Leikkonan Juliette Lewis hefur verið ráðin til að leika í myndinni Blood or Water, eða Blóð eða vatn, sem er nútíma film noir mynd eftir skoska leikstjórann Justin Molotnikov. Lewis, sem nýlega tók að sér hlutverk í lögfræðiþáttunum The Firm á NBC sjónvarpsstöðinni, mun í myndinni leika á móti bresku leikurunum Stephen McCole, Kate Dickie, og Gary Lewis ásamt Greta Scacchi. Fyrsta mynd Molotnikovs, Crying with Laughter, sem var frumsýnd árið 2009, vann skosku BAFTA verðlaunin fyrir bestu frumraunina.
„Ég er spennt yfir óvenjulegri nálgun Justins Molotnikov, að því hvernig hann segir sögu og gerir kvikmyndir,“ sagði Lewis í samtali við Hollywood Reporter.
Molotnikov framleiðir myndina sjálfur ásamt hinu danska framleiðslufyrirtæki LevelK. Tökur á myndinni eiga að hefjast í Skotlandi næsta vor.