Pretty Woman (1990)

Vivian Ward er mella sem mælir göturnar á Sunset Boulevard ásamt vinkonu sinni vegna peningaleysis. Hún lendir í lukkupottinum er hún kynnist draumaprinsinum Richard sem er lífsleiður auðjöfur og vinnur við það að borða veikbyggð fyrirtæki í morgunverð, þ.e.a.s. að kaupa fyrirtæki og búta þau í sundur til að selja í smápörtum. Hún kemur eins og himnasending inn í líf hans og kennir honum að lifa lífinu og líka að rækta með sér alla þessa litlu sætu hluti sem vilja æði oft gleymast í öllu lífsgæðakapphlaupinu. Hér er komið sannkallað Öskubuskuævintýri tíunda áratugarins. Notaleg, feykivinsæl og pottþétt skemmtun - ef ske kynni að þú værir búinn að gleyma raunsæinu og bláköldum staðreyndum hversdagsgrámans. Julia Roberts og Richard Gere leika skötuhjúin Vivian og Richard á óaðfinnanlegan hátt. Julia Roberts var t.a.m. tilnefnd til óskarsverðlauna fyrir leik sinn, hún hefur að mínu mati ekki leikið betur á sínum ferli. Sama má segja um Richard Gere. Semsagt, kvikmyndin Glæsileg kona eða Pretty woman fær hvorki meira né minna en þrjár og hálfa stjörnu hjá mér, hún er einfaldlega mannbætandi, svona annað veifið.