmtilegur, og er sem betur fer ekki hið venjulega fjöldaframleidda illmenni frá Hollywood. Michael Rapaport eða Hank vinur Adam Gibson, er stórskemmtilegur og hefði átt að nota hann mun meira. Sjálft handritið er ósköp innihaldslítið, og kemur fátt á óvart. Ekki fannst mér myndin heldur neitt afbrigða spennandi, og hélt hún athygli minni frekar út af hinu óvenjulega söguefni. The 6th Day er alveg þess virði að horfa á, og held ég að þeir sem hafa hingað til haft gaman af myndum með Arnold Schwarzenegger muni ekki verða fyrir vonbrigðum.

Þeta er þokkalegasta spennumynd en þær hafa sést betri. Arnold kallinn er að verða fullgamall í svona harðhausamyndir en leikari verður hann aldrei. Annar gamall leikari Robert Duvall sést hér en frekar finnst mér hann ósannfærandi, eins og hann hafi verið settur í þessa ræmu til að trekkja út á nafnið. Rappaport hinsvegar er þrælflottur stelur senunni. Tæknibrellur eru fínar og spennan þokkaleg en perónur klisjukenndar. Myndin leysist svo uppí tóma vitleysu í lokin, missir dampinn...

The 6th day fjallar í stuttu máli um Adam Gibson (Arnold Schwarzenegger) sem er þyrluflugmaður hjá Double X sem fer með fólk upp í fjöll til þess að það geti rennt sér niður á snjóbretti. Hann kemur heim eitt kvöld og sér að það er maður nauðalíkur honum að skemmta sér með fjölskyldunni hans. Hann reynir að redda málunum eins og honum einum er lagið. Myndin gerist í náinni framtíð og hún er ekki of ótrúverð. Helstu gallar hennar eru tæknibrellurnar, sérstaklega þegar þyrlurnar eru að fljúga, og nokkrar klisjur fylgja henni eins og svo oft í svona myndum. Arnold leikur bara nokkuð vel og einnig Robert Duval, sem er prófessor að þessu sinni. Handritið er mjög gott og einnig tónlistin. Takið þessa á DVD og kíkið á aukahlutina en þeir eru býsna margir og góðir...

Þetta er frábær hasarmynd og Arnold Schwarzenegger leikur vel í þessari kvikmynd. Schwarzenegger leikur þyrluflugmann sem heitir Adam Gipson. Hann lifir hamingjusömu lífi með eiginkonu og dóttur en einn daginn þegar hann kemur heim úr vinnunni þá fattar hann að hann hefur verið klónaður. Mikill hasar og spenna. Ég mæli með þessari.

Þessi nýjasta ræma Schwarzeneggers er framtíðar hasarmynd sem fjallar um fjölskylduföður nokkurn sem heitir Adam (klaufaleg tilvitnun í sköpunarsöguna sem hæfir ekki hasarmynd að mínu mati) sem lendir í því að vera "klónaður", eða einræktaður eins og það heitir víst á íslensku, af valdagráðugu rannsóknarfyrirtæki. Til að bæta enn á ógæfu hans þá eru gildandi ströng lög sem banna einræktun á mönnum og fyrirtækið reynir því allt sem það getur til að útrýma sönnunargögnunum gegn því, aðallega Adam sjálfum. Schwarzenegger hefur frekar takmarkaða leikhæfileika en sleppur þó ekki verr en venjulega frá sínu hér, að minnsta kosti þurfum við aldrei að horfa upp á hann gráta eins og í End of Days. Sem hasarmynd er Sixth Day bara nokkuð góð, í mörgum atriðum tekst að byggja upp dálitla spennu og tæknibrellurnar eru mjög góðar. Hún minnti samt aðeins of mikið á Total Recall fyrir minn smekk, sérstaklega framtíðarlega umhverfið. Annar galli er að á köflum virðist myndin taka sig of alvarlega, til dæmis með nafngiftina á aðalpersónunni eins og ég kom inn á áðan og líka smáatriðum eins og hún byrjar með setningu úr sköpunnarsögunni. Það er bara engin leið að gera trúanlega kvikmynd sem kannar siðferðis- og trúarlegar hliðar einræktun lífvera sem skartar Arnold um leið tætandi af sér einn "one-linerinn" á fætur öðrum. Tæknivinnsla er öll sem best og áhugaverðar klippingar gera mikið til þess að lífga myndina við. Ef ég ætti að bera Sixth Day saman við aðrar myndir Arnolds myndi ég segja að hún væri það besta sem hann hefur gert síðan Eraser (eða semsagt betri en End of Days) en hún kemst ekki nálægt myndum á borð við Total Recall og Terminator 2. Niðurstaðan er því að þetta er fín hasarmynd fyrir þá sem hafa gaman af Arnold.