The Blair Witch Project (1999)

Þegar ég fór á þessa mynd þá bjóst ég við að hún yrði miklu betri vegna þess að það var verið að tala svo mikið um öll hryllings atriðin í henni. En því miður þá varð ég fyrir miklum vonbrigðum. Ég bjóst við algjörum hryllingi en fékk í staðinn eina af lélegustu hryllingsmyndum sem ég hef séð. Svo ég segi við fólk "ekki búast við neinu". Sumt var auðvitað óhugnalegt en þetta var ekkert miðað við það sem ég bjóst við.

Ég segi með óhugnalegri myndum heims. Þetta er sönn saga og þegar hún var í bíó héldu allir að þetta eru alvöru upptökur en þetta er bara leikið. 1994 fóru þrír háskólanemar í skóga Marylands til að gera heimildarmynd um Blair nornina. En þau týndust og komu aldrei aftur. Það var svo gert hörmulegt framhald sem heitir Blair Witch The Book Of Shadows.

Gífurleg vonbrigði lýsa þessari mynd best. Ég hafði kannski gert mér of miklar vonir enda er búin að vera gífurleg markaðssetning í kringum þessa mynd. Myndin fer rólega af stað og fyrir hlé gerist nákvæmlega ekki neitt. Fór maður þá að búa sig undir æsilegan seinni hluta, enda myndinni verið lýst sem mögnuðustu hrollvekju seinni tíma. Eftir hlé var nákvæmlega sami söguþráðurinn í myndinni, krakkarnir ráfuðu um skóginn á daginn og öskruðu í myrkrinu á nóttunni og það átti að vera voða æsandi. Endirinn er líka sér kapítuli, en eftir á að hyggja var hann þó sterkasti punktur myndarinnar, auðvitað hlaut hún að enda svona. Ég ætla ekki að segja frá honum hér ef ske kynni að einhver sem les þetta er ekki búinn að sjá myndina. Þessa einu stjörnu mína ætla ég að gefa fyrir endirinn á myndinni, en ef þið viljið fara góða hrollvekju eða spennumynd mæli ég með adrenalín myndinni Sjötta skilningavitið með Bruce Willis.

Ótrúlega óhugnaleg mynd sem var gerð eins og heimildarmynd og allir trúðu þessu á sínum tíma. Október 1994 (sönn saga) fóru þrír nemar upp í skóg einhversstaðar í Maryland til að gera heimildarmynd um Blair nornina. Þau komu aldrei aftur en ári seinna fundust upptökur þeirra (þetta eru ekki þær, þetta er bara leikið). Atriðið sem það er allt dimmt og maður getur heyrt börn gráta út í skóg er mjög ÉG VARA VIÐ mjög mjög óhugnalegt. Góð mynd sem er bara ótrúlega óhugnaleg!

Hér er á ferðinni hryllingmynd fyrir augun, ekki það að hún sé ógnvekjandi held var þetta ein verst gerða mynd sögunar og ég hefði ekki einu sinni sýnt hann sem áhugamynd í skóla.

Í fyrsta lagi kostaði þessi mynd ekki nema svona 2 dollara að virðist í framleiðslu, ekki var eitt gott atriði í henni og engin spenningur bara helling af hlaupum úti í skógi með myndavél, síðan var ég ekkert lítið hissa í lok myndarinnar stóð fólk upp og klappaði ég var að pæla í að gera hið sama ekki af því að myndin var góð heldur afþví að hún var loksins búin.

Maður ætti kannski að skella sér í vaglaskóg og hlaupa um með myndavél öskrandi og æpandi búa síðan til nokkra spítukalla og tjalda.

Þessi mynd er eitthvað sem ég hefði búist við að sjá í Jack Ass nú á dögum.

Að lokum mæli ég eindregið með að flogaveikir eða fólk sem verður auðveldlega sjóveikt fari ekki á þessa mynd.

Þokkalega góð mynd.

Ég sá hana heima hjá mér og drapst úr hræðslu, ýmundar aflið fór með mig á flakk og ég panikkaði. Ég held að ef maður trúir ekki á einhverja svona hluti þá getur maður ekki mikið verið hræddur við þá. En það gildir náttúrulega ekki fyrir okkur öll.

En allavega.

Myndatakan var öðruvísi, snilld, leikararnir voru góðir, snilld, þegar tjaldið hristist fann ég alveg herping í maganum eins og ég væri á staðnum inn í tjaldinu.

Maður verður að lifa sig inn í myndina, ekki reyna að hugsa út í það hvernig myndin er tekin eða hvernig leikararnir leika, maður á að njóta myndarinnar, sérstaklega seint að kvöldi og láta allt annað fjúka. Maður á að hugsa hvað myndi ég gera ef þetta væri ég?

njótið, frábær hryllir, endirinn bara SNILLD SNILLD SNILLD!!!

mæli með henni, 4 stjörnur og hana nú.

Hér er á ferðinni meistaraverk sem ekki allir kunna að meta, þarna er mynd, hrollvekja sem fær mann til þess að naga neglurnar upp í kviku. Þessi mynd er hinsvegar ólík öllum öðrum hrollvekjum fyrri tíma á þann hátt að þarna er ekkert ógeð á ferðinni, engir hausar sem fjúga, ekkert blóð, engar óraunverulegar furðuverur sem éta fólk lifandi heldur er allur óhugnaðurinn í þessari mynd byggður upp andlega. Þess vegna vil ég meina að þetta sé raunverulegasta hryllingsmynd sem hægt er að hugsa sér. Þarna eru fjórir krakkar úr kvikmyndaskóla sem fara út í skóg sem talið er að sé reimt í. Og þau fara þangað í kringum hrekkjavökuna, og þar sem mikið er til af sögum um nornir og einkennilega reimleika á hrekkjavökunóttina eru þau eiginlega hálf hrædd áður en þau koma inn í skóginn... Svo eftir því sem að líður á myndina dregst maður með inn í þennan heim ímyndana sem virðast mjög raunverulegar. Svo magnast spennan jafnt og þétt þangað til að hápunktinum er náð en það er einmitt í lok myndarinnar, þá er áhorfandinn skilinn eftir og veit ekkert nema bara það að hann ætlar ekki að sofna með ljósin slökkt.

Árið 1994 héldu þrjú ungmenni inn í Svartaskóg í Marylandfylki í Bandaríkjunum til þess að búa til heimildamynd um gamla þjóðsögu á staðnum, nornina frá Blair. Ekkert hefur spurst til þeirra síðan. Einu ári seinna fundust upptökur þeirra. Þannig hljómar upphafslína myndarinnar The Blair Witch Project sem er örugglega besta og skelfilegasta hryllingsmynd áratugarins. Ungmennin þrjú eru Heather (Heather Donahue), Josh (Joshua Leonard) og Mike (Michael Williams). Áður hafa þau tekið viðtöl við fólkið sem lifir í grennd við skóginn og það segir þeim óljósar lýsingar um nornina og hvort þau haldi að sagan sé sönn og meira í þeim dúr. Þau vita líka alls konar óhugnanlegar lýsingar á því að börn og annað fólk hafi verið drepið og limlest á hryllilegan hátt og einhvers konar tákn hafi verið hjá líkunum. Þau halda síðan inn í skóginn. Þau eru vongóð og bjartsýn í byrjun. Um nóttina heyrir Josh eitthvað hljóð fyrir utan tjaldið en þau halda að það hafi ekki verið neitt. Þau fara hins vegar að verða dálítið óróleg þegar þau grunar að þau gætu verið villt. Næstu nótt heyra þau greinilega eitthvað og fara að verða óttaslegin. Þau verða síðan enn örvæntingarfyllri þegar þau finna tákn sem líkjast einhvers konar vúdú. Þau ganga í hringi, matarbirgðirnar eru búnar, þeim er kalt og þau vita það að einhver eða eitthvað er að elta þau og þau stórlega efa það að hann/hún/það hafi eitthvað gott í hyggju. Það sem lætur myndina virka eins vel hún gerir er að þetta er gert í ofurraunsæislegum heimildamyndastíl. Myndin er tekin upp á handhelda myndavél og oft sést ekkert hvað er um að vera. Það er einmitt málið. Það sem er ógnvekjandi og ógnvænlegt er ekki það sem sést heldur það sem gefið er í skyn og það er svo sannarlega gefið margt í skyn í þessari mynd. Mér hefur sjaldan eða aldrei liðið jafn illa eftir að hafa farið í bíó. Leikurinn er frábær en galdurinn er að margt af þessu er enginn leikur. Þessir krakkar eru í alvörunni hrædd. Leikstjórarnir, þeir Daniel Myrick og Eduardo Sánchez létu þau labba þangað til þau voru örþreytt og matarbirgðir af skornum skammti og hrelldu þau með alls kyns brellum sem þeim hafði ekkert verið sagt til um að myndu vera. Þess vegna er hræðsla þeirra ekki leikin heldur raunveruleg. Ég ætla ekki að lýsa smáatriðum myndarinnar eða því hvað gerist en ég ætla að segja að þetta er ein af þeim myndum þar sem maður getur ekki fundið einn einasta hlut athugaverðan. Þessi mynd mun hræða þig meira en fáar aðrar myndir munu gera og þú munt ekki koma út úr bíóinu samur maður. Til dæmis efast ég að þú munir nokkurn tímann fara í útilegu aftur.

Þetta er nú hálf slök mynd (með því versta sem ég hef sé sem á að teljast hryllingsmynd). Ég bara skil ekki hvernig fólk gat orðið hrætt á þessari mynd. Endirinn var hörmung ég hélt að ég hefði fengið gallaða spólu á leiguni því það vantaði allan endirinn, en svo komst ég að því að endirinn hefði endað svona. Ég fékk tár í augun og fór að biðja um að það komi ekki framhald!!!!

Vá hvað þetta er léleg mynd. Ég var búinn að heyra að hún væri ofsalega skerí og að maður yrði myrkfælinn í marga mánuði á eftir. Síðan gerði ég þau mistök að sjá hana. VÁ hvað þessi mynd er leiðinleg. Ég tek undir það sem einhver annar sagði, tvö orð: Hræðilega Léleg.

Ég get varla lýst því með orðum hvað þessi mynd er ömurlega léleg og leiðinleg. Ein sú allra versta mynd sem ég hef séð á minni ævi. En þeir eiga hrós sem gerðu hana. Hrósið fá þeir fyrir það að hafa hreinlega gabbað almenning til að halda að þetta séu raunverulegar upptökur. Einnig settu þeir upp vefsíðu ,sem milljónir manna heimsóttu daglega, þar sem þetta var allt klætt í dularfullann og spennandi búning. En þessi mynd er ekki spennandi. Ó nei. Hún er svo langdregin og leiðinleg að manni langar mest til að gubba. Ég var nú bara feginn þegar ég var látinn horfa á þessa mynd í sálfræði þar sem bekkurinn minn var að fjalla um óttann við hið óþekkta, en ég hreinlega sofnaði. Myndatakan er pirrandi, myndavélin alltaf á fleygiferð og þessir þrír leikarar sem koma við sögu eru hrikalegir. Þessi mynd er ein af þeim fimm verstu sem ég hef séð á ævinni og ég ræð öllum frá því að sjá hana.

Virkilega óhugnaleg mynd, framleiðir netta gæsahúð. Ég horfði á þessa mynd með 16 ára dóttur minni og hún vissi ekki betur en þetta væri í raun og veru að gerast. Hún hágrét yfir örlögum þessara krakka en svo sannfærandi eru þessi ungmenni að með ólíkindum er. Þetta hefur verið ansi sniðugt hjá aðstendendum þessarar myndar að láta fólk trúa því lengi vel að þetta væri heilagur sannleikur. Það verður gaman að fylgjast með þessum sem myndina gerðu í framtíðinni. Ef þú vilt sjá öðruvísi mynd, taktu þá þessa...