Költklassíkin Léon: The Professional verður sýnd á næstu Bíótöfrasýningu í MAX-sal Smárabíós miðvikudaginn 26. ágúst kl. 20:00.
Þetta verður þriðja Bíótöfrasýningin í samstarfi við Smárabíó þar sem vinsælar kvikmyndir og klassískar perlur fá nýtt líf á hvíta tjaldinu í sal sem stefnir í að fyllast af kvikmyndaáhugafólki.
Að þessu sinni varð Léon: The Professional fyrir valinu, kvikmynd Luc Besson frá árinu 1994 með Jean Reno, Gary Oldman og Natalie Portman í aðalhlutverkum. Myndin hefur fyrir löngu öðlast sess sem ein eftirminnilegasta spennumynd tíunda áratugarins og var fyrsta stóra kvikmyndahlutverk Portman.
Áhorfendur fá að velja útgáfuna
Það ræðst þó af meðlimum Facebook hópsins Kvikmyndaáhugamenn hvaða útgáfa myndarinnar verður sýnd. Könnun stendur nú yfir í hópnum þar sem meðlimir geta valið á milli hefðbundnu bíóútgáfunnar og lengri International Cut-útgáfunnar.
Þegar þetta er skrifað stefnir allt í að lengri útgáfan verði fyrir valinu. 34 hafa kosið International Cut, eða um 90% þeirra sem hafa tekið þátt í könnuninni.
Hefðbundna bíóútgáfan er um 110 mínútur að lengd en International Cut bætir við rúmlega 20 mínútum af efni. Þar fá áhorfendur meðal annars að sjá meira af sambandi Léons og Mathildu og þjálfun hennar undir handleiðslu leigumorðingjans Léons.
Aðeins rúmlega 60 sæti eftir
Mikill áhugi hefur verið á sýningunni og þegar þetta er skrifað eru aðeins rúmlega 60 sæti laus í MAX-salnum.
Sýningin stefnir því í að verða vel sótt en enn er hægt að tryggja sér sæti og upplifa Léon: The Professional aftur á hvíta tjaldinu.
Léon: The Professional verður sýnd á Bíótöfrum í MAX-sal Smárabíós miðvikudaginn 26. ágúst kl. 20:00.
Miðar á sýninguna fást hér.
