Y Tu Mamá También (2001)

Y tú mamá también er frábær mynd. Hins vegar er hún hvorki evrópsk né gerist hún á Spáni. Myndin er mexíkósk og gerist í Mexíkó, aðalpersónurnar eru tveir mexíkóskir guttar, Julio og Tenoch, u.þ.b. 17-18 ára gamlir sem hafa enga stjórn á hormónunum. Kærusturnar þeirra fara í sumarleyfi til evrópu og Julio og Tenoch hugsa sér gott til glóðarinnar í grasekkilsstandi. Þeir kynnast Luisu, spænskri eiginkonu frænda Tenochs, og bjóða henni með sér í ferðalag til afskekktrar strandar í Suður-Mexíkó.


Þetta er ein af betri vegamyndum sem ég hef séð lengi, gott dæmi um þá grósku sem virðist vera í mexíkóskri kvikmyndagerð (annað dæmi er Amores perros, sem tilnefnd var til óskarsverðlauna í fyrra, en rataði held ég aldrei til Íslands. Frábær mynd sem enginn kvikmyndaáhugamaður ætti að missa af). Leikstjórinn er þar að auki nokkuð þekktur, Alfonso Cuaron, þekktustu myndir hans eru líklega Little Princess og Great Expectations. Kvikmyndatakan í Y tú mamá también er frábær, enda enginn aukvisi sem stendur að baki henni, Emmanuel Lubezki (Sleepy Hollow, Ali, o.fl.), sem er líka mexíkani. Leikararnir eru mjög góðir, sérstaklega Maribel Verdu (Belle Epoque), og það er eitt sem þessi mynd hefur fram yfir margar aðrar, kynlífssenurnar í myndinni eru opinskáar en eru felldar svo vel inn í frásögnina að manni finnst þeim aldrei ofaukið. Ekki lítið afrek það. Ég mæli eindregið með myndinni, ekki bara fyrir þá sem hafa gaman af evrópskri kvikmyndagerð (myndin er ekki evrópsk og ekkert sérstaklega mikið evrópskt við hana, þó um það megi auðvitað alltaf deila).

Ég skellti mér á þessa mynd á Kvikmyndahátíð Reykjavíkurborgar hér fyrr í vetur (haust eiginlega), aðallega vegna þess að ég hef gaman af evrópskum myndum og þessi virkaði dáldið spennandi.


Ég get með sanni sagt að hún hafi ekki valdið mér vonbrigðum. Hún byrjaði þar sem þessir tveir u.þ.b. 18 ára gaurar voru að skipuleggja sumarferð um Spán, og voru m.a. að reyna að telja eina Suður-Ameríska gelluna um að koma með sér.. Þá fór ég að halda að þetta væri svona spænsk útgáfa af Tomcats, eða American Pie eða eitthvað álíka.. svona ungfola-greddu-mynd, sem maður er búinn að sjá meira en nóg af. (Reyndar spilaði greddan stórt hlutverk í myndinni, en á annan hátt en þessar amerísku, allt öðruvísi.) Annað kom á bátinn. Maður fór að sjá að handritið var vel skrifað og persónurnar mjög góðar, og vel leiknar. Einnig tók maður sérstaklega eftir vissum atriðum í myndinnni sem henni alvarlegan undirtón, en þó ekki dramatískan.


Ég ætla að sjálfsögðu ekki að fara í saumana á söguþræðinum hér, það myndi bara skemma fyrir. En myndin er góð. Það get ég sagt. Þetta er sú tegund af mynd sem evrópskum frumlegum kvikmyndum á lofti sem einhverjum þeim bestu í heiminum.


Ég segi bara góða skemmtun! (Ég þarf að fara að sjá hana aftur...)