10 góðar tískumyndir til að hita upp fyrir The Devil Wears Prada 2

Tískuheimurinn birtist okkur oft sem heimur fegurðar, sköpunar og glæsileika. En undir yfirborðinu leynist líka drama, metnaður, óöryggi og samkeppni um vald.

Hér eru tíu kvikmyndir sem gefa áhugaverða innsýn í tískuheiminn og eru tilvaldar til að hita upp fyrir The Devil Wears Prada 2 sem kemur í bíó í dag, fimmtudaginn 30. apríl.

10. Funny Face (1957)

Funny Face er klassísk Hollywoodmynd með Audrey Hepburn og Fred Astaire í aðalhlutverkum. Hún blandar saman tísku, tónlist og rómantík og segir frá konu sem vinnur í bókabúð en er uppgötvuð sem fyrirsæta og dregin inn í glitrandi heim tískunnar í París. Myndin er létt og falleg og sýnir tískuheiminn sem draumkenndan og nærri því ævintýralegan.
Funny Face IMDB

9. Gia (1998)

Gia segir sögu ofurfyrirsætunnar Gia Carangi og sýnir myrkari hlið tískuheimsins. Hér er engin rómantík á ferð heldur hrá og erfið frásögn af frægð, fíkn og einmanaleika. Angelina Jolie fer með aðalhlutverkið. Myndin undirstrikar þá hættu sem getur fylgt því að lifa eingöngu fyrir útlit og fegurð.

8. The Neon Demon (2016)

The Neon Demon er óvenjuleg og óhugnanleg mynd eftir Nicolas Winding Refn sem gerist í módelheiminum í Los Angeles. Hún dregur upp mynd af fegurð sem gjaldmiðli og sýnir hvernig samkeppni og öfund geta tekið yfir.

7. Clueless (1995)

Clueless er létt og skemmtileg unglingamynd með Alicia Silverstone í aðalhlutverki sem er þekkt fyrir áberandi tísku og stíl. Hún sýnir hvernig fatnaður og stíll móta sjálfsmynd og stöðu innan vinahópa. Þótt hún fjalli ekki beint um tískuiðnaðinn er mikil tískumeðvitund meðal aðalpersónanna og spilar tískan stórt hlutverk í myndinni.

6. The Dressmaker (2015)

The Dressmaker segir frá konu sem snýr aftur í heimabæ sinn og vinnur sem fatahönnuður. Hún notar hæfileika sína til að breyta útliti fólks í bænum og vill hefna sín á þeim sem fóru illa með hana. Kate Winslet fer með aðalhlutverkið. Myndin er dramatísk með svörtum húmor og sýnir hvernig fatnaður getur haft áhrif á ímynd fólks.

5. Zoolander (2006)

Zoolander er beitt satíra á tískuheiminn með Ben Stiller í aðalhlutverki, sem einnig leikstýrir myndinni. Greina má áhrif frá Mel Brooks í húmornum. Karakterar, útlit og söguþráður eru ýktir upp í miklu gríni. Þrátt fyrir það hittir myndin oft naglann á höfuðið þegar kemur að yfirborðsmennsku og sjálfhverfu í bransanum.

4. Blow-Up (1966)

Blow Up er klassísk mynd eftir Michelangelo Antonioni sem fylgir tískuljósmyndara í London. Hún gefur innsýn í tísku og listheim sjöunda áratugarins og snýst um atburðarás sem hefst þegar hann telur sig hafa fangað morð á filmu.

3. Phantom Thread (2017)

Phantom Thread er mynd eftir Paul Thomas Anderson sem gerist í heimi hátískunnar í London. Daniel Day-Lewis fer með aðalhlutverkið sem fatahönnuður sem lifir fyrir fullkomnun í starfi sínu. Myndin sýnir hvernig sköpun, metnaður og þráhyggja fléttast saman í heimi þar sem smáatriði skipta öllu máli – jafnvel of miklu máli.

2. House of Gucci (2021)

House of Gucci segir frá fjölskyldu, völdum og svikum innan eins frægasta tískuveldis heims. Lady Gaga og Adam Driver fara með aðalhlutverkin. Myndin er dramatísk túlkun á sögu Gucci fjölskyldunnar og fer stundum frjálslega með staðreyndir. Lady Gaga fékk þó mikið lof fyrir leik sinn. Myndin sýnir hvernig metnaður og peningar geta haft áhrif á sambönd og örlög fólks.

1. The Devil Wears Prada (2006)

The Devil Wears Prada er líklega sú mynd sem flestir tengja við tískuheiminn. Meryl Streep og Anne Hathaway fara með aðalhlutverkin, þar sem Streep leikur áhrifamikinn ritstjóra tískutímarits sem krefst fullkomnunar í hvívetna. Myndin fylgir ungri konu sem fær starf í þessum harða heimi og þarf að læra hratt hvernig hlutirnir virka. Hún sýnir bæði glamúrinn og kröfurnar sem fylgja tískuheiminum og hversu langt fólk er tilbúið að ganga til að ná árangri.